سینٹ ہلینا

Wikipedia توں
جاؤ: پاندھ, کھوج
سینٹ ہلینا دا نشان
سینٹ ہلینا دا محل وقوع

سینٹ ہلینا بحر اوقیانوس چ برطانیہ دا اک جزیرہ اے ، ایہہ علاقہ جزیرہ سینٹ ہلینا ، اسپنشن تے ٹرسٹان ڈی کونہا دے جزیریاں نال رل کے بندا اے ۔


نیپولین سینٹ ہلینا چ
لونگ وڈ ہاؤس سینٹ ہلینا نیپولین نوں قید کرن دی تھاں

سینٹ ہلینا مشہور فرانسیسی فاتح نیپولین بونا پارٹ دے آخری دناں دی جیل دی وجہ توں دنیا بھر چ مشہور اے ۔ نپولین نوں 1815ء چ جلاوطن کر کے سینٹ ہلینا بھیج دتا گئیا سی ۔ جتھے اسدا 1821ء چ انتقال ہوگئیا ۔ نپولین دی قیام گاہ " لانگ ووڈ ہاؤس " تے اس دی آخری آرام گاہ سین ویلی نوں 1858ء چ فرانسیسی حکومت دے حوالے کردتا گئیا سی ۔


تریخ[لکھو]

جزیرے نوں 21 مئی 1502ء چ پرتگیزی جہازراناں نے دریافت کیتا سی تے اسنوں شہنشاہ قسطنطین اول دی والدہ ہلینا دے ناں تے سینٹ ہلینا دا ناں دتا ۔ اس ویلے ایہہ جزیرہ غیر آباد سی ۔ 1600ء تک ایہہ جزیرہ پرتگال ، انگلستان ، فرانس تے ہالینڈ دے جہازراناں چ مقبولیت حاصل کرچکیا سی ، اوہ اسنوں غذا دے حصول لئی استعمال کردے سن ۔ 1645ء توں 1659ء تک ولندیزیاں نے اس تے قبضہ رکھیا ، جس دے بعد ایہہ انگلینڈ دی ایسٹ انڈیا کمپنی دے حوالے کردتا گئیا ، جہڑی اسنوں راس امید توں وطن واپس جان والے جہازاں دے اڈے دے طور تے استعمال کردی سی ۔ 1673ء چ ولندیزیاں نے جزیرے تے دوبارہ قبضہ کرلئیا پر صرف 2 مہینے بعد انگریزی بحریہ نے اینہاں نوں باہر کڈ دتا ۔ 1815ء چ برطانوی حکومت نے نیپولین دی جلاوطنی لئی سینٹ ہلینا دا انتخاب کیتا تے اسنوں اکتوبر دے مہینے چ جزیرے تے لیائیا گئیا ، جتھے مئی 1821ء چ اسدا انتقال ہوگئیا ۔ نپولین دی لاش 1840ء چ فرانس دے حوالے کیتی گئی ۔ ایہہ واحد عرصہ سی جس دے دوران باقاعدہ فوج دے زریعے جزیرے دی حفاظت کیتی گئی تے فرانس ولوں نپولین نوں چھڈاں دیاں کوششاں دے خطرے دے پیش نظر برطانیہ نے قریبی اسپنشن تے ٹرسٹان ڈی کونہا دے جزیریاں تے وی قبضہ کرلئیا ۔

برطانیہ دے جنوبی افریقی مقبوضات تے ہندستان دے طویل بحری سفر دی وجہ توں ایہہ جزیرہ ترقی دیاں منزلاں طے کردا رہیا پر نہر سوئز دی تعمیر دی وجہ توں راس امید دے گرد چکر لا کے ہندستان تے دوجے علاقیاں چ جان والے بحری جہازاں چ کمی دی وجہ توں اسدی اہمیت گھٹ گئی ۔


دوجیاں معلومات[لکھو]

جیمز ٹاؤن سینٹ ہلینا دا صدرمقام

سینٹ ہلینا دی آبادی چند ہزار لوکاں تے مشتمل اے ، جس چ زیادہ تر لوک مغربی تے دکھنی افریقہ ، جزائر برطانیہ تے سکینڈےنیویا نال تعلق رکھدے نیں ۔ حالیہ چند دہائیاں چ لوکاں دی وڈی تعداد برطانیہ تے جزائر فاک لینڈ ہجرت کر گئی ۔ 21 مئی 2002ء چ جزیرے دی ساری آبادی نوں برطانوی شہریت دے دتی گئی ۔ اینہاں تناں جزیریاں دا کل رقبہ 410 مربع کلومیٹر اے تے جزیرہ سینٹ ہلینا دا رقبہ 122 مربع کلو میٹر اے ۔ اس دا صدرمقام جیمز ٹاؤن اے ۔ اپریل 2005ء چ برطانوی حکومت نے سفری سہولتاں آسان بنان لئی جزیرے تے اک ہوائی اڈا بنان دا اعلان کیتا ، جہڑا 2012ء چ مکمل ہون دا امکان اے ، پر کسے وی حتمی تریخ دا اعلان نئیں کیتاگئیا۔