نیو یارک شہر

نیو یارک شہر
New York City
جھنڈا	نشان
دیس:	امریکہ
صوبہ:	نیو یارک
تھاں:	1,214.4 مربع کلومیٹر
لوک گنتی:	8,310,212
بولیاں	انگریزی
نیو یارک دی ویب سائٹ

نیویارک لوک گنتی نال امریکہ دا سب توں وڈا شہر اے۔ ایہنوں صوبہ نیو یارک توں وکھ رکھن لئی نیویارک شہر کیا جاندا اے۔ ایہ دنیا دی رہتل، بپار، سیاست، پڑھائی، کم کاج، پھرن ٹرن، آرٹ تے فیشن دا گڑھ اے۔ ایتھے ای یونائیثڈ نیشنز دا وڈا دفتر وی ہے۔ نیویارک شہر دی لوک گنتی 8,244,910 لکھ اے تے 1,213.4 مربع کلومیٹر تے پھیلیا ہوئیا اے ۔ لاگے دیاں تھانواں دی وی گنتی رلاؤ تے ایدی لوک گنتی 18,897,109 بندی جیدے نال ایہ دنیا دے وڈے شہری ھانواں وچ گنیا جاندا اے۔

تریخ

یورپی لوکاں دے آن توں پہلے نیو یارک شہر دی تھاں تے پرانی امریکی قبیلے الگونکوین دے لوک وس رۓ سن، اک ہور قبیلہ لینیپ سٹیٹن جزیرہ، لیندا لانگ آئیلینڈ بروکلائن، کوینز، مینہٹن، برونکس تے تھلویں ہڈسن وادی وچ وس ریا سی۔

گیووانی ڈی ویرازانو اک اطالوی کھوجی پہلاہ یورپی سی جیہڑا 1524 نوں ایتھے آیا۔ اوہ فرانس دے بادشاہ دا ملازم سی۔ ویرازانو نیویارک دے سمندری اڈے وچ ناں وڑیا تے واپس بحر اوقیانوس چ چلا گئیا سی۔ ہنری ہڈسن اک انگریز پہلی واری ایدر آیا اوہ ڈچ ایسٹ انڈیا کمپنی لئی کم کرریا سی تے لیندے ول جان لئی کوئی راہ لب ریا سی۔ ہڈسن نے 11 ستمبر 1609 چ مین ہٹن نوں اپڑیا ۔ فیر اوہنے اگے اپنا جہاز اک دریا وج پادتا جیہڑا ہن اوہدے ناں تے دریاۓ ہڈسن اکھواندا اے ، اوہ اس تھاں تے اپڑیا جتھے نیویارک دا راجگڑھ البنی اے ۔ ڈچاں نے 1614 چ مینہٹن دے دکھن وچ اک نگری وسائی تے اوہدا ناں 1625 وچ نیو ایمسٹرڈیم رکھیا۔ ڈچ آگو پیٹر مینیوٹ نے 1626 وچ مینہٹن دا جزیرہ لینیپ قبیلے کولوں 60 گلڈر وچ ملی لیا۔ ڈچاں نے ایتھے کھلاں دے بپار دا مڈھ رکھیا۔ 1664 چ نیوایمسٹرڈیم تے لاگے دے تھاں نیو ہالینڈ تے انگریزاں نے مل مار لیا تے ایدا ناں پلٹ کے نیو یارک رکھ دتا۔ قبیلے دیاں آپسی لڑائیاں تے روگاں باجوں لینیپ قبیلے دے لوک مکدے گے تے تے انگریز اوہناں دی تھاں لیندے گۓ۔

