گیری مینڈرنگ

مارچ 1812 وچ چھپیا، ایہ سیاسی کارٹون ڈیموکریٹک ریپبلکن پارٹی دے حق وچ میساچوسٹس مقننہ دی طرفوں نویں بݨائے گئے جنوبی ایسیکس دے ریاستی سینیٹ دے انتخابی ضلعے دے رد عمل وچ بݨایا گیا سی۔ کیریکیچر ضلع دی عجیب و غریب شکل نوں ڈریگن نما "عفریت" دے طور تے طنز کیتا گیا اے، تے فیڈرلسٹ اخبار دے ایڈیٹرز تے اس وقت دے دیگر افراد نے ایہنوں سیلامینڈر ناݪ تشبیہ دِتی سی

گیری مینڈرنگ یا جیری مینڈرنگ (gerrymandering)، نمائندہ جمہوریتاں وچ، انتخابی حلقےآں دی حد بندی وچ سیاسی ہیرا پھیری اے جیہدا مقصد کِسے جماعت، گروہ، یا سماجی اقتصادی طبقے لئی غیر مناسب فائدہ حاصل کرنا اے۔ اس ہیرا پھیری وچ "کریکنگ" (کئی حلقےآں وچ مخالف پارٹی دے حامیاں دی ووٹنگ دی طاقت نوں کمزور کرنا) یا "پیکنگ" (دوسرے حلقےآں وچ مخالف پارٹی دی ووٹنگ دی طاقت نوں اک حلقے وچ مرکوز کرنا) شامل ہوسکدا اے۔ گیری مینڈرنگ نوں برسر منصب شخصیات نوں محفوظ کرن لئی وی ورتیا جاسکدا اے۔ وین ڈاکنز نے ایہنوں ووٹراں ولوں اپݨے سیاستداناں نوں مُنتخب کرن دی بجائے سیاست داناں ولوں اپݨے ووٹراں نوں منتخب کرن دے طور تے بیان کیتا اے۔

گیری مینڈیرنگ دی اصطلاح ایلبریج گیری تے سیلامینڈر دا لفظی مرکب اے۔ مینڈرنگ دا مطلب کُعھمݨ کعھیری یا وَݪ وِنگ اے۔ ایلبریج گیری اپݨی وفات دے وقت ریاستہائے متحدہ امریکا دے نائب صدر سی، جیہناں نے 1812ء وچ میساچوسٹس دے گورنر دی حیثیت ناݪ اک بل اُپر دستخط کیتے جیہنے بوسٹن دے علاقے وچ اک جانبدار حلقہ بݨایا سی جیہدا موازنہ اک غیر معقول شکل توں کیتا گیا۔ اس اصطلاح دے منفی مفہوم نیں تے گیری مینڈرنگ نوں ہمیشا جمہوری عمل وچ بدعنوانی سمجھیا جاندا اے۔ غیر منصفانہ تے غیر معقول حلقہ بندی دے نتیجے وچ بݨݨ آݪے حلقے نوں گیری مینڈر دے نام توں جاݨیا جاندا اے۔

لفظ "گیری مینڈر"، پہلی وار بوسٹن گزٹ وچ 26 مارچ 1812ء نوں استعمال ہویا سی۔ ایہ سیاسی کارٹون سی، جیہدے وچ ایسیکس کاؤنٹی، میساچوسٹس وچ ریاستی سینیٹ دے اک حلقے (ڈسٹرکٹ) نوں پنجےآں، پراں تے اک ڈریگن دی قِسم دے سر دے ناݪ اک عجیب جانور دے طور تے دکھایا گیا سی، جس توں حلقے دی عجیب شکل اُتے طنز گئی سی۔