نیدرلینڈز

آزاد انسائیکلوپیڈیا، وکیپیڈیا توں
نیدرلینڈز
Netherlands
Koninkrijk der Nederlanden
چنڈا
نشان
راجگڑھ: ایمسٹرڈیم
تھاں: 41,848 مربع کلومیٹر
لوک گنتی: 16,751,323
کرنسی: یورو
بولی: ڈچ

نیدرلینڈز (ڈچ:نیدرلانت) اک قنونی بادشائی اے تے نیدرلینڈی شاہی دے آپ راج کرنوالے 4 انگاں وچوں اک اے۔ ایہ اتلے لیندے یورپ چ اک دیس اے جیدے وچ رلے تن نکے جزیرے کریبین وچ نیں۔ یورپی نیدرلینڈز اک نکا تے لوک سنگھنا دیس اے جیدے اتر تے لیندے ول اتری سمندر، دکھن چ بیلجیم تے چڑھدے پاسے جرمنی اے۔ ایہدی سمندری ولگن برطانیہ، جرمنی تے بیلجیم نال رلدی اے۔[۱] ایہ پارلیمانی لوک راج اے۔ ایدا راجگڑھ ایمسٹرڈیم اے[۲] تے سرکار گڑھ تے پارلیمنٹ تھاں ہیگ چ اے۔[۳] روٹرڈیم دا سمندری اڈہ یورپ دا سب توں وڈا تے تے ایس مگروں آنوالے 3 اڈیاں نوں رلا کے وی وڈا اے۔[۴] نیدرلینڈز نوں ہالینڈ وی کیا جاندا اے پر اتلاہالینڈ تے تھلواں ہالینڈ ایہدے دو صوبے نیں۔

نیدرلینڈز دا 26٪ تھاں تے 21 ٪ لوک سمندر دی پدھر توں تھلے وسدے نیں تے ایدا 50٪ تھاں سمندر دی پدھر توں اک میٹر اچا اے۔ ایسے لئی ایہدا ناں نیدرلینڈز یعنی نیواں دیس اے۔ ایہدے دوجے ناں ہالینڈ دا مطلب وی نیواں اے۔ ایہ اک پدھرا دیس اے تے تھلے کج اجے تھاں نیں۔ ایدے چوں رہائن میوز تے شیلڈٹ دریا وگدے نیں۔ نیدرلینڈز اک لوک سنکھنا دیس اے جتھے اک مربع کلومیٹر وچ 406 لوک وسدے نیں۔ بنگلہ دیش، دکھنی کوریا تے تائیوان ای ایس توں چوکھے سنگھنے نیں۔ فیر وی امریکا مگروں ایہ دنیا وچ کھان پین تے وائی بیجی دیاں شیواں بدیس پیجن وچ دنیا وچ دوجے نمبر تے اے۔[۵][۶]

نیدرلیندز اوناں پہلیاں دیساں چوں اے جتھے چنی ہوئی پارلیمنٹ بنی۔ نیدرلینڈز نیٹو، یورپی یونین تے بینیلکس دا موڈی تے سنگی دیس اے۔ ایتھے جگت نیاؤں عدالت وی اے۔ نیدرلینڈز نوں 2011 چ دنیا دا سب توں خوش دیس منیا گیا۔

تریخ[سودھو]

جتھے ہن نیدرلینڈز اے اوتھے انسان پچھلے 370,000 وریاں توں رہ ریا اے تے ایہدا ثبوت 2010 وچ ملیا جدوں ووردن وچ پتھر دے اوزار لبھے۔ 2009 وچ 40،000 ورے پرانی نینڈرتھل کھوپڑی دا اک ٹوٹا زی لینڈ دے سمندری کنڈے توں لبیا۔ آخری برفانی ویلے ایتھے ٹنڈرا دا محول سی تے ایتھے شکاری پھردے سن۔ پیسی کینو، دنیا دی سب توں پرانی کشتی جیہڑی 8000 م پ پہلے بنی سی نیدرلینڈز وجون لبھی اے۔ ایہ ہن اسن دے ڈرنٹ میوزم وچ پئی اے۔

