اشوک اعظم
اشوک ہندستان چ جنوبی بہار چ سلطنت مگدھ دے راجے چندر گپت موریا دا پوتا سی تے خاندان دا تیجا راجہ سی ۔ 272 ق م چ گدی تے بیٹھیا تے 232 ق م تک 40 سال حکومت کیتی تے چندر گپت موریہ نالوں وی ودھ شہرت پائی ۔ اسنوں اکثر اشوک اعظم آکھیا جاندا اے ، کیونکہ ایہہ اپنے وقت دا سب توں وڈا تے طاقتور راحہ سی ۔
بدھ مت ول رجوع [لکھو]
جوانی چ اشوک لڑائی دا مرد میدان سی تے کہندا سی کہ کلنگ (اڑیسہ) نوں فتح کرکے اپنی سلطنت چ شامل کرلواں گا ۔ چنانچہ 3 سال لڑیا تے کلنگ نوں فتح کرکے اپنی سلطنت چ شامل کرلئیا ۔ کہندے نے کہ لکھاں ہزاراں لوکاں دا خون ہندا دیکھ کے اشوک دے دل چ رحم آئیا تے اک دم ای طبیعت بالکل بدل گئی تے کہن لگا کہ ہن بدھ دیاں تعلیمات تے چلاں گا تے کدی وی لڑائی نئیں کراں گا ۔ بدھ مت نوں اپنے سارے راج دا مذہب قرار دتا تے اپنا ناں پریاد رشی یا حبیب اللہ رکھ لئیا ۔
اسدا اک پتر بھکشو تے کڑی بھکشنی ہوئے ۔ اس نے دوناں نوں سیلون (سنگلدیپ) بھیجیا کہ اوتھے بدھ مت دی تبلیغ کرن ۔ ہن بدھ مت دی دوجی مجلس نوں ہوئے سوا سو سال توں زیادہ ہوگئے سن ، تے بدھ مت چ کئی قسم دیاں نمایاں تبدیلیاں ہون لگ پیئیاں سن ۔ اینہاں دی تحقیق لئی 242 ق م چ اشوک نے اس مذہب دے اک ہزار عالماں تے بزرگاں دی مجلس منعقد کیتی مراد ایہہ سی کہ بدھ مت دی تعلیمات بعد والیاں بدعتاں تے آمیزشاں توں پاک ہوکے اپنے بانی دی اصلی تعلیم دے مطابق ہوجان ۔ پاٹلی پتر چ ایہہ مجلس منعقد ہوئی ۔بدھ مت دیاں ساریاں حکایتاں تے روایتاں پالی بولی چ لکھ لئیاں گئیاں ۔ 2 ہزار سال توں کجھ اوپر جنوبی ایشیاء چ بدھ مت دے جہڑے وی شاستر جاری نیں اوہ ایسے مجلس دے مرتب کروائے ہوئے نیں ۔ بدھ مت دی تبلیغ لئی اشوک نے کشمیر ، برما ، قندھار ، تبت ، دکن تے سیلون چ بھکشو روانہ کیتے ۔
اشوک نے 14 احکام جاری کیتے تے جابجا پورے ہندستان چ پتھر دیاں لاٹھاں تے کندہ کروائے ، اینہاں چوں اج وی کئی موجود نیں، اک الہ آباد چ تے اک گجرات دے گرنار پربت تے اے ۔
 |
وکیمیڈیا کامنز چ مورتاں: اشوک اعظم |
