ہدواݨا

ہدواݨا
پچھاݨ
دیس:	بوٹے
برادری:	پھلوالے بوٹے
ٹبر:	کدو ٹبر
سائینسی ناں:	Citrullus lanatus

دواݨا، متیرا یا ہدواݨا اک ویل واݪا کدو ٹبر دا پھلانوالا بوٹا اے جیہدا اصل دیس جنوبی افریقا سی پر ہݨ ایہ ساریاں گرم تھانواں تے اگدا اے۔ ایہدے پھݪ دا ناں وی ایہو ای اے۔ ایہدا چھلڑ باہروں پدھرا ہُندا اے تے اوہدے اُتے گوڑھے ہرے رنگ دیاں دھاریاں ہُندیاں نیں۔

تریخ

ہدواݨا افریقا توں ساری دنیا وچ پھیلیا پر افریقا وچ کیہڑی تھاں توں ایہدے بارے پکا کسے نوں نہیں پتا۔ ایہدے مٹھے، پھکے تے کوڑے سواد والے وکھرے ہدواݨے افریقا وچ ہوچکے سن۔ چار ہزار ورھے پہلے مصر وچ ایہنوں نیل دیاں کنڈھیاں اُتے اگایا جارہیا سی۔ 12ویں ٹبر دے مشہور فرعون تتانخآمون دے مقبرے وچوں وی ایہدے بی لبھے نیں۔ ہدواݨیاں بارے بائبل وچ وی لکھیا اے جے اسرائیلی مصر وچ ایہنوں کھاندے سن۔

10ویں صدی وچ چین وچ وی ایہ اگایا گیا جتھے ایہ ݨن دنیا وچ سبھ توں چوکھا اگایا جاندا اے تے 13ویں صدی وچ ایہ عرباں دے نال سپین تے اوتھوں باقی یورپ پہنچیا۔ 16ویں صدی وچ ایہ امریکا پہنچیا۔

دکھاݪا

پھل دا چھلڑ پینڈھا تے ہرا ہوندا اے تے ایہ گول جاں لمبوترا ہوسکدا وا۔ ایہدا اندرلا گُودا پکݨ تے لال ہُندا اے کچا چٹا یا ہلکے رنگ دا ہُندا اے۔ ایہدے وچ %92 پانی تے %6 شکر ہُندی اے۔ ایہدا چھلڑ وی کھاݨ نوں ٹھیک اے تے چین وچ اوہدا اچار بݨاکے کھایا جاندا اے۔ ایہدے لال گُدے وچ لائکوپین ہوندی اے۔ ایہدیاں 1200 توں ودھ ونڈاں نیں۔ پکݨ اُتے ایہ لال، پیݪا، کھٹا تے چٹا ہوسکدا اے۔

مورتاں
پیلا ہدواݨا	بی باجھوں لال ہدواݨا	بی	چورس ہدواݨا