وائی بیجی 5000 م پ دے نیڑے ایتھے آئی تے اوہدے نال پانڈے بنان دا کم وی آیا۔ ایہ آنوالے لکدا اے وشکارلے یورپ توں آے سن۔ 4000 توں 4300 م پ ویلے دے دوالے ٹھیک ول نال وائی بیجی دا مک ٹر پیا۔ 2000 م پ توں لے کے 800 م پ تک دے ویلے وج ایتھے کانسے دا ویلہ ٹریا۔ لویا ویلہ ایتھے دے واسیاں لئی چنگا ویلہ لیاندا اے جے ایتھے ہر تھاں تے لویا ملدا سی۔ کواڑے، چاقو، تلواراں، پناں بنائیاں جاندیان سن۔ اوس وج 500 م پ دی وڈی قبر ملی اے جتھے ہور چیزان نال اک تلوار وی لبھی اے جیدے تے سونا وی لگیا ہویا اے۔ رہائن دے اتلے پاسے جرمن قبیلیاں وسدے سن تے تھلے ول سیلٹ۔


جرمن لوک سکینڈینیویا، شلسوگ ہولسٹائن تے ہمبرگ والے تھاں دے واسی سن۔ اوتھوں اوہ 8ویں صدی م پ وچ نیدرلینڈز تک پھیلے ہوۓ سن۔ ایہو ای فیر فریزین تے سیکسن بندے نیں۔

57 توں 53 م پ دے وشکار رومی فوج نیدرلینڈز تے مل ماردی اے تے ایتھے اوہنان دا راج 450 ورے تک ریندا اے تے ایس دیس نوں اپنے رنگ وج کوڑا رنکدا اے۔ 12 تک دریاۓ رہائن رومیاں دا اتلا بارڈر بن جاندا اے۔ دریاۓ رہاغن توں بتے دے قبیلے رومی راج توں باہر سن۔ رومیاں نے نیدرلیڈز وج نکے قلعے تے نگریاں وسایاں۔ بٹاوی رومی ویلے وچ نیدرلینڈز وج وسنوالے سب توں مشہور جرمن لوک سن۔ ایہناں نوں پرانے ڈج منیا جاندا اے جیویں ٹیوٹن جرمناں لئی تے گال فرنج لئی۔ 69 وچ بٹاوی جرمناں نیں رومیاں دے برحلاف ہتھیار چک لۓ پر اوہنان نوں دبا دتا گیا۔ 17ویں تے 18ویں صدی دے ڈچ لکھاریاں نیں ایہناں ازادی پسند تے ازاد بٹاویاں نال سپین نال ازادی دی لڑائی لڑدیاں ہوویاں اپنے آپ نوں اوہناں نال رلایا۔ ایس سوج نے بٹاویاں نوں ڈچاں دا پرکھ بنایا تے ایہ ناں ویلے ناں کئی واری آیا۔ 1619 وچ جکارتا دا ناں بٹاویہ رکھیا گیا تے 1795 وچ بنن والا ڈچ لوکراج فرنچ انقلاب دی لہر باہجوں بٹاوی لوکراج اخوایا۔ ویلے نال سیلی فرینک نیدرلینڈز دے وکھالے تے سامنے آندے نیں۔

محول ودھیا ہون نال چڑھدے پاسے ولوں اینگل، جیوٹ تے سیکسن قبیلے اتلے نیدرلینڈز ول اندے نیں۔ ایہنوں چوں کئی ایتھے نہیں ٹکدے تے سمندر پار کرکے برطانیہ جاندے نیں تے اوتھے اینگلو سیکسن اخواندے نیں۔ اتلے نیدرلینڈز دے ایہ نویں وسنیک فریزین اخواندے نیں حالانکہ ایہناں دا پرانے فیزین نال کوئی ساک نہیں سی۔ ایہ اتلے نیدرلینڈز دے نویں وسنیک اجکل دے فریزین دے پرکھ نیں۔ (پراے فریزین تے اینگلو سیکسن قبیلے آپس وچ رلدے سن تے ایس باہجوں اوہناں دیاں بولیاں، پرانی فریزین پے پرانی انگریزی آپس وج رلدیاں نیں۔) فریزی قبیلیاں دا تھاں وددا ہویا پورے اتلے ندرلینڈز تے لیندے ول تک پھیلے سن تے ایہ دیس فریزیا اخواندا سی۔ 7ویں تے 8ویں صدی دے فرینک تریخ لکھاری ایس نوں فریزیاں دی شاہی لکھدے سن تے ایہ اتلے جرمنی دے سمندری کنڈے توں لے کے نیدرلینڈز دیاں سمندری کنڈے والے صوبیاں تک پھیلے سن۔ اوس ویلے دکھنی اتر سمندر دی بولی فریزی سی۔ اترخت ایس فریزی شاہی دا گڑھ سی۔

