یوکرین عوامی جمہوریہ

یوکرین عوامی جمہوریہ دا نشان

یوکرین عوامی جمہوریہ

یوکرینی عوامی جمہوریہ ، انقلاب روس دے بعد اج دے یوکرین دی بھوئیں (دھرتی) دے اک حصے تے قائم ہون آلی اک جمہوریہ سی ، جس دا سربراہ سیمون پتلیورا سی ۔ ایہہ ریاست 1917ء توں 1920ء تک قائم رہی ۔ اس دا راجگھر کیف شہر سی تے کرنسی دا ناں ہریونیا سی (اج دے یوکرین دی کرنسی دا وی ایہو ای ناں اے) ۔

سینترالنا رادا

سوشلیٹ اکثریت آلا سینترالنا رادا (مرکزی کونسل) 17مارچ 1917ء چ ، انقلاب فروری دے کجھ چر بعد قائم کیتی گئی (رادا یعنی "کونسل" ، جہڑا روسی اصطلاح سویت دے برابر اے) ۔ اس دا صدر معزز تریخ دان میخائلو ہروشیوسکی سی ۔ کیف (کیو) چ روسی عارضی حکومت تے بالشویکاں دے وچکار جنگ چ سینترالنا رادا نے اپنی حمایت بالشویکاں دے پچھے رکھی ۔ حکومتی فوجاں نوں شکست دے بعد باہر کڈن دے مگروں "رادا" نے 22 نومبر 1917ء نوں اک خودمختار یوکرینی جمہوریہ دا اعلان کیتا ، پر روس نال وی تعلق رکھئیا ۔ کجھ چر پچھوں دسمبر 1917ء چ اقتدار تے قبضہ کرن لئی بالشویکاں دے اک گروہ نے "ساریاں یوکرینی سویتاں دی کونسل" قائم کیتی ۔ پر کیو چ بالشویکاں دی مقبولیت دے فقدان پاروں جدوں اک کوشش ناکا م ہوگئی تے تد بالشویک خرکیو چلے گئے تے یوکرینی سویت اشتراکی جمہوریہ دے قیا م دا اعلان کیتا ۔ روسی بالشویک لال فوج سویت حکومت دی مدد لئی یوکرین چ داخل ہوگئی ۔

یوکرینی عوامی جمہوریہ دی اک ڈاک ٹکٹ

25 جنوری 1918ء چ سینترالنا رادا نے چوتھا یونیورسل جاری کیتا تے بالشویک روس نال تعلق توڑ کے آزاد یوکرینی ریاست دے قیام دا اعلان کیتا ۔ اس دے کجھ دناں مگروں ای لال فوج نے کیف دا محاصرہ کر لئیا ۔

بالشویکاں دے محاصرے تے اپنے بوہتے علاقے گوان دے مگروں رادا غیر ملکی مددلین تے مجبور ہو گئیا تے 9 فروری 1918ء چ جرمن سلطنت نال اسدا اتحادی ہون دا بریسٹ لیتووسک دا معاہدہ کیتا ۔ جرمنی نے بالشویکاں نوں یوکرین توں نکلن تے مجبور کر دتا ، پر اس وار یوکرینیاں دی اکثریت "رادا" دے سحر توں نکل چکی سی ۔ اندرونی جھگڑےآں دے اٹھن تے اپنےعلاقےآں تے موثر کنٹرول نا ہون دے پاروں جرمناں نے 29 اپریل 1918ء چ سنترالنا رادا نوں ختم کر دتا ۔ اس توں پہلے رادا نے یوکرینی عوامی جمہوریہ دا آئین دی منظوری دے دتی سی ۔