واشنگٹن ڈی سی

واشنگٹن ڈی سی
چنڈا	نشان
دیس:	امریکہ
تھاں:	177 مربع کلومیٹر
میٹرو لوک گنتی:	5.3 ملین
ضلعی لوک گنتی:	617,996
مڈھ پیا:	16 جولائی 1790
ویب سائٹ:	[۱]

واشنگٹن ڈی سی امریکہ دا راجگڑھ اے. ایہدی نیو 16 جولائی 1790 چ رکھی گئی سی۔ اے امریکہ دے کسی صوبے چ نئیں آندا تے ایدا ناں پہلے امریکی صدر تے ہیرو جارج واشنگٹن دے ناں تے رکھیا گیا اے۔ اے شہر دو امریکی صوبیاں ورجینیا تے میری لینڈ دے وشکار ولگن تے دریاۓ پوٹومک دے کنڈے تے وسایا گیا اے۔

17ویں صدی چ یورپی لوکاں دے آن توں پہلے ایتھے ریڈانڈین وسدے سن۔ 18ویں صدی دے ٹرن تے اوناں نوں کتے ہور وسایا گیا۔ امریکہ دے ازاد ہون مگروں امریکہ نوں اک ایسے راجگڑھ دی لوڑ سی جیہڑا کسے وی صوبے چ ناں آندا ہووے۔ ایس لوڑ نوں ویکھدیاں ہویاں 16 جولائی 1790 چ ایتھے امریکی راجگڑھ دی نیو رکھی گئی۔ 9 ستمبر 1791 نوں ایدا ناں امریکہ دے پہلے صدر جارج واشنگٹن دے ناں تے واشنگٹن رکھیا گیا۔ ڈسٹرکٹ آف کولمبیا چ کولمبیا اوس ویلے امریکہ دا شاعرانہ ناں سی تے ایہ ایس لئی چنیا گیا۔ 24 تے 25 اگست 1814 نوں برطانوی فوجاں نیں واشنگٹن تے ہلہ بولیا تے کئی تھانواں نوں اگ لا کے ساڑ دتا۔ مارٹن لوتھر کنگ دے قتل ہون تے 4 اپریل 1968 نوں ایس شہر چ فساد ہوۓ۔

واشنگٹن ڈی سی دی لوک گنتی 2012 نوں 632,323 سی جس نال ایہ امریکہ دی 25ویں وڈی نگری بندی اے۔ میری لینڈ تے ورجینیا توں کم ویلے آنوالیاں توں ایہ گنتی اک ملین توں وی ٹپ جاندی اے۔ واشنگٹن میٹروپولیٹن دی گنتی 5.7 ملین بندی اے تے اینج اے دیس دا 7واں وڈا میٹروپولس تھاں اے۔

امریکی سرکار دے تن تھم، کانگرس، صدر تے سپریم کورٹ ایتھے نیں۔ ایتھے ای کئی امریکی یادگاراں تے میوزیم نیشنل مال تے یا ایدھے دوالے نیں۔ ایس شہر وچ ای 176 سفارت گھر، دنیا دے وڈے اداریاں دے دفتر نیں۔ ایتھوں دا ای چنیا ہویا میئر تے 13 سنگیاں دی ٹولی شہر نوں چلاندی اے۔

جغرافیہ

واشنگٹن ڈی سی امریکہ دے چڑھدے ول وڈا سمندر اوقیانوس دے کنڈے تے اے۔ ضلعے دا کل تھاں 177 مربع کلومیٹر اے۔ جیدے چوں 159 مربع کلومیٹر سکی تھاں اے تے 18 مربع کلومیٹر تے پانی اے۔ ایہ ضلع دو امریکی صوبیاں میری لینڈ تے ورجینیا دے ولگن تے اے۔ ضلعے دے اتر لیندے ول مونٹگومری کاؤنٹی، میری لینڈ، چڑھدے ول پرنس جارج کاؤنٹی، میری لینڈ، ارلنگٹن کاؤنٹی دکھن ول تے الیگزینڈرہ لیندے ول اے۔ ضلعے چوں دریاۓ پوٹومک لنگدا اے ایدے وچ دو نکے دریا اناکوسٹا دریا تے راک کریک آکے ڈگدے نیں۔ ٹائیبر کریک وی اک نالہ اے پر 1870 توں ایہ تھلے تھلے لنگدا اے ایس ضلعے دی سب توں اچی تھاں فورٹ رینو پارک 125 میٹر سمندر توں اچی اے۔ ضلعے دے 19٪ دے نیڑے تھاں تے پارک نیں۔

