ہومیوپیھتی

وکیپیڈیا توں
جاؤ: پاندھ, کھوج
Hahnemann.jpg

ہومیوپیھتی روگیاں نوں ٹھیک کرن دا اک ول اے جیدا مڈھ سیموئل ہانیمن نے 1796 وچ ( similia similibus curentur) اکوجیا، اکوجۓ نوں ٹھیک کردا اے دے اصول تے رکھیا۔ ایہدے وچ اک شے جیہڑی ٹھیک لوکاں وچ روگ دیاں نشانیاں لاندی اے اوہو ای روگیاں وچ اوہو ای نشانیاں نوں ٹھیک کردی اے۔ ہانیمن 1779 وچ ڈاکٹر بنیا پر چھیتی ای اپنے کم تون تنگ پے گیا تے ایہ کم چھڈ کے بولی وٹاندرے دے کم وچ پے گیا۔ 1790 وچ ہانیمن اک کتاب (A treatise on Matric Medica) دی بولی پلٹ ریا سی۔ ایہ کم کردیاں اوہ پیروی چھلڑ یا سنکونا تک اپڑیا جس نوں پڑھدیاں ہوئیاں اوہدیاں سوچاں ای بدل گئیاں۔ سنکونا ملیریا دا دارو منیا گیا سی۔ ہانیمن نے دوائی نوں اپنے تے کئی واری ازمایا۔ اوہنے جو اوہدے نال ہوئیا ویکھیا تے لکھ لیا۔ اوہ ایس گل تے بڑا حیران ہویا اے جے اوہنوں ملیریا تے ہے نہیں سی پر ہر واری کنین جیہڑی کہ سنکونا دا ست سی کھان تے اوہدے وچ ملیریا دیاں نشانیاں بن جاندیاں سن۔ ایہ نشانیاں ہر واری بندیاں جدوں وی اوہنے کنین کھادی تے ایہ نشانیاں کئی کینٹے تک ریندیاں۔ اگر اوہ کنین نہ کھاندا تے اوہنوں ملیریا دیاں نشانیاں نئیں نکلدیاں سن۔ ایہ گل اوہدی لئی حیران کرن والی سی جے کنین ای ملیریا دا دارو وی ہے تے کنین نال ای ایہدیاں نشانیاں ہوجاندیاں نیں۔ ایہ والا کم اوہنے فیر اپنے سنگیاں نال وی کیتا تے ایہو گلاں اوہناں نال وی ہوئیاں۔ ہانیمن نے فیر ہور دوائیاں جیویں آرسینک تے بیلاڈونا نیں نوں وی ازمایا تے کنین ورگیاں واتاں سامنے آئیاں۔ ہانیمن 6 ورے تک وکھرے شیواں نال ایہ کم کردا ریا تے اینج اوہدے کول چوکھی واتاں کٹھیاں ہوگیاں۔

ایس مگروں اوہ اپنے کم دی اگلی پدھر تے ٹرپیا۔ ایہ ہر دوائی نوں کسے روگی تے ازمانا سی تے ایہ ویکھنا سی جے اوہ فیدا دیندی اے کہ نہیں۔ دارو دین توں پہلے ہانیمن نے روگی دے پنڈے بارے پچھ پرتیت کردا، نشانیاں بارے لمے سوال کردا، کیہڑیاں گلاں اوہناں نوں ٹھیک یا روگی کردیاں سن، اوناں دی عام صیت، اوہ کیویں ریندے نیں تے جیون بارے اوہناں دی سوچ۔ ایہناں ساریاں گلاں لکھن مگروں ہانیمن دی اکھاں اگے روگی دی نشانیاں دی مورت بن جاندی۔ اوہ فیر ایس روگی دی ایہ نشانیاں والی مورت نوں وکھریاں دوائیاں دی مورت نال ملاندا۔ جدوں اوہ ایہ ملاپ بہت نیڑے کرکے مل جاندا اے فیر اوہ دوائی چندا۔ اوہنوں ایہ گل پتہ چلی جے جتنا ملاپ نیڑے دا ہوندا علاج اوہنا ای چنگا ہوندا۔

ہانیمن اپنے کماں دے انت تے ایس گل تے اپڑیا جے اوہنے روگی ٹھیک کرن دا دا اک نواں ول لبھ لیا اے جیدے وچ اک دوائی تے اک روگ جنہاں دیاں اکو جئیاں نشانیاں ہون کسے ول نال اک دوجے نوں کٹ دیندے نیں تے روگی دی صیت ٹھیک ہوجاندی اے۔ ایس کم نوں اوہنے ( similia similibus curentur) دا ناں دتا یا اکو جیآ اکو جۓ نوں ٹھیک کردا اے۔ ایہ ہومیو پیتھی دا پہلا تے سب توں وڈا اصول اے۔