1702 توں لے کے 1800 تک ایتھ پیلے تاپ دا روگ 7 واری لوکاں نوں لگیا۔ برطانوی راج وچ ایہ شہر واوا اگے ول ودیا تے ایہ غلاماں دا گڑھ بنگیا جتھے 1730 وچ 42% گھراں وچ غلام سن۔ غلامی باجوں ایتھوں دے بپار، کم کاجے تے وادا ہویا۔ 1754 وچ ایتھے برطانیہ دے بادشاہ ولوں ایتھے کولمبیا یونیورسٹی دی نیو رکھی گئی۔ اکتوبر 1765 وچ نیویارک وچ امریکی لوکاں دی برطانیہ دے اووہناں تے ٹیکس لان دے برخلاف کانفرنس ہوئی۔ ازادی پسنداں دی ایتھے ریندے برطانوی فوجیاں نال لڑائیاں دا مڈھ بجیا تے امریکی انقلاب دی سب توں وڈی لڑائی لانگ آئیلینڈ دیلڑائی اگست 1776 نوں نیویارک دے اک حصے بروکلائن وچ لڑی گئی۔ ایدے وچ برطانیہ نوں جت ہوئی تے نیویارک وچ برطانیہ دے ہمدرد کٹھے ہوندے گۓ تے ایتھوں ای برطانوی فوج دوجیاں تھانواں تے ہلے بول رئی سی۔ برطانیہ نے جت ہونے تے غلاماں نوں ازادی دین دا وعدھ کیتا تے ایس گل تے دس ہزار دے نیڑے غلام نیویارک انگریزاں ناں آرلے۔ 1783 وچ جدوں برطانوی فوج ایتھوں گئی تے اوہناں نال ایتھوں 3000 ازاد کیتے لوک وی گۓ تے کینیڈا تے تے ہور تھانواں تے انگریزاں نے اوہناں نوں وسایا۔ لڑائی توں بچن تے صلح دی اک کوشش سٹیٹن جزیرے تے 11 ستمبر 1776 نوں بنجیمن فرینکلن تے لارڈ ہاؤ دے وشکار ہوئی پر ایہ اگے ناں ودھی۔ برطانوی راج ویلے ای 1776 وچ ایتھے اک وڈی اگ لگی جیدے نال شہر دا چوتھا حصہ سڑ گیا۔

1785 نوں 13 امریکی مڈھلے صوبے اپنے دیس دا پہلا راجگڑھ بناندے نیں۔ پہلا امریکی صدر جارج واشنگٹن، امریکی کانگرس، امریکی سپریم کورٹ، فیڈرل ہال، وال سٹریٹ نیویاوک وچ اپنا کم شروع کردے نیں تے ایتھے حقاں دا پہلا امریکی بل وی پاس ہویا۔ 1790 وچ نیویارک، فلاڈیلفیا توں وڈا ہون نال امریکہ دا لوک کنتی نال سب توں وڈا شہر بن گیا۔ نیویارک وچ کالیاں لئی جنگے قنون ہون باجوں ایتھے کالیاں دی گنتی وددی گئی تے 1840 نوں ایتھے 16,000 افریقی امریکی سن۔ 19وین صدی نیویارک دے وادے دی صدی سی۔ یورپی مہاجر آۓ، کپاء دے بپار ودیا پر نیویارک دے وادے وڈی گل ایری نہر دا بننا سی جیدے نال شہر دا جوڑ ہڈسن دریا تے امریکہ دے اندرلے وائی بیجی تے بپار دے وڈے نگراں تے تھانواں نال ایدا جوڑ جڑ گیا۔ ہرمن ملول تے واشنگٹن ارونگ ایس ویلے دے وڈے لکھاری سن۔ 1857 وچ سینٹرل پارک شہر دے لوکاں دیاں کوششاں نال امریکی تریخ وچ کسے دیس وکھالے والا پہلا پارک سی۔

آئرلینڈ وچ پین والا قحط تے جرمن دیساں وچ سیاسی انقلاب اوتھاں دے لوکاں نوں اپنے دیس چھڈ کے امریکہ آن دا کارن بندا اے۔ اینج 1860 وچ نیویارک شہر 1860 وچ 25٪ لوک آئری تے 25٪ لوک جرمن سن۔ ایس نال نویں آنوالیاں تے کالیاں وشکار کم کاج وچ چگڑا پادتا۔ ایس رپھڑ وچ 100 دے نیڑے کلے مارے گۓ تے کئی کالے مینہٹن چوں نس گۓ۔

