جھیل وکٹوریا

جھیل وکٹوریہ افریقہ دی وڈیاں جھیلاں چوں اک اے ۔ 68،800 مربع کلومیٹر تے پھیلی ہوئی ایہہ جھیل براعظم افریقہ تے استوائی علاقے دی سب توں وڈی تے سطحی حجم دے اعتبار نال دنیا چ تازہ پانی دی دوجی سب تون ودی جھیل اے ۔ جھیل دی ردھ توں ودھ گہرائی 84 میٹر تے اوسط گہرائی 40 میٹر اے ۔

جھیل وکٹوریہ حجم دے اعتبار نال جگ چ تازہ پانی دی 7ویں سب توں وڈی؛ جھیل اے ، جس چ 2،750 معکب کلومیٹر (22 لکھ ایکڑ فٹ) پانی اے ۔ ایہہ جھیل دریائے نیل دی وڈی شاخ نیل ایبض دا منبع اے ۔ ایہہ جھیل افریقہ چ تنزانیہ ، یوگنڈا تے کینیا دے وچکار وادی صدع العظیم (Great Rift Vally) دے لہندے حصے چ اک سطح مرتفع تے واقع اے ۔ جھیل دے ساحلاں دی لمبائی 3400 کلومیٹر اے جدوں کہ اس چ 3 ہزار توں ودھ جزیرے وی نیں ، جنہاں چ اکثر غیر آباد نیں ۔ جھیل دے اتلے لہندے چ واقع کئی جزیرےآں دا مجموعہ مشہور سیاحتی مقام دی حثیت رکھدا اے ۔

تریخ چ جھیل دے بارے چ پہلی باقاعدہ معلومات عرب تاجراں ولوں ملدی اے جہڑے سونے ، ہاتھی دند تے دوجیاں شیواں لئی افریقہ دے اندرلے رستےآں تے جاندے سن ۔ معروف مسلمان جغرافیہ دان ادریسی نے 1160ء دی دہائی چ جہڑا نقشہ ترتیب دتا اس چ جھیل وکٹوریہ نون دیکھائیا گئیا اے تے اسنوں دریاغے نیل دا منبع وی قرار دتا گئیا ۔ یورپیاں نے پہلی وار 1858ء چ اس جھیل نوں دیکھئیا جدوں برطانیہ دے مہم جو جون ہیننگ اسپیک اس دے دکھنی ساحلاں تے پہنچئیا ،اس نے اس جھیل نوں برطانیہ دی ملکہ وکٹوریہ دے ناں تے جھیل وکٹوریہ دا ناں دتا ۔

ایہہ جھیل 20ویں صدی توں یوگنڈا ، تنزانیہ تے کینیا دے وچکار بحری سفر چ اہم حثیت رکھدی اے ۔ 21 مئی 1996ء چ اک بحری جہاز ڈبن نال 1 ہزار توں ودھ لوک مارے گئے جہڑا کہ افریقہ دی تریخ دے بدترین حادثےآں چوں اک اے ۔