نصیرودین صامی

آزاد انسائیکلوپیڈیا، وکیپیڈیا توں
Jump to navigation Jump to search
نصیرودین صامی
Ustad Saami.jpg

Naseeruddin Saami

ناں : استاد نصیرودین صامی
دیس : پاکستان
بولی : اردو
رہائش : کراچی
پیشا : گائیکی
خاصیئت : کلاسیکی موسیقی
سنگیت گھرانا : دہلی گھرانا
اعزازات : تمغا امتیاز، پرائڈ آف پرفارمنس

استاد نصیرودین صامی پاکستان دے لیجنڈری خیال گائیک نیں ۔ اوہناں دا تعلق موسیقی دے کلاسیکی دہلی گھرانے نال اے ۔ اوہناں دے وڈکے ، میاں صامت ، حضرت امیر خسرو دے چار خاص شاگرداں وچوں اک سی ۔ باقی تِن شاگرداں دیاں نسلاں مُک گئیاں ۔ ہُݨ صرف میاں صامت دی نسل باقی اے ۔ نصیرودین صامی دے بزرگ تان رس خان ، بہادر شاہ ظفر دے دربار نال منسلک سی ۔ اوہناں نے 1950 دے دہاکے وچ اپݨے انکل ، منشی رضی الدین توں موسیقی دی تربیئت حاصل کیتی ۔ اپݨے سرپرست دی ہدایت تے اوہناں نے دہلی گھرانے دے بزُرگاں ، سردار خاں ، پیارے خاں تے افتخار احمد خاں دے زیر اتالیقی اپݨی تربیت نوں اگے ودھایا ۔ استاد صامی اک فنکار نیں جو اپݨے فن دی تریخی روایات نوں بہت اہمیئت دیندے نیں ۔ اوہناں دی گائیکی نوں "سدھ بنی" کہیا جاندا اے ۔ اوہ اپݨی وراثت وچ میوزیکل فلسفے تے سُر دی پاکیزگی نوں برقرار رکھݨ ، اوہدے تے یقین رکھݨ دے سخت مشق کار نیں، جیہنوں اوہ اپݨی گائیکی وچ انتہائی خوبصورتی نال دکھوندے نیں ۔ اوہ کلاسیکی موسیقی دے سارے عناصر ، خیال ، ٹھمری ، سدرا تے کجری وغیرا نوں ہما گیری نال پیش کردے نیں، جو اوہناں دے گھرانے دا امتیاز اے ۔ نصیرودین صامی دے ناں نوں موسیقی دے کھیتر وچ جاݨ پچھاݨ دی لوڑ نئیں ۔ اوہناں دے وڈکےآں نے موسیقی دے سکول دا مُڈھ رکھیا سی ، جیہنوں "دہلی گھرانا" کہیا جاندا اے ۔ اوہناں دے وڈکے نظام الدین اولیاء دے دربار نال وابستا سن ۔ اوہناں دے بزرگ میاں سمتھ نوں امیر خسرو دا شاگرد ہوݨ دا اعزاز حاصل ہویا ۔ نصیرودین نے اپݨی تربیت 10 ورھے دی عمر توں شروع کیتی ۔ اوہناں نے 1958 توں 1962 تک اپݨے نانا سردار خاں نال لہور وچ تربیئت حاصل کیتی ۔ اوہناں دے دو ماموں افتخار احمد تے پیارے خاں کراچی وچ رہندے سی ۔ اوہناں نوں کراچی وچ منشی رضی الدین دے نال رہݨ دا موقع ملیا ۔

نصیرودین صامی اپݨی خاندانی روایت نوں برقرار رکھݨ آلے ، گائیکی دے سبھ توں اہم جُز سُر دے پیروکار نیں ۔ اوہناں دی گائیکی پُر امن تے پُر سکون اے ۔ راگ دی قلبی حوالگی ، اوہناں جذبات نوں ظاہر کرنا، جیہناں دا ذکر بندش وچ کیتا گیا اے ۔ خیال گائیکی دا اک اہم پہلو اے ، جیہدے وچ اوہناں نوں برتری حاصل اے ۔ اوہ ٹھمری تے سدرا گوندے ہوئے اپݨی استعداد دکھوندے نیں ۔

اوہناں نے راجستھانی لوک گیت کیسریا بالم بڑے سوہݨے منفرد ڈھنگ نال گایا ۔ اوہناں دے گائے ہوئے اس گیت نوں 2005 وچ پاکستان ٹیلی ویژن کراچی سینٹر دے اردو ڈرامے جہاں بسیں دلدار وچ شامل کیتا گیا ۔

استاد نصیرودین صامی پاکستان توں باہر وی کئیاں دیساں وچ اپݨے فن دا دکھالا کر چکے نیں ۔

اعزازات[لکھو]

استاد نصیرودین صامی نوں 2007 وچ صدر پاکستان ولوں پرائیڈ آف پرفارمنس نال نوازیا گیا ۔ اس توں علاوا اوہناں نوں تمغا امتیاز وی عطا کیتا گیا ۔