عائشہ

Wikipedia توں
جاو: مدد, کھوج

عائشہ (612 - 678) اک عرب مسلمان سوانی؛ اسلام دے موڈی محمد دی ٹبری تے پہلے خلیفہ ابو بکر دی تعی سی۔ اوہنے بوت ساریاں حدیثاں وی دسیاں نیں۔ تیسرے خلیفہ عثمان دے قتل تے نیاں منگن والے عرباں دی اوہ آگو سی تے ایس لئی علی دے خلاف لڑائی وی کیتی جنوں اونٹھ والی لڑائی کیندے نیں۔ اوہ 678 وچ مدینہ وچ مری۔ عائشہ عرب تے اسللامی تریخ دیاں سرکڈویاں لوکاں وچوں اک اے۔


عائشہ دی ماں دا ناں ام رومان تے پیو دا ناں ابو بکر سی تے اوہدا جوڑ قریش قبیلے دے اک انگ بنو تیم نال سی۔ عرب روہی تھانواں وچ بالغ ہون نال ای کڑی نوں ویاہ دندے نیں تے ایس کرکے اوہدا ویاہ نکی عمرے اسلام دے موڈی محمد نال ہویا۔ محمد دیاں ٹبریاں وچوں اوہ کلی کواری ٹبری سی۔ محمد نال اوہدی گوڑی سنگت سی۔ مرن ویلے محمد عائشہ کول ای سن تے عائشہ دے کوٹھے وچ ای محمد نوں دبیا گیا۔

محمد دے مگروں اوہدی ٹبری ، ابوبکر دی دھی تے آگو ہون تے اوہدی اک ٹوہر سی تے عرب مسلمان اوہنوں عزت نال ویکھدے سن۔

تیسرے خلیفہ عثمان نوں جدوں مدینے دے باہر توں فسادیاں نے آکے قتل کیتا تے مدینے وج لٹ مار کیتی، ایس گل تے عائشہ نے جیداری نال اگلی بنن والی سرکار کولوں نیاں منگیا تے قاتلاں نوں پھڑن تے سزا دین دی مانگ کیتی۔ جدوں اوہدی گل ناں منی گئی تے فیر اونٹھ والی لڑائی وچ عائشہ نے آگو دا کم کیتا تے عرب مسلماناں دی انصاف منگن دی مانگ لئی لڑائی تک اپڑ گئی۔ اوہ لڑائی جت تے ناں سکی پر اوہنے عرب مسلماناں دی نیاں تے انصاف دی تانگ نوں مکن ناں دتا۔ علی دی سرکار نوں مدینہ چھڈ کے کوفہ نواں راجگڑھ بنانا پیا۔

عائشہ محمد دی ٹبری تے ارہناں جوکھا نیڑے ہون باجوں اوہناں دیاں گلاں نوں ہر دن سندی سی تے ایس باجوں محمد دیاں گلان یا حدیثاں نوں دسن والیاں وچ اوہ اگے اے تے سب توں جوکھی ایتبار والی سمجی جاندی اے۔

عائشہ دی اسلامی تریخ وج ود مانتا ہون باجوں مسلماں عورتاں دا ناں اوہدے ناں تے رکھیا جاندا اے۔


مرن مگروں عائشہ نوں مدینہ وچ دبیا گیا۔

ہور ویکھو[لکھو]