راجا محمد احمد
 | |
|---|---|
| جم | ۱۸ مئی 1951 کوتل کنڈ، ضلع جہلم، پنجاب، پاکستان |
| موت | ۲۴ نومبر 2019 جکارتا، انڈونیشیا |
| کم کِتہ | اکاؤنٹینٹ |
| قومیت | پنجابی |
| شہریت | پاکستانی |
| تعلیم | گریجوئیشن |
| صنف | ناول، افسانہ، شاعری |
راجا محمد احمد (Raja Muhammad Ahmed) پنجابی زبان تے ادب دے اک پاکستانی پنجابی لکھاری، ناول نگار، افسانہ نگار تے شاعر سی۔
نِجی زِندگی
[سودھو]راجا محمد احمد پنجاب، پاکستان دے ضلع جہلم دے پنڈ کوتل کنڈ وچ 18 مئی، 1951ء نُوں پَیدا ہوئے۔ مُڈھلی تعلِیم پنڈ دے سکُول توں حاصل کِیتی۔ جہلم توں انٹرمیڈیئٹ پاس کِیتا۔ اوہناں دے والد صاحب فوج وچ افسر سی، اوہناں دا تبادلہ نوشہرہ وچ ہوگیا، راجا احمد وی نال چلے گئے تے نوشہرہ توں گریجوئیشن کِیتی۔
راجا محمد احمد گریجوئیشن کرن مگروں 1971ء وچ کراچی آگئے۔ 1973ء وچ ابوظہبی آگئے تے اک فرم وچ اکاؤنٹینٹ ہوگئے۔
ادبی سفر
[سودھو]راجا احمد نے زمانہ طالب عِلمی وچ اخبارات وچ لِکھن دا آغاز کر دِتا سی۔ کراچی مُنتقل ہون توں بَعد ادبی سرگرمِیاں دا آغاز کِیتا۔ ماہنامہ "پنجابی زبان" لاہور تے ماہنامہ "لہراں" وچ افسانے تے لیکھ لِکھے۔ فیر کراچی وچ ای پنجابی ناول "کھیڈ مقدراں دی" لِکھیا جیہڑا 1974ء وچ چھپیا۔ اس ناول اُتے اوہناں نُوں پاکستان رائٹرز گلڈ ایوارڈ مِلیا۔ اس توں مگروں پنجابی کہانِیاں دا مجمُوعہ "دکھ دھرتی دے" لِکھیا جیہڑا 1985ء وچ چھپیا۔ 1985ء وچ اوہناں دے ناول دا دُوجا ایڈیشن چھپیا، جیہدی مُکھ دکھالی دی تقرِیب بہت شاندار سی تے مُلک دے نامور ادِیبّاں تے لکھارِیاں نے ایہدے وچ رلت کِیتی۔
راجا محمد احمد ابوظہبی وچ پنجابی مشاعرے تے پنجابی تقرِیبات دا اِنعقاد وی کردے رہے تے پنجابی ادبی پرھیا دی بنیاد رکھی۔ اوہناں نے نہ صِرف پاکستان وچ بلکہ پاکستان توں باہر رہ کے وی اپنی ماں بولی پنجابی دی بے مثال خِدمت کِیتی۔
لِکھتاں
[سودھو]- کھیڈ مقدراں دی (پنجابی ناول) 1974ء
- دکھ دھرتی دے (پنجابی افسانوی مجمُوعہ) 1985ء
وفات
[سودھو]راجا محمد احمد جکارتا، انڈونیشیا وچ 24 نومبر، 2019ء نُوں فَوت ہوگئے تے اپنے آبائی پنڈ کوتل کنڈ، ضلع جہلم وچ مدفُون نیں۔