جنگ پلاسی

Wikipedia توں
جاو: مدد, کھوج
کلائیو تے میر جعفر دا گٹھ جوڑ


جنگ پلاسی 23 جون 1757ء چ بنگال دے نواب سراج الدولہ تے انگریز جرنیل کلائیو دے وچکار ، کلکتہ توں 70 میل دور دریائے بھاگیرتی دے کنارے ، قاسم بازار دے نیڑے پلاسی دے میدان چ لڑی گئی ۔ انگریز جرنیل رابرٹ کلائیو سارے بنگال تے مل مارنا چاہندا سی ۔ دلی دا بادشاہ پہلے ای اس دی ہتھ چ کٹھ پتلی سی ۔ بنگال تے مل مارن لئی " بیلیک ہول " دا فرضی افسانہ گھڑئیا گئیا تے میر جعفر نال سازش کیتی گئی ۔ میر جعفر ، سراج الدولہ دا نانا نواب علی وردی خان دا بہنوئی سی ۔ اسنوں نوابی دا لالچ دے کے توڑ لئیا گئیا ، اس دے علاوہ اوما چند ناں دا اک سیٹھ نوں وی سازش چ شریک کیتا گئیا ، پر اس نوں 30 لکھ دین دا جہڑا معاہدہ کیتا گئیا اوہ جعلی سی ۔

رابرٹ کلائیو اپنی 3 ہزار فوج نال نواب دے مقابلے چ آئیا ، نواب سراج الدولہ دے کول بقول مورخاں 50 ہزار پیادے ، 18 ہزار سوار تے 55 توپاں سن ، پر فوج دا وڈا حصہ میر جعفر دی کمان ہیٹھ انگریزاں نال مل چکئیا سی ۔ اس لئی نواب جنگ ہار گئیا تے گرفتار ہو گے میر جعفر دے منڈے میرن دے ہتھوں قتل ہوئیا ۔

انگریز مورخاں دا ایہہ دعوی کہ کلائیو نے 3 ہزار سپاہیاں نال نواب دی بے شمار فوج تے فتح پائی ، عقل نوں نئیں لگدا ، کیونجے 70 ہزار دے حصے 3 ہزار دی اک اک بوٹی وی نئیں آندی ۔ اصل چ نواب دی فوج دا اک وڈا حصہ خود اپنے ہتھیں اپنے گھر نوں اگ لا رہئیا سی ۔ تے فیر انگریز مورخاں دا ایہہ کہنا کہ میر جعفر آخر تک کلائیو نال نئیں ملئیا ، بالکل غلط اے ۔ جے ایداں ہندا تے انگریز اس نوں کدے وی نواب نا بناندے ، ایہہ ایسے شخص دی غداری سی جس دی وجہ توں بنگال توں اسلامی حکومت دی خاتمہ ہو گئیا ۔ پر اس تے وی جے سراج الدولہ دا سپہ سالار نا مردا تے نتیجہ کجھ ہور ہندا ۔ اس سپہ سالار نوں ، جہڑا میر جعفر نا ل شریک نئیں سی ، میر جعفر دے بندےآں نے قتل کر دتا سی ، جس نال وفادار فوج وی بدحواس ہوگئی ۔ کلائیو دے صرف ویہہ(20) سپاہیاں دا مارئیا جانا تے پنجاہ(50) دا پھٹر ہونا وی عجوبہ نئیں ، کیونجے توپ خانے پہلے ای خرید لئیا گئیا سی تے توپاں چ پانی پوا دتا گئیا سی ۔


لڑائی دے مگروں کلائیو مرشد آباد آئیا ، جہڑا اس ویلے بنگآل دا راجگھر سی ، دلی دے کٹھ پتلی بادشاہ توں پہلے ای میر جعفر دی تقرری دا فرمان لے لئیا گئیا سی ، چنانچہ اس نوں گدی تے بٹھا دتا گئیا ۔ میر جعفر نوں سارا خزانہ تے ذاتی دولت تے ہیرے موتی گلائیو نوں دینے پئے ، جس چوں ہر انگریز نوں معقول حصہ ملئیا ، صرف کلائیو دے حصے 52 لکھ تے 10 ہزار روپیئے آئے ۔ اس دے علاوہ ایسٹ انڈیا کمپنی نوں 1 کروڑ روپیہ کلکتہ دے نقصان تے تاوان جنگ دے طور تے دتا گئیا ۔

اس دے علاوہ بنگال چ چویہہ(24) پرگنے دا زرخیز علاقہ وی کمپنی نوں دتا گئیا ۔ 1759ء چ شاہ عالم نے اس سارے علاقے دا مالیہ جہڑا 4 لکھ 50 ہزار روپیۓ بندا سی کلائیو نوں بخش دتا تے اینج تقریبا سارا بنگال انگریزاں دے قبضے چ آ گئيا ۔ کجھ چر مگروں انگریزاں نے میر جعفر نوں بالکل بے اختیار کردتا ، پر ایہہ شخص بوت تیز سی ، اس نے اوہ اقدام کرنے شروع کر دتے جنہاں نال انگریزاں دے پنجے ڈھیلے ہونا شروع ہوگئے تے پٹنہ چ 2 سو انگریز قتل کر دتے گئے ۔

انگریزاں نے میر جعفر نوں کدی توں لاہ کے میر قاسم نوں گدی تے بٹھا دتا ۔ میر قاسم انگریزاں توں نفرت کردا سی ، اس نے ہور مسلمان نواباں نوں اکٹھا کر کے بکسر دے مقام تے انگریزاں دا وڈی بہادری نال مقابلہ کیتا ، جس چ 1 ہزار انگریز مارے گئے ، پر سازش تے غداری نے اپنا رنگ دکھائیا ۔ میر قاسم دی فوج چ بھگدڑ مچ گئی تے انگریز فاتح بن کے سارے بنگال تےقابضہوگئے۔