محمد منشا یاد
 | |
|---|---|
| جم | محمد منشا 5 ستمبر 1937 ٹھٹھہ نصرت, فاروق آباد, پنجاب, پاکستان |
| موت | ۱۵ اکتوبر ۲,۰۱۱ (عمر 74 سال) اسلام آباد, پاکستان |
| قلمی ناں | یاد |
| کم کِتہ | لکھاری, ڈرامہ لکھاری |
| قومیت | پاکستانی |
| صنف | فکشن |
| مضمون | ساہت |
| وڈے کم | ٹانواں ٹانواں تارا |
| سوانی | فرحت نسیم اختر |
| ویب سائٹ | |
| www | |
محمد منشا یاد پنجابی تے اردو دا اک نویکلا لکھاری تے ڈرامہ نویس سی ۔ اسنوں 2004ء چ پاکستان سرکار ولوں پرائیڈ آف پرفارمنس دتا گیا ۔ اسنوں ہور کئی دیساں دیاں ساہتی سنگتاں نے وی کئی ایوارڈ دتے ۔
اسدی پہلی نکی کہانی ( شارٹ سٹوری) 1955ء چ سامنے آئی تے اسدیاں کہانیاں دا پہلا مجموعہ 1975ء چ شائع ہویا ۔ اسدیاں اردو تے پنجابی کہانیاں تے لکھتاں کئی ساہتی رسالےآں چ چھپدیاں رہیاں ۔محمد منشا یاد دیاں نکی کہانیاں دے 10 مجموعے شائع ہوئے جنہاں چ اک پنجابی چ سی ، اسدے نال نال اک پنجابی ناول ٹانواں ٹانواں تارا تے کئی ٹیلی ویژن ڈرامے وی منشا یاد دے لکھے ہوئے نیں ۔.[۱]
ذاتی جیون تے تعلیم[سودھو]
محمد منشا یاد 1937ء چ ضلع شیخوپورا چ فاروق آباد توں 18 کلومیٹر دی دوری تے پنڈ ٹھٹھہ نصرت چ جمیا ۔ اسنے پرائمری تک تعلیم پنڈ گجیانہ نو توں پوری کیتی تے میٹرک حافظ آباد توں کیتی تے 1955ء چ رسول کالج چ انجنئرنگ ڈپلومہ چ داخلہ لے لیا ۔ اسنے پنجاب یونیورسٹی توں فاضل اردو دا امتحان 1964ء چ پاس کیتا ، بی - اے دی ڈگری 1965ء چ لئی ، ایم - اے اردو 1967ء چ تے ایم - اے پنجابی 1972ء چ کیتا ۔
اسدا ویاہ 1960ء چ اسدی کزن فرحت نسیم اختر نال لہور چ ہویا ۔ اسدے تن پتر تے اک دھی اے ۔
منشا یاد نے سرکاری نوکری 1958ء چ پی ۔ڈبلیو ۔ڈی چ کیتی تے دو سال تک سب انجنیئر دے طور اتے راولپنڈی تے مری چ کم کیتا ۔1960ء چ اسنے وفاقی راجگڑھ کمیشن ، جہڑا بعد چ راجگڑھ ڈویلپمنٹ اتھارٹی (CDA) [۱] اسلام آباد چ بدلیا ، چ سب انجنیئر دی پوسٹ اتے نوکری شروع کیتی تے بعد چ اس ادارے چ ای اسسٹنٹ انجنیئر ، ایگزیکٹو انجنیئر ، پبلک ریلیشن آفیسر تے چیف کمپلینٹس آفیسر دے عہدےآں اتے کم کردا رہیا تے 1997ء چ ڈپٹی ڈاریکٹر دے طور اتے ریٹائرڈ ہویا ۔
اپنی ریٹائرمنٹ مگروں اوہ اسلام آباد چ اپنی رہائش گاہ افسانہ منزل چ وس رہیا تے اپنا ویلہ ساہت تے ساہتی سرگرمیاں چ لنگھوندا رہیا ۔محمد منشا یاد 15 اکتوبر 2011ء نوں اسلام آباد چ دل دا دورہ پین نال اس دنیا نوں چھڈ گئے ۔[۲]
قلمی ناں[سودھو]
نوجوانی چ اسدی شاعری چ گُھوڑی دلچسپی سی ، کئی قلمی ناواں مگروں اسنے یاد دا قلمی ناں چُنیا۔اسدی نوکری دے کماں نے اسنوں لکھن لکھان لئی گھٹ ویلہ دتا تے ایہ ہولی ہولی شاعری توں دور ہو گیا ۔پر اسنے اپنا قلمی ناں اپنائی رکھیا اس امید چ کہ آخر اسنے مڑ لکھن ول پرتنا اے ۔
کم[سودھو]
نکی کہانیاں[سودھو]
- بند مٹھی میں جگنو
- ماس اور مٹی
- خلا اندر خلا
- وقت سمندر
- وگدا پانی (پنجابی شاہ مکھی تے گرمکھی)
- درخت آدمی
- دور کی آواز
- تماشہ
- خواب سرائے
- اک کنکر ٹھہرے پانی میں
ناول[سودھو]
- راہیں (اردو ناول)
- ٹانواں ٹانواں تارا (پنجابی ناول)
ٹیلی ویژن لئی لکھتاں[سودھو]
وارث مگروں ڈرامہ راہیں پی ٹی وی لہور سینٹر توں 1999ء چ چلیا ، جہڑا بوہت ودھیا سی ۔ اس ڈرامے دی نیہہ منشا یاد دے پنجابی ناول ٹانواں ٹانواں تارا اتے سی ۔ اس ڈرامے دا فوکس شہراں تے پنڈاں چ وسن آلے لوکاں دا تعلیم ، رہتل تے انصاف اتے مختلف سماجی مسئلےآں اتے سی ۔
ساہتی سرگرمیاں[سودھو]
1972ء چ منشا یاد نے حلقہ ارباب ذوق, اسلام آباد, دی نیہہ رکھی ، جہڑا راجگڑھ شہر دی پہلی ساہتی تنظیم سی ۔[۱]
اسلام آباد چ اسنے کئی ہور ساہتی ادبی تنظیماں دی نیہہ رکھی جداں لکھنے والوں کی انجمن ، رابطہ بزم کتاب تے فکشن فورم جسنال نویں بنے شہر دی ساہتی تے رہتلی حثیت چ وادھا ہویا ۔