تریخ

الگونکوین بولی بولن والے ناکٹوچٹانک لوک اناکوسٹا دریا دے دوالے ریندے سن جدوں 17ویں صدی وچ ایتھے یورپی لوک آۓ۔ 18ویں صدی دے مڈھ وچ ایہناں لوکاں نوں کتے ہور پیج دتا گیا۔ 1788 وچ جیمز میڈیسن نے امریکی سرکار لئی اک ایسے راجگڑھ دی مانگ کتی جیہنوں ایہ سرکار آپ چلا رئی ہوۓ تے جتھے ایدا راج ہوے۔ اودوں امریکی راجگڑھ امریکی صوبیاں وچ رۓ تے اپنے بچاؤ لئی صوبے دے متھاج سن۔ 1783 وچ ایس گل توں 5 ورے پہلے جدوں فلاڈیلفیا وچ امریکی کانگرس دی ملنی ہورئی سی تے کج لوکاں نے ملوزوری اوہناں نوں بندی بنالیا سی۔

9 جولائی 1790 نوں امریکی کانگرس پوٹومک دریا دے کنڈے تے امریکہ دا راجگڑھ بنان دی منظوری دیندی اے۔ اصل تھاں امریکی صدر جارج واشنگٹن نے چننی سی جینے 16 جولائی نوں ایس کم دی منظوری دتی۔ پہلا نقشہ ایہ سی جے راجگڑھ مربع مورت وچ ہوویگا تے ہر پاسہ دس میل (16 کلومیٹر) دا ہوویگا تے اینج ایدا تھاں 100 مربع میل (260 مربع کلومیٹر) ہوویگا۔ تھاں لاگے دے دو صوبیاں میری لینڈ تے ورجینیا نے دینی سی۔

تن کمشنر جیہڑے راجگڑھ بنان دے کم وچ لگے سن اوہناں راجگڑھ دا نان پہلے امریکی صدر تے امریکی ازادی دی لڑائی دے ہیرو جارج واشنگٹن دے ناں تے 9 ستمبر 1791 نوں واشنگٹن رکھیا۔ ضلعے دا ناں کولمبیا رکھیا گیا جیہڑا اوس ویلے امریکہ دا شاعرانہ ناں سی۔ ایتھے امریکی کانگرس دی پہلی ملنی 17 نومبر 1800 نوں ہوئی۔ 1801 نوں راجگڑھ تے ایدے دوالے دا تھاں امریکی سرکار نوں دیدتا گیا تے ایہنوں دو کاؤنٹیاں ایلیگزنڈریہ تے واشنگٹن وچ ونڈ دتا گیا تے ایہ میری لینڈ تے ورجینیا توں وکھرا ہوگیا۔ 1812 دی لڑائی وچ 24–25 اگست 1814 نوں برطانوی فوجاں نے کیپیٹل، ٹریری تے وائٹ ہاؤس نوں ساڑ دتا۔ فروری 1846 نوں ورجینیا توں لیا گیا تھاں اوہنوں واپس کردتا گیا تے ہن راجگڑھ دا سارا تھاں میری لینڈ دا دتا ہویا اے۔ 1850 وچ راجگڑھ وچ علامی دے بپار تے روک لادتی گئی پر غلامی تے نئیں۔ 1861 وچ امریکی کعر دی لڑائی دے مڈھ تے غلاماں دے ایتھے نس کے آن باجوں ایتھے دی لوک گنتی ودھ گئی۔ 1862 وچ لنکن نے راجگڑھ وچ غلامی دے مکن دے قنون تے کگی پھیری تے ایدے نال 3،100 غلام ازاد ہوۓ۔ 1868 وچ کانگرس نے شہر دے کالے مرداں نوں میونسپل کمیٹی دیاں چوناں وچ ووٹ پان دا حق دتا۔

