حزب اللہ
لبنان چ حزب اللہ شیعہ مسلماناں دی اک انتہائی طاقتور سیاسی تے فوجی تنظیم خیال کیتی جاندی اے ۔ ایران دی پشت پناہی نال 1980ء چ بنن آلی ایہہ جماعت لبنان توں اسرائیلی فوجی دستےآں دے انخلاء لئی جدوجہد کیتی ۔ تنظیم نوں مئی 2000ء چ اپنے اس مقصد چ کامیابی ملی ۔ اس عمل دے پس منظر ج جماعت دی عسکری شاخ اسلامی مزاحمت دا ہتھ سی ۔
لبنان تے اسرائیلی قبضے دے مگروں علماہ دے اک نکے جہے گروہ توں اٹھن آلی ایہہ تنظیم کے وڈےآں مقصداں چ اسرائیل دے خلاف مزاحمت تے لبنان توں غیر ملکی فوجاں دا انخلا سی ۔
اس دا اک مقصد ایہہ وی سی کہ لبنان دی کثیر المذہبی ریاست دی تھاں ایران ورگی اسلامی ریاست بنائی جائے پر بعد چ ایہہ خیال چھڈ دتا گئیا ۔
ایران ولوں حزب اللہ نوں اک لمبے چر تک مالی تے عسکری امداد دتی جاندی رہی اے ۔ حزب اللہ ماضی چ دباء لئی غیر ملکی لوکاں نوں اغوا وی کردی رہی اے ۔
لبنان چ شیعہ اکثریت چ نیں تے ایہہ تحریک لبنان چ وسن آلے شیعہ فرقے دی نمائندگی کردی اے ۔ لبنان توں اسرائیلی فوجی دستےآں دے انخلا نال اس تنظیم نے عام لوکاں دے دلاں چ جگہ بنا لئی ۔ ہن لبنان دی پارلیمنٹ چ اس جماعت دے امیدواں دی خاصی گنتی موجود اے ۔ اس دے نال ای سماجی ، معاشرتی تے طبی خدمات دے حوالے نال اس تنظیم نے لوکاں چ مقبولیت حاصل کر لئی اے ۔ جماعت دا اپنا ٹیلی ویژن چینل " المینار" دے ناں توں قائم اے ۔
اقوام متحدہ دی قرار داد 1559 دے تحت اس جماعت دی عسکری شاخ نے ہتھیار رکھن توں انکار کردتا سی ۔ ایہہ قرار داد 2004ء چ منظور کیتی گئی سی تے اس چ لبنان توں غیر ملکی فوجاں دے انخلا تے مسلح گروہاں توں ہتھیار رکھن دا مطالبہ کیتا گئیا سی ۔
جون 2006ء چ اسرائیل دے دو فوجیاں دے اغوا دے بعد اسرائیل نے لبنان تے حملہ کر دتا ۔ تیہہ(30) دناں توں ودھ چر تک رہن آلی اس جارحیت چ لبنان راکھ دا ڈھیر بن گئیا ۔ تے ہزاراں لوک شہید ہوئے ۔اوس ویلے صرف حزب اللہ ورگی نکی جماعت نے اسرائیل دا ڈٹ کے مقابلہ کیتا ۔ 30 دن توں ودھ جاری رہن آلی اس لڑائی چ لہندے ایشیاء دی سب توں وڈی فوجی طاقت نوں حزب اللہ دے ہتھوں شکست دا ساہمنا کرنا پئیا تے 14 اگست 2006ء دی صبح جنگ بندی دا اعلان ہوئیا ۔
حزب اللہ دے موجودہ سربراہ سید حسن نصراللہنیں۔