رومی سلطنت دے مکن تے فرینک اگے ودھدے نیں کلوس فرینک بادشاہ نے 490 دے دوالے دکھنی نیدرلینڈز تے مل ماریا۔ پرانی فرینک بولی پرانی ڈچ وچ نویں صدی تک پلٹدی اے۔ ڈچ تے فرنچ باؤنڈری جیہڑی اوس ویلے بندی اے تھوڑ ے جۓ فرق نال اج تک ہے۔ 19ویں صدی دے انت تے ایہ سوچ اگڑی جے ڈچ لوک فریزین سیکسن تے فرینکاں دے نیانے نیں پر 1945 تک ایس سوج نوں چھڈ دتا گیا۔

ڈچ لوک رومی ویلے وچ سائی بندے نیں۔ کلوس دے سآئی ہون تے فرینک سائی ہوندے نیں نے تے ویلے نال ریندا نیدرلینڈز سائی ہوجاندا اے۔

8ویں صدی وچ فریزی لوکاں دا رپھڑ تھلیون آنوالے فرینکاں نال ودھدا اے تے لڑائی تے مکدا اے جیدے وچ 734 نوں بودون دی لڑائی وچ فریزی فوج نوں ہار ہوندی اے تے فریزیا فرینک سلطنت وج رلا لیا جاندا اے۔ نیدرلینڈز ہن شارلمین دی سلطنت دا اک انگ سی۔ 9ویں تے 10ویں صدی وچ وائکنگ نیدرلینڈز دے سمندری کنڈیاں تے وسدے نگراں تے ہلے بولدے نیں تے لٹمار لمے ویلے تک چلدی اے۔ 10ویں تے 11ویں صدی وچ ایتھے مقدس جرمن سلطنت دا وی آن جان ریا تے نجمیگان اوہناں دا گڑھ سی۔ 862 توں ہالینڈ دا رجواڑہ بندا اے تے ویلے نال طاقت، بپار تے تھاں وچ ودھدا اے 1083 وچ پہلی واری ناں ہالینڈ ورتن وچ آیا۔ 1000 دے نیڑے وائی بیجی وچ وادا لوکاں وچ خوشحالی لیایا۔ 1100 تک لیندے نیدرلینڈز دے ویہلے تھاں نوں صاف کرکے وسایا گیا۔ فالتو فصل نال بپار، لوک گنتی وددی اے تے بپاریاں دیاں سنگتاں بندیاں نیں۔ صلیبی لڑائیاں نے وی ایتھے دے کم کاج تے بپار نوں وادھے تے لایا۔

1433 وچ برگنڈی دا ڈیوک نیدرلینڈز نوں نال رلاندا اے۔ ایہدا بپار ودھدا اے ڈچ سمندری جہاز ہانزا جہازاں نوں لڑائی وج ہراندے نیں۔ ایتھے دا ای چارلس پنجواں فیر یورپ دے کئی راجاں دا بادشاہ بندا اے تے نیدرلینڈ دی قسمت سپین نال جڑدی اے۔

