مینڈارن بطخ

آزاد انسائیکلوپیڈیا، وکیپیڈیا توں
مینڈارن بطخ
جوڑی
دیس: جنور
برادری: کورڈیٹ
ٹولی: پنچھی
پتی: پانی پنچھی
ٹبر: بطخاں
ٹوکرہ: بطخ
سائینسی ناں: Aix galericulata
Aix galericulata

مینڈارن بطخ چڑھدے ایشیاء دی مدھرے ناپ دی اک بطخ اے۔ اپنی سہنپ توں ایہ چنگی لگدی اے۔ ایہ 41–49 سینٹی میٹر لمی اے تے پرپسار 65–75 سینٹی میٹر اے۔

ناں[سودھو]

ایس بطخ دا ناں 'مینڈارن' چین دے شاہی ویلے دے اتلی پدھر دے سجے سنورے افسراں توں پیا اے۔ ایہ بطخ وی اوہناں ورگی سجی سنوری تے شنگھاری لگدی اے۔

وکھالہ[سودھو]

نر بطخ دی سہنپ اک ادھارن اے تے دوروں پشانیاں جاندا اے۔ ایہدی لال چنج، اکھاں اتے ادھا چٹا چن، لال مونہ تے بریک پراں دیاں مجھاں جیاں بنیاں ہوندیاں نیں۔ چھاتی جامنی اے تے ایھدے تے آمنے سامنے بنیاں دو چٹیاں لیکان ہوندیاں نیں۔ پاسے اچے رتے تے کھٹے بادبان بنے ہوندے نیں۔ مادھ سانولے پھکے رنگ وچ لکڑ بطخ وانگوں اے۔ ایہدی اک دے دوالے چٹا چکر اے جیہڑے فیر اک لیک وانگوں پجھے ول جاندا اے۔

پسار[سودھو]

مینڈارن بطخ دا اصل دیس اتری چڑھدا ایشیاء اے جتھے 1000 دے نیڑے جوڑے ہے نیں تے جپان جتھے ایہناں دا گنتی 5000 جوڑیاں دے نیڑے اے۔ ایہناں دی گنتی ایہناں دے تھاں تے رکھاں دے مکن باہجوں ہوئی اے۔

ایہ دوسرے دیساں وچ وج وی لیائی گئی تے برطانیہ وچ ایہناں دی کنتی 7000 دے نیڑے اے۔ کیلیفورنیا امریکہ وچ ایہ ہے نیں۔

رہن[سودھو]

مینڈارن بطخ گھنے جنگلاں وچ کسے چھپڑ دے کنڈے دے کھڑے رکھ دی کھڈ وچ آنڈے دیندے نیں۔ اپریل توں مئی وچ 9 توں 12 تک آنڈے دتے جاندے نیں۔ نر آپ دے آنڈیاں تے نہیں بیٹھدا مادھ ای بیٹھدی اے پر چوجے نکلن تک راکھی کردا اے۔ چوچے نکلن مگروں مادھ بطخ باہر کھلے ویہڑے ول جاندی اے تے اوتھوں کواکاں مارکے چوچیاں نوں بلاندی اے۔ جدوں سارے چوجے باہر آجان تے فیر بطخ اوہناں نون لے کے پانی ولج آندی اے۔

کھان پین[سودھو]

ایہ پتے تے بی کھانی اے۔ ایہ سنییل کیڑے تے نکیاں مچھیاں وی کھا جاندی اے۔ رت دے پلٹن نال ایس دا کھان پین وی بدلدا اے۔

رہتل وچ[سودھو]

چینی رہتل وچ مینڈارن بطخ دی اچیچی تھاں اے۔ ایہاں دے جوڑیاں دے ساری عمر تک کٹھا رہن باہجوں ایس نوں ویاہ، پیار تے لمے ساک دی نشانی منیا جاندا اے۔ کوریائی رہتل وچ ایس نوں امن، پیار، سکھ تے چوکھے نیانیاں دی نشانی منیا جاندا اے۔

مورت نگری[سودھو]

بارلے جوڑ[سودھو]