مسعود کھدر پوش

مسعود کھدر پوش
تاریخ پیدائش	سنہ 1916
تاریخ وفات	سنہ 1985 (68–69 سال)

مسعود کھدر پوش، بطَور ڈپٹی کمِشنر، ضلع نوابشاہ

مسعود کھدر پوش، پاکستان دے نامور سِول سرونٹ، دانشور تے پنجابی زبان و ادب دے سیوک سی۔ مسعود کھدر پوش نے ساری زِندگی کھدر دا کُرتا شلوار زیب تن کِیتا تے اس وجہ توں کھدر پوش دے نام توں مشہور ہوئے۔

پَیدائش

مسعود کھدر پوش 26 جون 1916ء نوں لاہور، گمٹی بازار وچ پَیدا ہوئے۔

تعلیم تے عملی زِندگی

مسعود کھدر پوش نے اِبتدائی تعلیم محلے دی مسجد توں حاصل کِیتی تے میٹرک دا اِمتحان سینٹرل ماڈل ہائی سکول لاہور توں پاس کِیتا۔ گورنمنٹ کالج لاہور توں بی-اے دا اِمتحان پاس کرن توں بَعد 1939ء وچ آئی-سی-ایس دا امتحان پاس کِیتا تے مزید تعلیم دے حصول لئی سینٹ جان کالج آکسفورڈ، انگلستان چلے گئے۔ انگلستان توں واپس آؤݨ مگروں اوہناں دی پہلی تعیناتی احمد نگر وچ ہوئی۔

مسعود کھدر پوش 1941ء وچ اِنڈِیئن سِول سروس نال وابستہ ہوئے تے قیام پاکستان توں بعد سندھ دے ہاریاں دے بارے وچ لِکھی گئی مشہُور ہاری رپورٹ وچ اختلافی نوٹ لِکھݨ د‏‏ی وجہ تو‏ں شہرت پائی۔ 1972ء وچ مسعود کھدر پوش بطَور مِمبر بورڈ آف ریونیو، سرکاری ملازمت توں ریٹائر ہوگئے۔ ریٹائرمنٹ توں مگروں پنجابی زبان و ادب دے فروغ لئی بہت کم کِیتا۔ سِول سرونٹ ہوݨ دے باوجود سادہ زندگی گزاردے سی تے ہمیشہ کھدر دا لباس پہندے سن، ايس‏ے وجہ توں اوہناں نُوں ’’کھدر پوش‘‘ دا خطاب مِلیا، جیہڑا اوہناں دے نام دا حِصہ بݨ گیا۔

پنجابی زبان و ادب نال جُڑت

مسعود کھدر پوش نے پنجابی زبان و ادب دی ترویج تے اشاعت دا بیڑا چکیا تے ’’پنجاب فورم‘‘ قائم کِیتا۔ پنجابی زبان و ادب دے فروغ لئی اوہناں نے پنجابی رسالہ ’’حق اللہ‘‘ وی جاری کِیتا۔ اس توں علاوہ پنجابی زبان دے متعلق اوہناں دے مضامین مُختلف مُلکی اخبارات تے رسائل وچ شائع ہُندے رہندے سی۔ اوہناں نُوں پنجابی زبان نال خاص لگاؤ سی تے پنجابی دے کلاسیکی شاعراں دا کلام بطَور خاص پسند سی۔

وفات

مسعود کھدر پوش 25 دسمبر 1985ء نو‏‏ں لاہور وچ وفات پاگئے تے لاہور وچ گلبرگ دے گرومانگٹ قبرستان وچ آسودہ خاک ہوئے۔

بارلے جوڑ

• جیون

حوالے