1519 توں 1581 تک نیدرلینڈز سپین نال جڑیا ریا۔ 1568 نوں ایہدی 80 سال تک سپین توں ازادی دے لڑائی چلی۔ 1579 وچ اتلے صوبے یوترخت جٹ بناندے نیں جیدے وچ او ہسپانوی فوج دے خلاف لڑن دا وعدہ کردے نیں۔ ایہ جٹ اجدے نیدرلینڈز دا موڈھی سمجھیا جاندا اے۔ برطانیہ نیدرلینڈز دی ہتھ ونڈائی نوں اندا اے۔ 1648 وچ سپین نال لڑائی مکدی اے۔ 1581 وچ ڈچ لوک راج دا مڈھ پیندا اے تے ایہ لوک راج اپنے بپار دے زور تے دوجے دور دے تھانواں تے مل مار کے اک ڈچ سلطنت دا مڈھ رکھدی اے۔ ایہ ڈچ سلطنت امریکہ افریقہ تے ایشیاہ وج پھیلی ہوئی سی۔ ڈچ سنہری ویلہ وج نیدریلنڈز دے بپاری اڈے ساری زمین تے سن۔ ایس ویلے وچ نیدرلیندز سائینس آرٹس تے بپار وچ ساری دنیا وج اگے سی۔ 1650 وچ ڈچاں کول 16000 بپاری جہاز سن۔ 17ویں صدی وچ ڈچ لوک گنتی 15 لکھ توں 20 لکھ تک اپڑدی اے۔ کئی بپاری لکھاری نیدرلینڈز نوں پہلا بپاری دیس مندے نیں ایمسٹرڈیم یورپدا سب توں امیر شہر سی تے ایتھے ای سٹاک ایکسچینج دا مڈھ پیا۔ 18ویں صدی دے انت تے انگلینڈ نال مقابلے باہجوں تے ڈچ سماج دے انگاں لوکراجی تے شاہی دے وشکار کھیچل وچ ڈچ بپار تے سماج تھلے آندا اے۔


1795 تک ایہ ڈچ لوک راج سی۔ 1795 توں 1814 تک ایہ فرانس دے تھلے لگیا ریا۔ 16 مارچ 1815 توں ولیم پہلا ڈچ گدی تے بیٹھدا اے۔ 1815 نوں ویانا کانگرس تھلویں دیس رلا کے اک وڈے نیدرلینڈز دی نیو رکھدی اے۔ تاں جے فرانس دے بارڈر تے اک تکڑا دیس روے۔ پراتر تے دکھن وچ رہتلی پینڈے ہون باہجوں 1830 وج تھلواں انگ وکھ ہوکے بیلجیم بندا اے تے لکسمبرگ 1890 نوں وکھ ہوجاندا اے۔ کیپ کالونی اک وڈی ڈچ وسائی تھاں سی دکھنی افریقہ وچ 1652 نوں پر ایہدے تے انگریز 1788 نوں مل ماردے نیں۔ ڈچ ایس انڈیا تے سورینام وڈیاں ڈج کلونیاں سن ایہ پہلے بپاری کمپنیاں چلاندیاں سن تے 19ویں صدی وچ بپار دے حلات ماڑے ہون تے ایہ ڈچ سرکار تھلے آندے نیں۔ ہوا دے زور نوں ورتن تے نہراں دے پربندھ باہجوں ایتھے انڈسٹریل وادھا نالے دے دیساں توں ّپچھے سی۔ پہلی وڈ؛ لڑائی وچ نیدرلینڈز اک نیوٹرل دیس سی۔ پرانے شلائفن پلان وج لڑائی ہوجان تے نیدرلیندو تے وی مل مارنا سی پر جرمن ایس تے نہیں چلدے تے نیدرلینڈز نیوٹرل ای ریندا اے جیدا جرمین نوں وی فیدا ہوندا اے جے لرکئی وج اوہدا باہرلا بپاڑ نیدرلینڈ ہتھیں ای ہوریا سی۔ دوجی وڈی لڑائی وچ وی نیدرلینڈز نیوٹرل سی پر اوہدے تے 10 مئی 1940 نوں جرمن فوج نے ہلہ بولیا تے اسانی نال ایہدے تے مل مارلیا۔ 1945 تک ایدے تے جرمنی نے مل ماری رکھیا۔ ڈاں نے لندن وج اپنی بن باسی سرکار بنائی رکھی۔لڑائی وج اک لکھ دے نیڑے ڈچ یہودی وی مارے گۓ۔ جرمنی دی ہار مگروں نیدرلینڈز نے اپنے آپ نوں ٹھیک کیتا تے ہن تک نال دے دیساں نال رل کے اک سکھی تے خوش جیون لنگاریا اے۔

