احمد پورلمہ

وکیپیڈیا توں
جاؤ: پاندھ, کھوج

احمد پورلمہ

لمہ دا مطلب سرائیکی وچ دور، لہندے پاسے دا علاقہ اے۔ ایہہ قصبہ شہر صادق آباد توں ۹ کلومیٹر دور لہندے ال موجود اے۔ احمد پور شرقیہ توں وکھ ایہدا ناں پچھان پاروں لمہ رکھیا گیا۔ ایہہ اک قدیم قصبہ اے جیہڑاعباسیاں نیں سندھ توں آن والے دشمناں تو بچن لٔی اک قلعہ داروپ رکھدا سی۔اس قلعے دا ڈگدا ڈھیندا روپ ہالی تیکر موجود اے۔ تاریخ وچ ذکر نیٔیں ملدا کہ کویٔ جنگ ایتھے ہویٔ ہووے یا کلہوڑیا ں دی فوج نے حملہ کیتا ہووے۔ سترھویں صدی دے برطانوی تے اطالوی مسافراں دے چھپے مضموناں وچ ایس شہر دا تھوڑا جہیا غیر اہم ذکر ملدا اے۔ ایہہ شہر نواب صادق دے دور وچ تحصیل دا درجہ رکھدا سی پر محصول وچ کمی تے انگریز دور وچ ریلوے لا ین تو دور ہون پاروں ایہدا درجہ گھٹ کے سب تحصیل ہویا تے فیر اوہ وی مک گیا۔ ہن ایہہ شہر فتح پور سیکری وانگوں اچیاں، ماڑیاں، رنگین دروازیاں، لکڑی دیاں باریاں، مندراں دا اجڑدا نشان بن چکیا اے۔ ۱۹۴۷ وچ ملک دی ونڈ ہویٔ تے شہر دے امیر ہندو وپاری، تاجر ملک چھڈ گٔے تے پچھے رہ گٔے غریب مسلمان کسان، تے انڈیا توں آن والے مہاجر۔ اج دا قصبہ اک عام جہیا سرحدی شہر اے جہیڑا سندھ تے پنجاب دے بارڈر تے موجود خاص رپتل بہتل دا امین اے۔ مٹھی سرایٔکی، سوہنی پنجابی اتے کرخت رنگڑی بولدے احمد پوری رل مل کے قصبے دا مان ودھا رہے نیں۔

جغرافیہ:

احمد پورلمہ عرض بلد 28٫3167 تے طول بلد 70٫0500 تے موجود اے۔ ایہہ قصبہ سطح سمندر توں تقریباً 75میٹر اچا اے۔ ایہہ پنجاب دی لہندے پاسے آخری تحصیل دا اہم قصبہ اے۔ ایہہ صادق آباد توں بھونگ ، ہیڈ گڈو، کویٹہ جان والی سڑک تے موجود اے۔ ایہدے آلے دوالے دو کھاد فیکٹریاں،اک شوگر مل،کیٔ کاٹن جیننگ فیکٹریاں موجود نیں جنہاں دے وچ ایتھوں دے لوگ کم کردے نہیں۔ ایتھے دی زمین زرخیز تے پانی مٹھا اے۔ سارا سال گرمی دا زور ہوندا اے تے ٹھنڈ دے مہینے صرف دو نیں۔