ہلاکو خان

ہلاکو خان شکار دے دوران آرام کر رہیا اے

ہلاکو خان (1217ہ توں 8 فروری 1265ء) ایل خانی سلطنت دا بانی تے منگول حکمران چنگیز خان دا پوتا سی ۔ چنگیز خان دے پتر تولی خان دے تن پتر سن ، اینہاں چوں اک منگو خان سی ، جہڑا قراقرم چ رہندا سی تے پوری منگول سلطنت دا خان اعظم سی ، دوجا پتر قبلائی خان سی جہڑا چین چ منگول سلطنت دا بانی سی ۔ جدوں کہ تیجا پتر ہلاکو خان سی ۔ منگو خان دے ویلے اتلے لہندے ایران خ اک اسماعلی گروہ حشیشین نے بوہت ہنگامہ تے خونریزی شروع کر دتی ۔ ایہہ علاقہ منگو خان دی حکومبت چ شامل سی اس لئی اوتھے دے لوکاں نے اس ظلم دے خلاف فریاد کیتی ۔ منگو خان نے اس شکایت تے اپنے بھائی ہلاکو خان نوں 1256ء چ ایران دا حاکم بنا کے بھیجیا تے اسنوں اسماعیلیاں دے خلاف کاروائی کرن دا حکم دتا ۔ ہلاکو خان نے ایسے سال اسماعیلیاں دے مرکز قلعہ الموت تے مل مار کر اسماعلی حکومت دا ہمیشہ لئی خاتمہ کر دتا تے اینہاں دے آخری بادشاہ خور شاہ نوں قتل کر دتا ۔ ہلاکو خان نے ای ایران چ ایل خانی سلطنت دی نیونہہ رکھی ۔