1870 نوں شہر دی لوک گنتی 132,000 ہوگئی پر ایہ ہجے وی اک گندہ شہر سی۔ ایہنوں ٹھیک کرن لئی 1871 وچ اک قنون بنایا گیا تے شہر لئی اک نویں سرکار بنائی گئی امریکی صدر گرانٹ نیں روبی شیفرڈ نوں گورنر جنا بنا کے شہر نوں سوہنا کرن دے کم تے لادتا۔ شہر تے ٹھیک ہوگیا پر قرضے تھلے دبیا گیا۔ 1888 وچ پہلی سٹریٹکار چلائی گئی۔ ایسے ورے ای ایتھے نیشنل جیوگرافک سوسائٹی دا مڈھ رکھیا گیا۔ شہر ود ریا سی تے 1885 وچ جارج ٹاؤن نوں شہر نال رلا دتا گیا۔ 1900 دے مڈھ وچ شہر نوں سوہنا بنان دا کم نویں الیل نال ٹوریا گیا۔ 1930 دے دہاکے وچ نویاں سرکاری بلڈنگاں، میوزیم تے یادگاراں بنایاں گیاں۔ دوجی وڈی لڑائی نے سرکاری کماں نوں ودہایا تے راجگڑھ دی لوک گنتی وی ودھی جیہڑی 1950 وچ گاشاں تے اپڑ گئی۔

شہر دا سب توں پرانا مکان

1961 وچ امریکی صدر تے تھلویں صدر دی جنوتی لئی تن ووٹ دتے کۓ پر کانکرس وچ کوئی ووٹ نئیں سی۔ 4 اپریل 1968 نوں اک کالے امریکی سیاسی کمی مارٹن لوتھر کنگ دے قتل تے راجگڑھ وچ لڑائی مارکٹائی ہوئی جیہڑی 3 دن ہوندی رئی تے 13,600 فوجیاں نوں آکے ایہنوں روکنا پیا۔ ہٹیاں لٹ لیاں گیاں تے سرکاری کوٹھیاں نوں اگ لا دتی گئی۔ 1973 وچ راجگڑھ نوں چلان لئی اک نواں پربندھ بنایا گیا جیدے وچ اک مئیر تے اوہدے نال 13 لوکاں دی سنگت سی۔ پہلا مئیر اک کالا والٹر واشنگٹن سی۔ 11 ستمبر 2001 نوں کج لوکاں نے اک ہوائی جہاز نوں پینٹاگون نال ٹکرادتا۔ اک ہور جہاز جیہڑا واشنگٹن ول آریا سی اوہنوں اوہے پاندھیاں نے راہ وچ ای ڈیگ دتا۔

سرکار

جارج واشنگٹن یونیورسٹی

امریکی قنون باجوں واشنگٹن ڈی سی امریکی کانگرس تھلے اندا اے۔ کانگرس نے اپنے کج اختیار اک میر تے 13 سنگیاں دی اک ٹولی نوں دتے نیں۔ کانگرس جدوں چاہے اپنی مرضی کر سکدی اے۔ میر تے کونسل ٹیکس لگاندے نیں تے بجٹ بناندے نیں جینوں کانگرس ہاں یا ناں کردی اے۔ شہر کسے صوبے وچ نئیں آندا ایس لئی ایتھوں کوئی بندا کانگرس وچ نئیں جاسکدا۔

پڑھائی

جارج واشنگٹن یونیورسٹی

واشنگٹن وچ 123 سرکاری سکول نیں جنہاں وچ 2011-12 نوں 46,191 پرصیار پڑھ رۓ سن۔ ایتھے 92 پرائیویٹ سکول نیں جنہاں وچ 2008 وچ 18000 پڑھیار سن۔ ایتھے 11 یونیورسٹیاں تے کئی کالج نیں۔

