پیلی صحافت

آزاد انسائیکلوپیڈیا، وکیپیڈیا توں

پیلی صحافت (انگریزی: Yellow journalism) صحافت دی اک گھٹیا شکل اے جیہدے چ کسے خبر دے سنسنی خیز پہلوآں تے زور دیݨ لئی اصل خبر دی شکل اینی بگاڑ دتی جاندی اے کہ ایہدا اصل پہلو خبر پڑھن آلے دی نظر توں اوجھل ہو جاندا اے۔ ایہ اصطلاح 19ویں صدی دی آخری دہائی چ وضع ہوئی جد نیو یارک دے اخباراں دے رپورٹر اپنے اخبار دی اشاعت ودھاؤݨ لئی اک دوسرے توں ودھ کے بھیانک تے ہیجان انگیز رپورٹنگ کر دے سن۔

اصطلاح[سودھو]

پیلی صحافت دی اصطلاح 1890 دی دہائی چ بݨی جد نیو یارک ورلڈ دے جوزف پُلِٹزر تے نیو یارک جرنل دے ولیئم رینڈولف ہرسٹ دے وچکار اشاعتی جنگ چ سنسنی خیز خبراں نوں نمایاں کرن لئی پیلے رنگ چ چھپائی کیتی جاندی سی۔ پیلی صحافت دے بارے چ ایہ وی روایت اے کہ پیلی صحافت دی اصطلاح اصل چ اک سنسنی خیز کامک سیریل توں ماخوذ اے جیہڑی Yellow kid دے سرناویں نال امریکی اخباراں چ چَھپدا ہُندی سی۔

سپینی امریکی جنگ[سودھو]

پیلی صحافت دی اشاعتی جنگ (Circulation War) اوس ویلے سِرے تے پہنچ گئی جد بعض اخباراں نے کیوبا چ سپینی فوجاں دے مظالم دیاں داستاناں خوب نوݨ مرچ لا کے چھاپیاں تے امریکی رائے عامہ نوں سپین دے خلاف اینا برانگیختہ کر دتا کہ امریکا تے سپین دی جنگ تقریبن ناگزیر ہو گئی۔