اقبال صلاح الدین

اقبال صلاح الدین
جم :	28 اکتوبر، 1933ء چک 40/3R، ضلع اوکاڑا، پنجاب
وفات :	13 دسمبر، 2005ء
گُݨ :	پنجابی شاعر، پنجابی لکھاری
پیشا :	تدریس
دیس :	پنجاب، پاکستان

اقبال صلاح الدین، پنجابی، اردو تے فارسی دے معرُوف لکھاری، شاعر، ادیب، محقق تے تنقید نگار سی۔

جم

اقبال صلاح الدین 28 اکتوبر 1933ء نوں پنجاب دے پنڈ چک 40/3R، ضلع اوکاڑا وچ چوہدری فتح دین دے گھر پیدا ہوئے۔

تعلیم تے تدریس

گورنمنٹ ہائی سکول اوکاڑا توں میٹرک کرکے لاہور آگئے۔ 1965ء وچ فارسی فاضل تے بی اے دے امتحان پاس کِیتے۔ 1966ء وچ ایم اے تے ایم او ایل فارسی، اوریئنٹل کالج توں تے 1967ء وچ ایم اے اردو، 1968ء وچ پنجابی فاضل دا امتحان پاس کِیتا۔ کچھ چِر اوریئنٹل کالج لاہور وچ ریسرچ سکالر رہے۔

ادبی کم تے لِکھتاں

ساری حیاتی تصنیف، تدوین، تالیف تے تحقیق وچ مصروف عمل رہے۔ اوہ اِکو ویلے محقق، نقاد، شاعر تے کہاݨی کار سی۔ کچھ چِر پنجابی رسالے لہراں دے مدیر رہے۔ پنجابی، اردو تے فارسی دیاں کئی کتاباں دے مصنف، مولف تے مرتب نیں۔ فارسی وچ امیر خسرو اُتے تحقیقی کم کیتا۔ تاریخ پنجاب، حدیث آشنا (نعتیہ مجموعہ کلام) تے پنجابی زبان وچ لعلاں دی پنڈ، سنگی نامہ، بار دی سار (مجموعہ کلام)، کِکر کنڈیالی (شاعری)، کونج کہاݨی (کہانیاں)، سیف الملوک، احسن القصص، فہرست مقالات، کرب قبیلہ (لمبی نظم) خاص طور تے اہم نیں۔

وفات

اقبال صلاح الدین 13 دسمبر 2005 نو‏‏ں فَوت ہوگئے۔