بابا بڈھا جی
بابا بڈھا جی دا جم بھائی سگھا دے گھر مائی گوراں دی ککھوں، پنڈ کتھو ننگل، ضلع امبرسر وچ ہویا۔ ماپیاں نے اوہناں دا ناں بوڑا رکھیا۔ کجھ چر مگروں اوہناں دے ماپے پنڈ رمداس آ وسے۔ اوہ بعد وچ مجھاں دے واگی بنے۔ جد اوہ باراں ورھیاں دے سن تد گرو نانک رمداس پنڈ دے پاس آ ٹکے۔ بوڑا جی مجھاں چاردے اتھے آ گئے اتے اوہناں گرو جی دا پیغام سنیا۔ بعد وچ اوہ روز گرو جی کول آؤندے تے اوہناں دی تعلیمات سندے تے اوہناں واسطے ددھ لیا کے نذر کردے۔ اک دن گرو جی نے بوڑا جی نوں اوہناں بارے پچھیا تے گرو جی نے بوڑا جی دا جواب سن کے کہیا کہ 'توں ہیں تاں بچہ، پر گلاں بڈھیاں والیاں کردا ایں۔ توں بچہ نہیں، توں بڈھا ایں۔' اس دن توں بوڑا جی دا ناں 'بڈھا جی' پے گیا۔ سکھ اوہناں نوں پیار نال بابا بڈھا جی آکھدے نیں۔
بڈھا جی نے سکھی دھارن کیتی تے گرو نانک دیو جی دے سکھ بن گئے۔ اوہ سارا دن سنگتاں دی سیوا کردے، کھیتاں وچ جا کے کھیتی باڑی دا کم وی نبھاؤندے تے نام جپدے رہندے۔ اوہناں نے اپنا جیون سکھاں لئی نمونہ بنایا تے گرو جی دے 'نام جپن، کرت کرن تے ونڈ کے چھکن' دی تعلیمات نوں کما کے دکھایا۔ گرو نانک دیو جی اوہناں اُتے بہت پرسن سن تے جدوں گرو جی نے گرگدی گرو انگد دیو جی نوں سونپی تاں گرو جی نے گوریائی دی رسم بابا بڈھا جی کولوں ادا کروائی۔ مگروں تیجی، چوتھی، پنجویں تے چھیویں پاتشاہی نوں گرتا دی رسم وی بابا بڈھا جی ہی کردے رہے۔