قاضی غلام رسول

قاضی غلام رسول
جم
وفات
باب ادب

قاضی غلام رسول، پنجابی زبان دے صوفی شاعر سن۔ اوہ 1898ء نوں پِنڈ ساکھی ضلع حافظ آباد وچ پیدا ہوئے۔ اوس ویلے حافظ آباد، ضلع گجرانوالا دی تحصیل سی۔

قاضی غلام رسول دیاں لِکھتاں دی تعداد 14 دے لَگبَھگ اے۔ جیہناں وچ قصہ ابراہیم ادھم، سسی دی ڈولی، چرخہ حقانی، پنج گنج، سنہیوڑا فراقیہ، باراں ماہ فراقیہ، ستوار فراقیہ، شہادت پاک معصوماں، تریہہ دن، قصہ کُھرک دا، حبیب دیاں اکھیاں، بھین دا ویر شامل نیں۔

قاضی ہوراں جو کچھ وی لِکھیا بڑے سادہ ڈَھنگ نال لِکھیا۔ اوہناں دی شاعری وچوں دیہاتی ماحول دا رَنگ چھلکدا نظر اَوندا اے۔ اوہناں دے کلام وچوں مَعرفت دی لَو دے جھلکار وی پُھٹدے دِکھدے نیں۔

قاضی غلام رسول 1987ء نوں چلانا کر گئے۔

نمونہ کلام

چیتر چار دیہاڑے ڈھولا حُسن جوانی
اڑیا مان کریں نہ اوڑک ہونا ایں فانی
کیتی ڈھونڈ بتیری تیرا کوئی نہ ثانی
تیری چال انوکھی نالے شکل نورانی
مٹھا ناز ادائیں زُلفاں لام قرآنی
سیّاں سیس گُندائے میرے کول نہ جانی
کیتی چَوڑ جوانی کوئی گَھل نشانی
ہو غلام تساڈی اج ہوئی بیگانی

📖 ’’باراں ماہ فراقیہ‘‘ وچوں

ــــــــــــــــــــــــــــــــــــــــــــــــــــــــــــــ

دن پہلا میں ہو واویلا بھال کراں دلبر دی
دھکا دے اگیرے ہویا رہی ترلے میں کردی
میں غلام قدیمی اوہدی نئیں ایمانوں ہردی
غلام رسولا سوہنے باہجھوں لوڑ نئیں کوئی زر دی

📖 ’’تریہہ دن‘‘ وچوں

ـــــــــــــــــــــــــــــــــــــــــــــــــــــــــــــــ

مون٘ہہ کالا کر لَے قلمیں نی، تینوں لایا ہویا گلمیں نی
توں کاہنوں ہتھوں پلمیں نی، اج تیتھے فصل غفاری اے
ہائے ڈاہڈی کُھرک بیماری اے، لا گَھسے رات گزاری اے
ہُن بھائیو گل سناواں میں، اک قصہ لکھ وکھاواں میں
جو بیتی شعر بناواں میں، سنو لکھدی قلم وچاری اے
ہائے ڈاہڈی کُھرک بیماری اے، لا گَھسّے رات گزاری اے
سُن کُھرکے توں گل میری نی، مَیں پیریں پَیندا تیری نی
لا ہور کدائیں پھیری نی، توں گھتی آن خواری اے
ہائے ڈاہڈی کُھرک بیماری اے، لا گَھسے رات گزاری اے

📖 ’’قصہ کھرک دا‘‘ وچوں

حوالے