بلھن

آزاد انسائیکلوپیڈیا، وکیپیڈیا توں

بلھن، دریائے انڈس وچ رہݨ آلی ڈولفن مچھی اے۔ ایہ 2۔2 میٹر تک لمبی ہوسکدی اے تے ایہدی عمر 28 ورھے تک ریکارڈ ہوچکی اے۔ ایہنوں عرف عام وچ نابینا ڈولفن وی کہیا جاندا اے۔ جینیاتی طور تے ایہ قِسم نابینا نئیں ہُندی بلکہ اک اندازے دے مطابق دریاواں وچ ودھݨ والی آلودگی ایہدے نابینا ہوݨ دی وجہ اے۔ 1970ء توں 1998ء تک ایہدیاں قِسماں بارے کئی متضاد آراء قائم سن لیکن 1998ء وچ ایہناں نوں دو مختلف قِسماں وچ تقسیم کیتا گیا۔

جسمانی خاصیتاں[سودھو]

ایہناں دی تھوتھݨی لمبی تے اگے نوں نِکلی ہوئی ہُندی اے۔ چھوٹیاں مچھلیاں دے دَند تقریبن اک انچ تک لمبے ہُندے نیں، جد کہ دِکھݨ وچ پتلے تے تِرچھے ہُندے نیں۔ بلوغت تک ایہناں دے دنداں وچ بہرحال کئی تبدیلیاں رونما ہو چکیاں ہُندیاں نیں، جیہناں وچ دنداں دا چپٹا، سخت تے لمبوترا ہوݨا شامل اے۔ حالیہ اندازے دے مطابق ایہناں مچھلیاں دیاں اکھاں وچ روشنی منعکس کرن والے اعضاء کمزور پائے گئے نیں، گو کہ ایہ روشنی تے نھیرے وچ فرق کر سکدیاں نیں مگر اکھاں وچ ایہ تبدیلی ماحولیاتی آلودگی دا شاخسانہ گرداݨی جاندی اے۔ ایہناں دا رنگ بھورا ہُندا اے، جد کہ جِسم دا وسط کالے توں بھورا نما ہُندا اے۔