گوہر نصیبہ

آزاد انسائیکلوپیڈیا، وکیپیڈیا توں

گوہر نصیبہ 13 ویں صدی عیسوی دی اک سلجوق شہزادی سی جہڑی سلجوق سلطان قلچ ارسلان II دی دھی تے کیخسرو I دی بھین سی ۔ ترکی دے شہر قیصری (قیصریہ) چ اس دے ناں نال موسوم شفاخانہ (دارالشفاء) ، طبی تعلیم لئی اک ادارے تے مسجد نے اسنوں لافانی حثیت دے رکھی اے ۔ ایہہ عمارتاں (کمپلیکس) سلجوق طرز تعمیر دا اک وڈا شاہکار اے تے اج وی قیصری شہر چ شہزادی دی یاد دلاندا اے ۔ ایہہ شفا خانہ 1204ء توں 1206 دے وچکار اسارئیا گئیا جدوں کہ مدرسہ 1206ء چ گوہر نصیبہ دے انتقال دے مگروں تعمیر ہونہ شروع ہوئیا تے 1210ء چ مکمل ہوئیا ۔ دارالشفاء ، مسجد تے طبی تعلیمی مدرسے تے مشتمل ایہہ سارا کمپلیکس شہزادی گوہر نصیبہ دے ناں نال ای موسوم اے ۔ کہئیا جاندا اے کہ موت دے بستر تے گوہر نصیبہ نے اپنے بھائی کیخسرو اول دے ساہمنے اپنی آخری خواہش دسی کہ اک دارالشفاء بنائیا جائے جتھے ذہنی مریضاں دا مفت علاج کیتا جائے ۔ ایسے خواہش نوں پورا کرن لئی کیخسرو نے ایہہ شفا خانہ تعمیر کروائیا ۔ اس ہسپتال دے بارے چ ایہہ کہئیا جاندا اے کہ دنیا چ ذہنی مریضاں دا علاج کرن آلا ایہہ پہلا شفاخانہ سی ۔ اس دے علاوہ سلجوقیاں دی پہلیاں تعمیراں چوں ایہہ کلی(اکو) عمارت اے جہڑی اج تک سلامت اے ۔ ایہہ شفا خانہ اج وی طب نال وابستہ اک عوامی عجائب گھر دے طور تے موجود اے ۔ قیصری دی سب توں وڈی یونیورسٹی دے ہسپتال دا ناں وی گوہر نصیبہ دے ناں تے رکھئیا گئیا اے ۔