آن جان

واشنگٹن دے ضلعے وچ گلیاں تے سڑکاں دی کل لمبائی 1,500 میل (2,400 کلومیٹر) اے۔ واشنگٹن میٹرو 27 مارچ 1976 نوں کھلی تے ایدے تے 88 سٹیشن تے ایہ 106.3 میل (171.1 کلومیٹر) لمی اے ایہ ہفتے وچ اک ملین پھیرے پاندی اے۔ میٹرو بس 4 لکھ سواریاں سفتے وچ ٹؤندی اے۔ یونین سٹیشن شہر دا وڈا ریلوے سٹیشن اے جتھے ہر دن 70,000 لوک آندے باندے نیں۔ ایس سٹیشن توں ایمٹریک دے 46 لکھ پاندھی ہر سال لنگدے نیں۔ شہر دے تن ہوائی اڈے نیں۔ واشنگٹن دی سیکل راہ 56 میل لمی اے۔

شہر وکھالہ

واشنگٹن ڈی سی اک طریقے سلیقے نال بنیا شہر اے۔ 1791 وچ امریکی صدر جارج واشنگٹن نے پیری شال لافان، اک فرانسیسی آرکیٹیکٹ نوں امریکی راجگڑھ دا نک نقشہ بنان دا کیا سی۔ لافاں دے نقشے وچ کھلیاں سڑکاں تے گلیاں مستطیل وجوں نکلدیاں سن۔ اوہدا نقشہ یورپی شہراں پیرس، میلان تے ایمسٹرڈیم ورگے شہراں دے نقشیاں تے سی جنہاں نوں تھامس جیفرسن یورپ توں لے کے آیا سی۔

آرکیٹیکچر

یونائیٹڈ سٹیٹس کیپیٹل

واشنگٹن دا آرکیٹیکچر اک جیا نہیں۔ امریکیاں دے پسندیدہ آرکیٹیکچر دیاں پہلیاں 10 بلڈنگاں وچوں 6 واشنگٹن وچ نیں جیہڑیان ایہ نیں: وائٹ ہاؤس، جیفرسن میموریل، یونائیٹڈ سٹیٹس کیپیٹل، لنکن میموریل، ویت نام فوجی یادگار۔ نواں کلاسیکی، جارجیائی، گوتھک تے نویں سٹائل ایہناں وچ دسدے نیں۔ واشنگٹن وچ ہور وی یورپی سٹائل دسدے نیں۔ 1765 وج بنیا جارج ٹاؤن وج اولڈ سٹون ہاؤس شہر دی سب توں پرانی کوٹھی اے۔

میوزیم تے ویکھن والیاں تھانواں

لنکن میموریل

نیشنل مال لنکن میموریل تے یونائیٹڈ سٹیٹس کیپیٹل دے وشکار اک کھلا تے وڈا پارک اے۔ اپنی مشہوری باجوں ایتھے سیاسی اکٹھ، موسیقی دے میلے، پارٹیاں تے نویں صدر دے بنن دی رلنی ہوندی اے۔ واشنگٹن مونومنٹ، وائٹ ہاؤس دے دکھن وچ ایدھے نال ای اے۔ ایدے تے ای دوجی وڈی لڑائی دی یادگار، کوریا دی لڑائی دی یادگار تے ویت نام فوجی یادگار نیں۔ مال دے دکھن وچ جپان دی سرکار ولوں دتے گۓ چیری دے رکھ نیں۔ فرینکلن ڈیلینو روزویل میموریل، جارج میسن میموریل، مارٹن لوتھر کنگ یادگار تے ڈسٹرکٹ آف کولمبیا وار میموریل وی ایتھے ای نیں۔

لوک

1 جولائی 2011 دی گنتی باجوں ایتھے 617,996 لوک وس رۓ سن۔ لوک گنتی نال واشنگٹن ڈی سی امریکہ دا 24واں وڈا شہر اے۔ 2009 دے اک آنکڑے وچ ایہ دیکھیا گیا جے ہر دن دی گنتی ملین توں ود دن نوں باہر توں کم کرن لئی ایتھے آن والیاں باجوں ہوجاندی اے۔ 2010 دے ای اک آنکڑے وچ دیکھیا گیا جے کالے ایتھوں دے لوکاں دا 50.7% ، گورے 38.5%، ایشیائی 3.5%، ہسپانوی 9.1%، پرانے انڈین امریکی 0.3%، ہور نسلاں دے 4.1%، رلے ملے 2.9% بندے نیں۔ 1970 وچ کالے 70% سن۔