جغرافیہ[سودھو]

نیدرلینڈز تن وڈے یورپی دریاواں رائن، میوز (دریا) تے شیلڈ دے منہ تے وسدا اے۔ یورپی نیدرلینڈز دا چوکھا سارا تھاں سمندری پدھر تون تھلے اے تے ایہ پہلے سمندر سی جیدے تے پہتے وٹاں بنا کے تے پرائی کرکے سمندر تے مل ماریا گیا اے۔ نیدرلینڈز اک کنا دیس اے تے لوک نکراں وج وسدے نیں۔

دیس وکھالہ

نیدرلینڈز دے دیس وکھالے نوں دو پاسیاں وج ونڈیا جاسکدا اے: اتر تے لیندے ول نیویں تے پدھرے تھاں تے چڑھدے تے دکھن ول اچے تھان تے نیوں پہاڑ نیں۔ پہلا پاسہ سمندر توں کھوۓ گۓ تھاں نیں تے ایہ پولڈر تے سمندری ڈیلٹے نیں۔ ایہ سمندری پدھر توں اک میٹر (3.3 ft) توں وی تھلے اے تے سمندری کنداں تے ٹبے نیدرلینڈز نوں سمندری طوفاناں توں بجاندے نیں تے بند تے ڈکے ایہنوں دریائی ہڑاں توں ایہدی راکھی کردے نیں۔ دوجا پاسہ وی پدھرا ای اے بس تھلے جاکے ارڈین دے پہاڑاں دے پیراں وچ کج اچی تھاں اے۔ ایتھی ای فالزربرگ اے 322.7 میٹر(1,059 فٹ) نال نیدرلینڈز دی سب توں اجی تھاں۔

نیدرلینڈز 41,526 مربع کلومیٹر (16,033 مربع میل) جیدے وج سکی تھاں 33,883 مربع کلومیٹر (13,082 مربع میل) اے تے پانی 7,643 مربع کلومیٹر (2,951 مربع میل) تھاں تے اے۔ نیدرلینڈز دا بارڈر 1,027 کلومیٹر (638 میل) اے جیدے وچ 450 کلومیٹر (280 میل) بیلجیم نال تے 577 کلومیٹر (359 میل) جرمنی نال رلدا اے۔ نیدر لینڈز دا سمندری کنڈا 451 کلومیٹر (280 میل) اے۔ نیورکرک آن ڈن اجسل 6.76 میٹر (22.2 فٹ ) دی ڈونگائی نال سب توں نیوین تھاں اے۔

نیدرلینڈز دا محول گلا گرم تے سمندری اے۔ ایہدیاں گرمیاں ٹھنڈیاں تے پالا گزارے دا۔ 28٪ تھاں تے وائی بیجی ہوندی اے تے 25٪ تے اجڑ چردے نیں۔ 8% تے جنگل نیں تے ریندے تے گھر کارخانے تے سڑکاں نیں۔

سمندر تے دریا ولوں ہڑ دا آنا اک ہر ویلے دا رپھڑ اے۔ محول گند وی اک وڈی سرپیڑ اے۔

سیاست[سودھو]

نیدرلینڈز 1815 توں قنونی شاہی اے تے 1848 توں پارلیمانی لوکراج اے۔ ڈچ سرکار وچ وکھری سوچ دے لوکاں نوں نال رلان دا گوڑی تانگ دسدی اے۔ 2010 وچ ایکانومسٹ نے ایہنوں دنیا دی دا دسواں سب توں وڈا لوکراج گنیا اے۔ ملکہ بیٹرکس دیس دی آگو تے نشان اے۔ 30 اپریل 2013 نوں اوہنے راج گدی چھوڑں دا کیا تے اودوں اوہدی تھاں ولیم الیگزنڈر لویگا۔ قنون بادشاہ نوں تھوڑی طاقت دیندا اے۔ بادشاہ نویں کابینہ بنن ویلے اپنا آپ دسدا اے جتھے اوہ سیاسی پارٹیاں دے وشکار اک پنچیتی دا کم کردا اے۔ ایہدے نال بادشاہ دا ایہوی حق بندا اے جے اوہدے کولوں صلآ لئی جاۓ۔ بادشاہ اگر تکڑا تے سیانا ہووے تے جو حق اوہنوں قنون نے دتے نیں اوہ اوس توں ود وی کم کرسکدا اے۔

