یاسر عرفات

Wikipedia توں
جاؤ: پاندھ, کھوج
یاسر عرفات دا پورٹریٹ

یاسر عرفات (24 اگست 1929ء توں 10 نومبر 2004ء) فلسطینی حریت پسند گروپ پی ایل او دا سربراہ تے فلسطینی صدر سی ۔ یاسر عرفات دے مطابق اوہ یروشلم(بیت المقدس) چ جمئیا پر کجھ اطلاعاں موجب اوہ مصر دے شہر کیرو چ جمئیا ۔ عرفات دے سارے بھین بھائی کیرو چ ای رہندے رہے تے اوتھے ای مرے ۔ یاسر عرفات نے کیرو یونیورسٹی توں انجنئرنگ دی تعلیم حاصل کیتی ،۔ اوہناں نے اپنی جدوجہد دا آغاز 1956ء چ فتح تحریک شروع کر کے کیتا ۔ جس دے بعد اسنے 1966ء چ پی ایل او دی بھاگ دوڑ سمبھالی ۔ یاسر عرفات نے اپنی جوانی فلسطین دی آزادی لئی جدوجہد کردے ہوئے گزاری تے ویاہ جیون دے آخری حصے چ سوہا ناں دی زنانی نال کیتا ۔ یاسر عرفات دی اکلوتی اولاد اسدی دھی اے جہڑی 1996ء چ فرانس چ جمی تے ہن اپنی ماں نال فرانس چ رہندی اے ۔

یاسر عرفات دا 1940ہ دی دہائی دا اک جوانی دا پورٹریٹ

عرفات نے 1974ء چ اقوام متحدہ دی جنرل اسمبلی چ چھاپہ مار دی وردی چ تریخی خطاب کیتا ۔ اسنے سارا جیون خطرےآں نال کھیڈدے ہوئے لنگھائیا تے جدوں 1982ء چ اسرائیل نے بیروت تے حملہ کیتا اوہ اوس ویلے بیروت چ موجود سی ۔ اسرائیل دا کہنا اے کہ اسنے بیروت چ روس دے سفارت خانے چ لک کے جان بچآئی سی ۔ یاسر عرفات نے اپنی جدوجہد دے دوران کویت ، تیونس ، لبنان دے علاوہ کئی ملکاں چ قیام کیتا ۔ اس تے کئی قاتلانہ حملے وی ہوئے ۔ اسرائیل نے تیونس چ پی ایل او دے ہیڈکواٹر تے حملہ کیتا پر یاسر عرفات اس حملے چ بچ گئیا ۔

اردن دی حکومت نے 1986ء چ راجگھر عمان ج اسدے دفتراں نوں بند کر دتا ۔ 1988ء چ امریکہ نے فلسطینی رہنما نوں اقوام متحدہ دی جنرل اسمبلی نال خطاب کرن توں روکن لئی اسنوں امریکہ دا ویزہ دین توں انکار کر دتا بعد چ اسنے جنیوا چ اقوام متحدہ دی جنرل اسمبلی نال خطاب کیتا ۔

عرفات دکھنی لبنان چ اک فلسطینی مہاجر کیمپ چ ،1977ء

یاسر عرفات نے 1988ء چ امریکی یہودیاں دے نال اک مشترکہ بیان چ اسرائیل دے وجود نوں منن دا اعلان کیتا ۔ 1990ء دی دہائی چ یاسر عرفات نوں امن دے کئی انعاماں نال نوازئیا گئیا ۔ اسنوں اسرائیلی وزیراعظم رابن اسحاق تے وزیر خارجہ شمعون پیریز دے نال مشترکہ امن دا نوبل انعام دتا گئیا ۔ دکھنی افریقہ دے رہنما نیلسن منڈیلا نے وی فلسطینی رہنما نوں کیپ ہوپ انعام دتا ۔

عرفات 2001ء چ عالمی اقتصادی فورم چ خطاب کردے ہوئے

40 ورہےآں توں ودھ جلاوطنی دے مگروں 1994ء چ اوہ فلسطین واپس پرت آئیا ۔ اسنے اسرائیل دے نال اک امن سمجھوتہ کیتا جس دے تحت فلسطین نیشنل اتھارٹی قائم ہوئی ، بعد چ یاسر عرفات نے دو سال رام اللہ چ محصور زندگی گزاری پر باوجود اسرائیلی حملےآں دے اسنوں چھڈن تے کدے وی تیار نئیں ہوئے ۔

رام اللہ چ عرفات دا عارضی مقبرہ

اس دا پیرس دے نیڑے اک ہسپتال چ انتقال ہوئیا ۔ کجھ لوکاں دے مطابق اسنوں زہر دتا گئیا سی تے ہسپتال دی رپورٹ وی اسدے ٹبر نوں نئیں دتی گئی ۔ یاسر عرفات نوں غزہ چ اسدے کمپاؤنڈ دے نیڑے دفن کیتا ئیا ، تے اسدا نماز جنازہ مصر چ پڑھائیا گئیا ، جس چ دنیا دے بوہت سارے سربراہان مملکت نے شرکتکیتی۔