شہر دے 72٪ لوک سائی، 6٪ ہور مذہباں نوں منن والے تے 18 ٪ دا کوئی مت نئیں۔

موسم

واشنگٹن دے چار موسم بندے نیں: بسنت، گرمیاں، پت جھڑ تے پالا۔ بسنت تے پت جھڑ مٹھے گرم ہوندے نیں پر گرمیاں وچ گرمی پیندی اے۔ پالے وچ برف وی ڈگدی اے۔ پالے وچ برف 15.6 انچ (40 سینٹی میٹر) دی اوسط نال ڈگدی اے۔ سال چ شہر دا گرمی ناپ 31 تے منفی 3 ڈگری سنٹی گریڈ دے ناپ دے وشکار ریندا اے۔ پر ایہ جولائی اگست وچ 41 تک وی اپڑیا ہویا اے۔ ہنیریاں تے پوٹومیک دریا وچ کدے کدے ہڑ وی اندے نیں۔

واشنگٹن ڈی سی دا موسم
ناپ	1	2	3	4	5	6	7	8	9	10	11	12
ریکارڈ اچا (°C)	22	24	28	33	36	40	40	40	37	32	26	23
اوسط اچا (°C)	6,2	7,5	13,7	19,2	24,2	29,1	31,7	30,9	26	20,4	14,3	8,7
اوسط نیواں (°C)	–2,6	–1,3	3,1	8,5	14,2	18	21,7	20,1	16,1	10,7	5,9	–0,3
ریکارڈ نیواں (°C)	–28	–26	–18	–4	3	10	11	11	5	–2	–12	–20
مینہ (mm)	97,4	90,3	90,1	81,7	107,1	103,3	90,6	96	97	85,5	84	107,9

جرم

غریبی، نشہ تے مافیا والے تھاں واشنگٹن ڈی سی وچ جرم دا کارن نیں تے 2010 دے اک حساب کتاب وچ ایہ ویکھیا گیا اے جے شہر دے 5٪ بلاکاں وچ 25٪ جرم ہوندے نیں۔ واشنگٹن دے اتر لیندے ول دے امیر پاسے جرم ولوں بچے سمجھے جاندے نیں پر شہر دے چڑھدے پاسے ول غریب تھانواں ول جرم ودے نیں۔ نیڑے تریڑے 60,000 لوک کسے ناں کسے جرم وچ پھڑے رۓ نیں۔ 1990 دے دہاکے وچ واشنگٹن نوں امریکہ دا قاتل راجگڑھ کیا جاندا سی۔ 1991 وچ 479 لوک قتل ہوۓ پر فیر ایہ گنتی چھیتی نال تھلے آئی۔

آرٹ

جان ایف کینیڈی سنٹر فار دی پرقارمنگ ارٹس

واشنگٹن امریکی آرٹ دا گرھ اے۔ جان ایف کینیڈی سنٹر فار دی پرقارمنگ ارٹس نیشنل سمفنی آرکسٹرا، واشنگٹن نیشنل اوپیرا تے واشنگٹن بیلٹ دا گھر اے۔ فورڈ تھیٹر جتھے امریکی صدر ابراہم لنکن نوں قتل کیتا گيا سی ہجے وی ڈرامے کرن دی تھاں اے تے نال ای میوزیم اے۔

ساک شہر	دیس
بنکاک	تھائی لینڈ
ڈاکار	سینیگال
بیجنگ	چین
برسلز	بیلجیم
ایتھنز	یونان
پیرس	فرانس
سیول	دکھنی کوریا
عکرہ	گھانا
روم	اٹلی
انکرا	ترکی

واشنگٹن وچ ویکھن والے تھاں

وائٹ ہاؤس یونائیٹڈ سٹیٹس کیپیٹل

جیفرسن میموریل لنکن میموریل

بارلے جوڑ

• شہر دی ویب سائیٹ

امریکہ دے شہر

واشنگٹن ڈی سی · نیو یارک شہر · شکاگو ·