سیاسی طاقت ڈچ کابینہ کول اے جیدے وچ 13 توں 16 وزیر ہوندے نیں۔ ڈچ سرکار دا آگو ڈچ وزیراعظم ہوندا اے۔ وزیرااعظم پارلیمنٹ وچ سب توں وڈی پارٹی یا پارٹیاں دی سنگت دا آگو ہوندا اے۔ ایس ویلے مارک رتے نیدرلینڈز دا وزیراعظم اے۔

ڈچ سرکار دو انگاں نال بنی ڈچ پارلیمنٹ اسٹیٹس جنرل اگے جواب دھ اے۔ اسٹیٹس جنرل دا تھلواں انگ 150 سنگیاں نال رل کے بندا اے جنہان نوں سدھے ووٹاں نال 4 سال لئی چنیا جاندا اے۔ صوبائی اسمبلیاں 4 سال لئی لوکاں دے سدے ووٹان نال چنیا جاندیاں نیں۔ صوبائی اسمبلیاں دے سنگی اے ڈچ پارلیمنٹ دے اتلے انگ ڈچ سینیٹ دے 75 سنگیاں نوں چندے نیں۔ ڈچ لوکاں دی صدیاں توں اپنے کھلے محول تے وکھریاں سوچاں نوں سہن تے نال رہن دی مانتا اے۔ نیدرلینڈز دیاں سیاسی پارٹیاں وچ پیپلز پارٹی فار فریڈم اینڈ ڈیموکریسی، لیبر پارٹی، پارٹی فار فریڈم، سوشلسٹ پارٹی وڈیاں پارٹیاں نیں۔

ونڈ[سودھو]

نیدرلینڈز 12 صوبیاں چ ونڈیا ہویا اے۔ ہر صوبے دا آگو صوبیدار ہوندا اے تے ایہ صوبے اگے 430 میونسپلٹیاں وج ونڈے ہوۓ نیں۔ ڈج صوبیاں دے ناں ایہ نیں: ڈرینتھ · فلیولینڈ · گیلڈر لینڈ · اتلاہالینڈ · یوترخت · لمبرگ · اتلابرابنٹ · اورآءیسل · گروننگن · زی لینڈ · فریزلینڈ · تھلواں ہالینڈ


بارلے ساک[سودھو]

دوجے دیساں نال ساک بنان وچ نیدرلینڈو نیوٹرل ریا اے۔ دوجی وڈی لڑائی مگروں ایہنے کئی وڈیاں سنگتاں جیویں یونائیٹڈ نیشنز، یورپی یونین، نیٹو نیں وج رلتی کیتی۔ ڈچ ایکانومی اک مارکیٹ ایکانومی اے تے کھلی ڈلی اے۔ پرانے دیس جنہاں تے ایہدا کدے راج ریا ہجے وی اوہناں نال ساک نیں۔

پڑھائی[سودھو]

نیدرلینڈز وچ 4 توں 16 سال دے نیانیاں لئی پڑھائی لازمی اے۔ 16 توں 18 لئی وی کج لازمی اے۔ لائڈن یونیورسٹی دنیا دیاں سو ودیا یونیورسٹیاں وج گنی جاندی اے۔ 19 ڈچاں نیں نوبل انعام جتیا اے۔

بولی[سودھو]

ڈچ سرکاری بولی اے جیہنوں دیس دے جوکھے لوک سمجھدے نیں، لیندی فریزین وی سرکاری بولی ہے تے ایہ اک صوبے وچ بولی جاندی اے۔ ایہدے نال ہور وی نکیاں پڑ بولیاں نیں۔ ایتھے بدیسی بولیاں سکھن دا پرانا رواج اے۔ 70% لوک بول چال دی انگریزی جاندے نیں, 55– 59% جرمن تے 19٪ دے نیڑے فرنچ۔ سکولاں وچ بدیسی بولیاں سکھانا لازمی اے۔


