لودھی سلطنت

Wikipedia توں
جاو: مدد, کھوج

دلی دی آخری سلطنت جہڑی 1451ء توں 1526ء تک قائم رہی ۔

1412ء سلطان محمود تغلق دے مرن مگروں سلطنت دلی چ کئی سال ہنگامے رہے تے سادات ٹبر مضبوط حکومت قائم کرن چ کامیاب نئیں ہو سکئیا ۔ پر 1451ء چ لہور تے سرہند دے پٹھان صوبے دار بہلول لودھی (1451ء توں 1489ء) نے دلی تے مل مار کے اک وار فیر مضبوط حکومت قائم کر دتی جہڑی لودھی سلطنت کہلائی ۔ اسنے جونپور وی فتح کر لئیا جتھے اک آزاد حکومت قائم ہو گئی سی ۔

دلی دی ایہہ لودھی سلطنت اگرچہ جونپور توں ملتان تک پھیلی ہوئی سی ، پے دلی دی مرکزی حکومت دے مقابلے چ بوہت چھوٹی سی ۔ اسدی حیثیت ساریاں مقامی حکومتاں وانگ صرف اک صوبائی حکومت دی سی ۔

لودھی ٹبر چوں سبتوں ودھ شہرت بہلول دے پتر سکندر لودھی (1489ء توں 1517ء) نوں حاصل اے ۔ آگرہ شہر دی نیہہ اسنے رکھی سی ۔ اوس ویلے چ آگڑہ دا ناں سکندرآباد سی ۔ شہر آباد ہون مگروں سکندر لودھی نے دلی دی بجائے آگرہ نوں راجگھر بنا لئیا۔

سکندر سادہ طبیعت دا سی ، مملکت دے انتظام تے رعایا دی خوشحالی چ لگئیا رہندا سی ۔ ہر 6 مہینے بعد محتاجاں تے مسکیناں دی فہرست اسدے ساہمنے پیش ہندی تے اوہ 6 مہینے لئی اینہاں دے وظیفے جاری کردا ، پر ایہہ غضے دا تیز سی جس پاروں اوہ کدی کدائیں ہندوآں نال زیادتی کر جاندا سی پر اوہ وفادار ہندوآں نال بوہت ودھئیا سلوک کردا سی ۔

سکندر لودھی دے ویلے چ ہندوآں نے پہلی وار فارسی پڑھنا شروع کیتی تےاسنے ہندوآںنوں سرکاری ملازمتاں دتئیاں ۔ اسدے ویلے چ سنسکرت دیاں کتاباں دا فارسی چ بولی وٹاندرا کیتا گئیا ۔

سکندر دے مگروں اسدا پتر ابراہیم لودھی (1517ء توں 1526ء) تخت تے بیٹھا ۔ ایہہ انتہائی نااہل حکمران سی ۔ اسنوں دلی دے لاگے پانی پت دے میدان ج کابل دے مغل حکمران ظہیر الدین بابر ہتھوں شکست ہوئی تے اینج لودھی سلطنت دا خاتمہ ہوئیا تے مغلیہ سلطنت دی بنیاد پئی ۔ ایہہ فیصلہ کن لڑائی پانی پت دی پہلی لڑائی کہلاندیاے۔