طنز

طنز (انگریزی: Satire) ادب، وِژُوئل آرٹس تے پرفارمنگ آرٹس دی اک صنف اے، جس وچ برائیاں، حماقتاں تے کوتاہیاں نُوں تضحِیک دا نشانہ بݨایا جان٘دا اے۔ اگرچہ طنز دا انداز عام طَور تے مزاحیہ ہُن٘دا اے، لیکن ایہدا وڈا مقصد اکثر تَعمِیری تنقِید ہُندا اے۔ طنز وچ تنقید دا عنصر پایا جان٘دا اے، تنقِید کار اُتے مُنحصِر اے کہ تنقِید تعمِیری اے یا محض تنقِید برائے تنقِید اے۔

عمُومن طنز و مزاح نُوں اِکو معنے وچ لیا جان٘دا اے، ایہناں لفظاں دا اِستَعمال وی اکٹّھا کِیتا جان٘دا اے، حالانکہ طنز تے مزاح وچ بہت فرق اے۔ دوناں دی اپݨی علیحدہ حدود نیں، لیکن ایہدے باوجُود ایہ اکثر اک دُوسرے دے متوازی وی چَل رہے ہُندے نیں تے بَعض دفعہ ایہناں دِیاں حدّاں اک دُوسرے ناݪ اِداں مِݪِیاں ہُندِیاں نیں کہ ایہناں دا فرق واضح کرنا اَوکھا ہو جان٘دا اے۔

اک طنز نگار مزاحِیہ پیرائے وچ اپݨے آس پاس دی دُنیا دِیاں تے معاشرے دِیاں ناہموارِیاں نُوں نشانہ بݨاؤن٘دا اے تے اوہناں پَِہلُوئاں نُوں بے نقاب کَردا اے جیہناں اُتے عام زِندگی وچ نظر نہیں پَین٘دی یا اوہناں اُتے گَل کرن دا حَوصلہ نہِیں ہُندا۔ طنز و مزاح دِیاں لِکھتاں وچ تعمِیری سطَح اُتے اوہناں معاملیاں دی عکاسّی بہترین انداز وچ کِیتی جا سَکدی اے جیہناں نُوں درُست کرنا ضرُوری ہُندا اے۔