سید مجتبی خامنہ ای

سید مجتبی حسینی خامنہ ‌ای (پیدائش:8 ستمبر 1969ء)، ایرانی سیاست دان اَتے شیعہ عالمِ دین نیں جیہڑے 8 مارچ 2026ء توں ایران دے تیجے سپریم لیڈر دے طور تے خدمتاں انجام دے رہے نیں۔ اوہ ایران دے شہر مشہد وچ آذری فارسی نژاد خامنہ ای خاندان وچ جمے۔ انقلابِ ایران دے دوران جدوں اوہناں دے والد نمایاں سیاسی اَتے مذہبی شخصیت دے طور تے ابھرے تاں اس ویلے مجتبیٰ خامنہ ای دی عمر تقریباً نو سال سی۔ اوہناں نے مڈھلی تعلیم سردشت اَتے مہاباد وچ حاصل کیتی اَتے بعد وچ تہران دے مدرسہ علوی توں ثانوی تعلیم مکمل کیتی۔ اس توں بعد اوہناں نے اپنے پیو اَتے محمود ہاشمی شاہرودی دی رہنمائی وچ اسلامی علوم دی تعلیم حاصل کیتی۔

سنہ 1987ء وچ اوہ سپاہِ پاسدارانِ انقلابِ اسلامی وچ شامل ہوئے اَتے ایران عراق جنگ دے دوران خدمتاں انجام دتیاں۔ سنہ 1999ء وچ اوہناں نے ہور دینی تعلیم لئی حوزہ علمیہ قم وچ داخلہ لیا جتھے اوہناں نے مصباح یزدی، محسن خرازی اَتے لطف اللہ صافی گلپایگانی ورگے علما دے دروس وچ شرکت کیتی اَتے بعد وچ اوتھے ہی دینیات دے استاد وی بݨے۔ اوہ ایرانی سیاست دان غلام علی حداد عادل دے جوائی وی ہن۔ کجھ اطلاعواں دے مطابق مجتبیٰ خامنہ ای نوں ایران دے سکیورٹی اداریاں اَتے بسیج وچ خاصا اثر و رسوخ حاصل رہیا ہے۔ اسے طرحاں 2025ء وچ پیش آؤݨ والے اک وڈے اَتے غیر معمولی قتلِ عام دے سلسلے وچ وی اوہناں دا ناں لیا گیا ہے۔

سنہ 2005ء وچ ایرانی سیاست دان مہدی کروبی نے اوہناں اُتے صدارتی انتخابات وچ مداخلت دا الزام وی لایا سی۔ سنہ 2019ء وچ امریکی وزارتِ خزانہ نے مجتبیٰ خامنہ ای نوں اوہناں دے والد نال وابستہ بندیاں دے نال پابندیاں دی لسٹ وچ شامل کیتا۔ سیاسی نظریات اَتے فقہی موقف دے لحاظ نال اوہناں نوں ایرانی اصول پسنداں دے سخت گیر دھڑے وچ شمار کیتا جاندا ہے اَتے بعض اطلاعواں دے مطابق اوہناں دے تعلقات انتہائی نظریاتی علما نال وی گوڑے ہَن۔ اپنے والد علی خامنہ ای دے اسرائیل دے ہتھوں قتل اَتے 2026ء دی ایران جنگ دے دوران پیش آؤن والے واقعات توں بعد مجلسِ خبرگانِ رہبری نے اوہناں نوں ایران دا نواں سپریم لیڈر منتخب کیتا۔ تجزیہ کاراں دے مطابق اوہ اپنے والد دے مقابلے وچ ایران دے جوہری ہتھیاراں دے پروگرام دی ترقی دے زیادہ حامی سمجھے جاندے ہَن اَتے علی خامنہ ای دے جوہری ہتھیاراں دے خلاف فتوے دی نویں تعبیر دی حمایت کردے نیں۔