ابن عربی

Wikipedia توں
جاو: مدد, کھوج
File:Sheikh akbar.png
ابن عربی دا اک خاکہ

محی الدین ابن عربی (1240ء - 1165ء) دنیائے اسلام دے ممتاز صوفی ، عارف ، محقق ،عالم تے علم دا سمندر سن ۔ اسلامی تصوف چ آپ نوں شیخ اکبر دے ناں نال یاد کیتا جاندا اے ۔ عام خیال ایہہ اے کہ تصوف چ وحدت الوجود دا تصور سب توں پہلے اوہناں نے پیش کیتا ۔ اینہاں دا قول اے کہ باطنی نور خود رہبری کردا اے ۔ کجھ علماء اینہاں دے عقیدے نوں الحاد تے زندقہ نال تعبیر کیتا اے ، پر صوفیا اینہاں نوں شیخ الاکبر آکھدے نیں ۔ اینہاں دیاں لکھیاں کتاباں دی گنتی پنج سو دے نیڑے اے ۔ جنہاں چ فصوص الحکم تے الفتوحات المکیہ(4000 صفحات تے مشتمل9 بوہت مشہور نیں ۔ فتوجات المکیہ 560 باباں (ابواب) تے مشتمل اے تے تصوف دیاں کتاباں چ اسدا درجہ بوہت اچّا اے ۔


جیون دے حالات[لکھو]

ناں تے نسب


ابن عربی دا پورا ناں ، محمد بن علی بن محمد الطائی الحاتمی اے ۔ چڑھدے چ آپ نوں ابن عربی کہندے نیں (قاضی ابوبکر بن العربی توں وکھرا کرن لئی آپ دے ناں نال ال نئیں لائیا جاندا )۔ جدون کہ لہندے چ آپ ابن العربی تے ابن سراقہ دے نان نال پہچانے جاندے نیں ۔


جنم[لکھو]

آپ موجودہ سپین چ مسلم اندلس دے ویلے چ شہر مرسیہ چ 27 رمضان 560ھ مطابق 1165ء نوں اک معزز عرب ٹبر چ پیدا ہوئے ، جہڑا مشہور زمانہ سخی حاتم طائی دے بھائی دی نسل چوں سی ۔ آپ دے والد مرسیہ دے ہسپانوی الاصل حاکم محمد بن سعید مرذنیش دے دربار نال متعلق سن ۔ ابن عربی حالے صرف اٹھ ورہےآں دی سی کہ مرسیہ تے دولت موحدین دے مل مارن پاروں آپ دے ٹبر نوں اوتھوں ہجرت کرنی پئی ۔ کیونکہ اشبیلیہ پہلے ای موحدون دے قبضے چ سی اس لئی آپ دے والد نے لشبونہ (موجودہ پرتگال دے راجگھر لزبن) چ پناہ لئی ۔ پر چھیتی ای اشبیلیہ دے امیر ابو یعقوب یوسف دے دربار چ آپ نوں اک معزز عہدے دی پیش کش ہوئی آپ اپنے ٹبر سمیت اشبیلیہ منتقل ہو گئے ۔ جتھے ابن عربی نے اپنی جوانی دا زمانہ گزارئیا ۔


مڈھلی تعلیم[لکھو]

مڈھلی تعلیم دے مرحلے آپ مرسیہ تے لشبونہ ( لزبن) چ طے کر چکے سن ۔ اشبیلیہ چ آپ نوں اپنے ویلے دے نامور عالماں دے قدماں چ بیہن دی سعادت ملی ۔ مروجہ دینی دنیاوی تعلیم دے حصول دے نال نال آپ دا بوہت سارا ویلا صوفیاء دی خدمت چ لنگھدا سی ۔ تصوف دا سلسلہ آپ دے ٹبر چ قائم سی ۔

ویب سائٹاں[لکھو]