1898 وچ نویں نیویارک دا مڈھ رکھیا گیا۔ بروکلن، نیویارک کاؤنٹی، رچمنڈ کاؤنی تے کوین کاؤنٹی دا لیندا انگ رلا کے نیویارک اک ودآ شہر بنا دتا گیا۔ 1904 وچ شہر دے وکھرے انگاں نوں اپس وچ نیویارک سٹی سبوے نال ملایا گیا۔ 20ویں صدی دے مڈھ توں ای ایہ دنیا دا اک ودا بپاری تے کم کاج دا گڑھ بن چکیا سی۔ 1890 وچ ایتھے کالیاں دی گنتی 36,620 سی۔ 1920 دے دھاکے وچ دکھن ولوں کالے ایدر آن لگ پۓ تے تے 1916 وچ نیویارک اتلے امریکہ وچ کالیاں دی سب توں وڈی نگری سی۔ 1920 دے دھاکے وچ ایہنے لوک گنتی وچ لندن نوں پچھے کردتا تے دنیا دا سب توں وڈا شہر بن گیا۔ 1930 دے دھاکے وچ ایدی لوک گنتی اک کروڑ توں ٹپ گئی تے ایس نمبر ک اپڑن والا انسانی تریخ وچ ایہ پہلا شہر سی۔

دوجی وڈی لڑائی مگروں نیویارک دنیا دا اک منیا پرمنیا آگو شہر سی۔ لڑائی توں پرتن والیاں نیں ایتھے کم کاج وچ وادے دے وڈے کم کیتے۔ نویں کر تے نگریاں وسیاں۔ یونائیڈ نیشنز دا وڈا دفتر 1950 نوں ایتھے بندا اے تے ایبسٹریکٹ ایکسپریشنزم دے ایتھے مڈھ پین تے نیویارک پیرس کولوں آرٹ دا گڑھ ہون دا مان کھو لیندا اے۔

1960 وچ ایتھے کم کاج دی تھوڑ ہون باجوں لوکاں نوں نوں پیسے ٹکے دے رپھڑ پیندے نیں تے جرم وددے نیں۔ 1980 وچ کم کاج وچ تے وادا ہوندا اے پر جرم دی ہوند وی وددی رئی جیہڑی 1990 دے مڈھ تک رئی۔ 1990 دے دھاکے وچ جرم گنتی تھوڑی ہوئی۔ ایدے کئی کارن سن: دکھنی ایشیاء توں لوکاں دا انا، کم کاج ودنا تے پولیس دے نبڑن دے چالے ودیا ہونا۔

شہر نوں وڈا چٹکا اودوں لگدا اے جدوں 11 ستمبر 2001 نوں ایس شہر دیاں دو اچیاں بلڈنگاں ورلڈ ٹریڈ سنٹر نال دو ہوائی جہاز ٹکراندے نیں تے ایس ہلے وچ 2996 لوک مردے نیں تے 6000 دے نیڑے پھٹڑ ہوندے نیں۔ الے دوالے دے اچے کوٹھے وی کھکھڑی ہوۓ۔ 29 اکتوبر 2012 نوں وی نیویارک شہر تے دوالے دے تاھنواں وچ اک سمندری ہنیری سینڈی آندی اے جیدے نال گلیں تے زمین تھلے رستیاں وچ پانی آجاندا اے۔

جغرافیہ

نیو یارک شہر امریکہ دے اتر چڑھدے چ بحر اوقیانوس دے کنڈے تے نیو یارک صوبے وچ وسدا اے۔ ایہ نیو یارک صوبے دے چڑھدے دکھن ول ، ہڈسن دریا دے منہ تے واشنگٹن ڈی سی تے بوسٹن دے وشکار اے۔ ایس تھاں تے ہون باجوں نیویارک بپار تے کم کاج دا گڑھ بن گیا۔ شہر دی چوکھی لوک گنتی تن جزیریاں منہیٹن، لونگ آئیلینڈ تے سٹیٹن آئیلینڈ تے وس رئی اے۔ تھاں تھوڑی ہون باجوں اچیاں بلڈنگاں بنانیں پیآں۔ ہڈسن دریا ہڈسن وادی وچوں آکے نیویارک دے سمندری اڈے وجوں لنگدا اے۔ برونکس دریا شہر وچون وگن والا سجرے پانی دا کلا دریا اے۔

