یونیئن کونسل
یونیئن کونسل (Union council) مقامی حکومت دا اک ادارا یا اکائی اے جیہڑی وارڈ توں اُتے تے میونسپلٹی، تحصیل تے ضلعے توں تھلے ہُندی اے۔ یونیئن کونسل دے فرائض وچ بنیادی تعمیرات، سڑکات، سالڈ ویسٹ مینجمنٹ، نکاسی آب، فراہمی آب تے سماجی بہبود سمیت کئی امور شامل نیں۔
یونیئن کونسلاں پاکستان تے بنگلا دیش وچ بطور بلدیاتی ادارا موجود نیں۔
پنجاب، پاکستان دے بلدیاتی ایکٹ دے مطابق یونیئن کونسل دا ادارا قائم اے۔ یونیئن کونسلاں دیہی تے شہری دوناں علاقیاں وچ قائم کیتیاں گئیاں نیں۔ دیہی یونیئن کونسل وچ کئی پنڈ شامل ہُندے نیں، ہر پنڈ اک وارڈ دا درجا رکھدا اے تے شہری یونیئن کونسلاں، شہر نوں مُختلف علاقیاں وچ وَنڈ کے بݨائیاں جاندیاں نیں۔ یونیئن کونسل وچ مُنتخب چیئرپرسن، وائس چیئرسن تے کونسلرز ہُندے نیں، جیہناں دا اِنتخاب یونیئن دی حدود دے ووٹر براہ راست کردے نیں۔ یونیئن کونسل دے امور چلاؤݨ واسطے محکما لوکل گورنمنٹ ولوں اک سیکرٹری یونیئن کونسل تے ہور سرکاری ملازمین تعینات کیتے جاندے نیں۔