ڈاکٹر امجد علی بھٹی

آزاد انسائیکلوپیڈیا، وکیپیڈیا توں

محقق، نقاد، شاعر، افسانہ نگار، مترجم تے استاد ڈاکٹر امجد علی بھٹی دا جنم یکم اکتوبر 1967ء وچ پنڈ سائر باجوہ تحصیل و ضلع نارووال (اودوں ضلع سیالکوٹ) وچ ہویا۔ والد دا ناں محمد لطیف بھٹی سی جیہڑے کم کاج دے سلسلے وچ راولپنڈی وسدے سن۔ ایس لئی امجد بھٹی ہوراں مڈھلی تعلیم گورنمنٹ ایم سی پرائمری سکول راولپنڈی توں حاصل کیتی۔ والد ملازمت دے سلسلے وچ 1976ء وچ عراق چلے گئے آپ والدہ تے بھین بھراواں نال آبائی پنڈ سائر باجوہ ٹر گئے۔ تعلیمی سلسلہ جدوں چھیویں جماعت تیکر پہنچیا تے آپ پسرور ضلع سیالکوٹ وچ آن وسے تے میٹرک گورنمنٹ ہائی سکول نمبر۔1 پسرور توں کیتا۔ انٹرمیڈیٹ گورنمنٹ مرے کالج سیالکوٹ توں کیتا تے گریجوایشن گورنمنٹ ڈگری کالج سیٹلائٹ ٹاؤن راولپنڈی توں کیتا۔ نوکری دی ابتدا 1987ء وچ شیل انٹرنیشنل (اودوں پاکستان برما شیل) توں کیتی ۔ 1989ء وچ بین الاقوامی اسلامی یونیورسٹی وچ بھرتی ہو گئے۔ 1997ء وچ علامہ اقبال اوپن یونیورسٹی اسلام آباد ڈیپوٹیشن اُتے ٹر گئے۔ ایسے دوران بہاؤالدین زکریا یونیورسٹی ملتان توں ایم۔اے پنجابی دا امتحان پاس کیتا۔ ملازمت دے دوران ہی اورینٹل کالج پنجاب یونیورسٹی لاہور توں ڈاکٹریٹ دی ڈگری 2008ء وچ حاصل کیتی۔ مقالے دا عنوان "پنجابی شاعری وچ انسان دوستی دی سوچ" سی۔ پی ایچ ڈی کرن مگروں بین الاقوامی اسلامی یونیورسٹی وچ صوفی سٹڈیز ڈیپارٹمنٹ دے انچارج بنے۔ 2010ء وچ نیشنل یونیورسٹی آف سائنسز اینڈ ٹیکنالوجی اسلام آباد وچ ڈیپوٹیشن اُتے بطور ریسرچ سکالر ٹر گئے جتھے اِک سال نوکری کیتی تے فیر سمر انسٹیٹیوٹ آف لینگوئسٹ امریکہ نال وابستہ ہوئے۔ آپ کجھ عرصہ یونیورسٹی آف گجرات وچ وی نوکری کیتی۔ 2013ء توں لے کے 2018ء تیکر نیشنل یونیورسٹی آف سائنسز اینڈ ٹیکنالوجی اسلام آباد دے شعبہ مطبوعات وچ اردو سیکشن دے انچارج رہے۔ ڈاکٹر بھٹی ہوراں دی کتاباں دی فہرست کافی لمی اے۔ پنجابی زبان و ادب نال جڑیاں کتاباں وچ انسان دوستی تے پنجابی شاعری (تحقیق۔2008ء) اکھر اکھر موتی (افسانے) تارا تارا لو (پوٹھوہاری افسانیاں دی چون) کلام بابا فرید مع اردو ترجمہ، کلام شاہ حسین مع اردو ترجمہ (ڈاکٹر انعام الحق جاوید نال رل کے) کلام حضرت سلطان باہو مع اردو ترجمہ (ڈاکٹر انعام الحق جاوید نال رل کے) کلام ہاشم شاہ مع اردو ترجمہ (ڈاکٹر احسان اللہ طاہر نال رل کے) کلام بلھے شاہ مع اردو ترجمہ (ڈاکٹر انعام الحق جاوید نال رل کے) توں کہ میں (فخر زمان دے پنجابی ناول دا اردو ترجمہ) گجرات پیڈیا (ضلع گجرات تے منڈی بہاؤالدین دی تاریخی، ثقافتی تے ادبی تاریخ۔بہ اشتراک احمد سلیم) فخر زمان: شخصیت تے فن، استاد دامن: شخصیت اور فن، ڈاکٹر انعام الحق جاوید: شخصیت اور فن، تنقیدی فکریے (تحقیقی و تنقیدی مضمون) وغیرہ ذکر یوگ نیں ۔ ڈاکٹر بھٹی اج کل لاہور وچ اِک ادارے دے ڈائریکٹر دی حیثیت نال کم کر رہے نیں۔