ایہ شہر 1,214 مربع کلومیٹر تھاں تے پھیلیا ہویا اے جیدے وچ 425 مربع کلومیٹر پانی تے 789 مربع کلومیٹر سکی تھاں اے۔ شہر دی سب توں اچی تھاں ٹوڈ ہل 409.8 فٹ اچی اے۔

لوک

نیویارک شہر 2011 دی گنتی باجوں 8,244,910 لوکاں دے اوتھے وسن تے امریکہ دا سب توں ودا شہر اے۔ ایدی گنتی شکاگو تے لاس اینجلس دی گنتی نوں رلا کے ود بندی اے۔ ایتھے 44٪ لوک گورے، کالے 25.1%، ہسپانوی 27.5% تے ایشیائی 12.7% نیں۔ منہیٹن وچ 25,846 / کلومیٹر نال سب توں سنگنی لوک گنتی وسدی اے۔ بارلے دیساں وچون اکے امریکہ وسن والے لوکاں دی وڈی گنتی ایلس جزیرہ، نیویارک راہیں آندی سی۔ 1900 تک جرمن ایتھے آن والی سب توں وڈی ٹولی سی فیر آ‎ری، یہودی تے اطالویاں دے ناں اندے نیں۔ 1940 تک گورے شہر دی گنتی دا 92% بندے سن۔

شہر دی 36% لوک گنتی باہر جمی اے۔ پر کوئی وی ٹولی چھائی ہوئی نئیں دسدی۔ ڈومینیکن، چین، جمیکا، میکسیکو، ہندستان، ایکویڈار، اٹلی، ہیٹی، کولمبیا تے گیانا اوہ دس وڈے دیس نین جتھوں ایہ لوک جم کے آۓ۔ نیویارک قنون ول نال امریکہ وڑن والیاں لئی اک وڈا بوآ اے۔

نیویارک شہر وچ اسرائیل توں باہر یہودی سب توں وڈی گنتی وچ وسدے نیں۔ انڈین امریکیاں دا 20٪ تے سارے امریکہ وچ وسدے کویائی لوکاں دا 15٪ ایتھے اے۔ 35,000 توں ود پاکستانی نیویارک شہر وچ وسدے نیں۔

پھرن ٹرن

نیویارک وچ پھرن ٹرن لئی لوکاں دا آنا ایتھے دے لوکاں لئی کمان دا اک وڈا ول اے۔ پچھلے 5 وریاں وچ ہر ورے 4 کروڑ لوک ایتھے آۓ۔ لوکاں دیاں پسند دیاں تھانواں نیں: ایمپائیر سٹیٹ بلڈنگ، مجسمہ آزادی، ایلس جزیرہ، میٹروپولیٹن میوزیم آف آرٹ، سینٹرل پارک، روکفیلر سینٹر۔ 2011 وچ ایتھے 5 کرور پھرن ٹرن والے لوک آۓ۔

موسم

نیو یارک دا گلا تے ٹراپیکل موسم اے۔ سردیاں گلی تی ٹھنڈی ہوندیان نیں۔ گرمی نپ زیرو تک تے کدے کدے زیرو توں وی تھلے اپڑ جاندا اے۔ 28 انچ سلانہ برف پیندی اے۔ نیو یارک شہر چ طوفان کدے کدے ای اندے نیں۔ ایپلیچین دا پعاڑی سلسلہ ایس شہر نوں ٹھنڈ توں بچاندا اے۔

محول

ٹریناں ٹراماں تے بساں آن چان لئی سب توں چوکھیاں ورتیاں جانداں نیں۔ شہر دی سرکار پوری کوشش کردی اے جے شہر دا محول ستھرا روے۔

پارک

نیو یارک شہر دے 28000 ایکڑ یا 113 مربع کلومیٹر تھاں تے پارک نیں تے ایدے نال 14 میل/23 کلومیٹر دا سمندری کنڈا لوکآن دے پھرن ٹرن لئی رکھیا ہویا اے۔ سینٹرل پارک نیو یارک شہر دے اندر 843 ایکڑ تے پھیلیا ہویا پارک اے۔ ایس پارک وچ 25 ملین لوک سلانہ اندے نیں۔

امریکہ دے شہر

واشنگٹن ڈی سی · نیو یارک شہر · شکاگو ·