چھانݨی
چھانݨی، اک برتݨ یا برتݨ ورگا آلہ اے، ایہ عام طور تے باورچی خانے وچ ورتی جاندی اے۔ ایہنوں آٹا، پیسے ہوئے جَوں، باجرا، چاہ پتی وغیرا چھانݨ لئی ورتیا جاندا اے۔[۱] ایہ وکھ وکھ سائز، ڈیزائن تے قِسماں دیاں ہُندیاں نيں تے ایہدے وکھ وکھ استعمالات ہُندے نيں، باورچی خانے توں لے کے ریت چھانݨ تک ایہدیاں وکھ وکھ قِسماں استعمال کیتیاں جاندیاں نیں۔
چھانݨی دی بناوٹ
[سودھو]چھانݨی عام طور تے گوݪ ہُندی اے ایہ چھوٹے وڈے ہر سائز دی ہُندی اے، ایہ اک گوݪ کولے یا ڈونگھی تھاݪی دی شکل دی ہُندی اے جیہدے تھلے باریک سراخ ہُندے نیں یا جاݪی لگی ہُندی اے۔ جس توں آٹا تے ہور چھانݨ آݪیاں چیزاں وچ موجود موٹے ذرات چھانݨی وچ ای رہ جاندے نيں۔
چھانݨی یا چھانݨے دیاں قِسماں
[سودھو]- چھانݨی: آٹا، پیسے ہوئے جَوں، باجرا، چاہ پتی وغیرا چھانݨ دے کم وچ استعمال ہُندی اے۔
- چاہ پوݨی: جیہدے ناݪ چاہ نوں پُݨیا جاندا اے تاکہ پتی نوں چاہ وِچوں کڈھیا جاسکے۔ ایہ چھوٹے سائز دی ہُندی اے ایہدے ناݪ ڈنڈی وی لگی ہُندی اے جیہنوں پھڑ کے گرم چاہ پُݨی جاندی اے۔
- کفگیر: وڈے سائز دی ڈنڈی آݪی چھانݨی اے جیہدے ناݪ گرم پکوڑے تے تیل وچ تݪن آݪیاں چیزاں چھاݨیاں جاندیاں نيں۔
- چھانݨا: وڈے سائز دا ہُندا اے جیہدے ناݪ وڈیاں چیزاں چھاݨ کے فالتو ذرات یا مواد نوں وکھ کیتا جاندا اے۔
- ریت چھانݨا: جیہدے ناݪ ریت وغیرا چھاݨی جاندی اے تاکہ ریت وِچوں روڑیاں وکھ کیتیاں جاسکݨ۔
حوالے
[سودھو]- ↑ Ruhlman, Michael (2007). The Elements of Cooking: Translating the Chef's Craft for Every Kitchen. Simon and Schuster, 216. ISBN 978-1-4391-7252-0.