لوک[سودھو]

نیدرلینڈز دی لوک گنتی 31 جنوری 2013 نوں 16,778,806 سی۔ ایہ یورپ دا 10 وڈا دے دنیا دا 61واں وڈا لوکاں دی کنتی نال دیس اے۔ 1900 وچ نیدرلیندز دی لوک گنتی 5.1 ملین سی 1950 نوں ایہ 10.0 ملین لوک سن تے 2000 نوں ایہ 15.9 ملین ہوگۓ۔ پر ویلے نال ایہ لوک گنتی ودھن دی دوڑ ہولی ہوگئی اے۔ 2011 دے اک حساب وچ ایتھے ہر سوانی دے 1.82 نیانے ہوندے نیں۔ ایہ کئی یورپی دیساں نالوں ودھ اے پر دیس لوک گنتی نوں اک پدھر تے رکھن لئی تھوری اے جیہڑی کہ 1۔2 ہونی چاہیدی اے۔ 2012 دے حساب باہجوں کڑیاں ل‏ئی جیون اس 83.08 ورے اے تے منڈیاں لئی جیون آس 78.84 ورے اے۔ چوکھے لوک نسل ولوں ڈچ نیں۔ اک حساب وچ 80.9% ڈچ, 2.4% انڈونیشی, 2.4% جرمن, 2.2% ترک, 2.0% سورینامی, 1.9% مراکشی, 0.8% انٹلین تے اروبان, تے 7.4% ہور. ڈج لوکاں نوں دنیا وچ سب توں لماں گنیا گیا اے۔ اک جنے دااوسط قد 1.81 میٹر(5 فٹ 11 انچ) تے سوانی لئی 1.67 میٹر (5 فٹ 6 انچ) اے۔

ڈچ لوک دنیا دے کئی دیساں وچ وکھرے نیں۔ ایہ آسٹریلیا، کینیڈا، دکھنی افریقہ، امریکہ تے ہور کئی دیسان وج نیں۔ 5 ملین امریکیاں نے اپنے پرکھ نیدرلینڈو وچ دسے نیں تے دکھنی افریقہ دے 30 لکھ افریکان اپنا ساک ڈجاں نال جوڑدے نیں۔ 2010 وج 1.8 ملین بدیسی جمے لوک نیدرلینڈو وج وس رۓ سن تے اوہ نیدرلینڈز دی لوک گنتی دا 11.1% بندے نیں۔ نیدرلینڈز دنیا وچ کنے دیساں وچون 30ویں نمبر تے اے جتھے اک مربع کلومیٹر وچ 395 لوک وسدے نیں۔

ایمسٹرڈم 798,164 لوک گنتی نال سب توں وڈا تے 615,752 لوکاں نال ڑوٹرڈیم دوجا وڈا شہر اے۔

مذہب[سودھو]

نیدرلینڈز دنیا دا سب توں وڈا سیکولر دیس اے۔ ایتھے 20% دے نیڑے لوک گرجے جاندے نیں تے

رومن کیتھولک، پروٹسٹنٹ، مسلمان 5٪ (850000)، بدھسٹ، ہندو، سکھ، یہودی (45000)۔

رہتل[سودھو]

جان ورمیر، ونسنٹ فان گوگ

میوزیم[سودھو]

ہرمیٹیج ایمسٹرڈیم، فان گوگ میوزیم، رائیکس میوزیم ایمسٹرڈیم، ماؤرتسہاؤس

اتہ پتہ[سودھو]

  1. Lua error in ماڈیول:Citation/CS1/ar at line 3440: attempt to call field 'set_selected_modules' (a nil value).
  2. Lua error in ماڈیول:Citation/CS1/ar at line 3440: attempt to call field 'set_selected_modules' (a nil value).
  3. Lua error in ماڈیول:Citation/CS1/ar at line 3440: attempt to call field 'set_selected_modules' (a nil value).
  4. سانچہ:Cite press release
  5. Netherlands: Agricultural exports top 80 billion Euros
  6. Lua error in ماڈیول:Citation/CS1/ar at line 3440: attempt to call field 'set_selected_modules' (a nil value).