سدھنائی نہر
| سدھنائی نہر | |
|---|---|
| انتظامی تقسیم | |
ترمیم  |
سدھنائی نہر، پنجاب، پاکستان وچ اک نہر اے ۔ ایہ نہر دریائے راوی دے کھبے کنڈھے توں ملتان ڈویژن دے کھیتر نوں سنجن لئی کڈھی گئی سی ۔ اس نہر دا ناں سدھنائی تاں پیا کیونکہ ایہ راوی دریا دے تقریبن 12 میل اس حصے وچ پیندی اے، جِتھے راوی تلمبا دے مقام توں لے کے سرائے سدھو تک بِلکل سدھی بناں کسے وَل وِنگ توں وگدا اے ۔ ایہ نہر 1886 وچ چالو ہوئی، ایہدا ویئر 737 فٹ لمبا سی ۔ مین لائن دی چوڑائی 90 فٹ تے سمرتھا 1820 کیوسکس سی ۔ 30 میل دا سفر کرکے دو ڈسٹریبیوٹریاں نکلدیاں سن، جو کل پاݨی دا تیجا حصہ کھچ لیندیاں سن ۔ 11 ہور ڈسٹریبیوٹریاں رل کے 595 مربع میل دے کھیتر وچ آبپاشی کردیاں سن ۔ راوی دے اپرلے حصے وچ اپر باری دوآب نہر، راوی دا بوہتا پاݨی لے لیندی سی، بہار دے موسم وچ اتھے راوی وچ پاݨی بہت گھٹ جاندا سی، اس موسم دیاں فصلاں نوں کھوہاں دے پاݨی نال سنجیا جاندا سی ۔ پہلی جنگ عظیم توں بعد برطانوی حکومت نے آبپاشی کئی دیاں سکیماں تیار کیتیاں تے اوہناں دی اساری کیتی گئی ۔ کئی پراݨیاں پراجیکٹاں وچ لوڑ دے مطابق سودھ کیتی گئی ۔ سدھنائی نہر وی ایہناں وچوں اک سی ۔
اس نہر دی سبھ توں لمبی برانچ نہر شجاع آباد ناں دی اے، جیہڑی ملتان دے لہندے پاسے وگدی اے ۔ ایہدی ٹیل توں گجو ہٹاں ناں دی برانچ نکلدی اے ۔ اس نہر دیاں ڈسٹریبیوٹریاں دے ناں فاضل شاہ، چوپڑہٹا، حشمت مرولی، کوٹلی بھلا، ککڑہٹا، جیوالا، مدینا، سجانپور، نیلہر، کبیر والا، چنوان، ماہنی سیال تے میانی نیں ۔ اس نہر دے کھیتر وچ پنڈ وساؤن لئی کوئی پکے رول نئیں ، ملتان دے ڈپٹی کمیشنر نے پہلی وار 1927 وچ کچھ رولاں دی پروانگی دتی سی ۔ حویلی نہر نوں سدھنائی نہر وچ پاݨی دی مقدار ودھاؤݨ لئی ورتیا جاندا سی ۔