ایئر کنڈیشننگ
ایئر کنڈیشننگ اے سی (Air conditioning) کسے بند جگہ وچ بادگردانی، رطوبت، حرارت تے ہوائی صورت حال نوں حسب ضرورت رکھݨ دا عمل اے ۔ ایئر کنڈیشنگ گھریلو تے تجارتی دوناں مقاصد لئی استعمال کیتا جا سکدا اے ۔ ایہ عمل زیادہ تر اندرونی ماحول نوں زیادہ آرام دہ تے پرسکون بݨوݨ لئی استعمال کیتا جاندا اے، جو عام طور تے انساناں یا جانوراں لئی ہُندا اے ۔ایئر کنڈیشنر کمرےآں وچ برقی آلات ، جِداں کمپیوٹر سرورز، پاور ایمپلیفائرز توں پیدا ہوݨ والی حرارت نوں ٹھنڈا کرن یا بعض اوقات نمی دی مقدار نوں کَعھٹ کرن لئی وی استعمال ہُندا اے ۔
ایئر کنڈیشنر اکثر کسے پنکھے دے استعمال نال کسے مقام ، جِداں گھر یا کار وغیرا دی ہوا دی صورت حال وچ مناسب یا مطلوب تبدیلی کر کے اندرونی حصے نوں آرام دہ بݨوندا اے ۔
گنجائش
[سودھو]اے سی دی گنجائش یا صلاحیت نوں ٹن نال ناپیا جاندا اے ۔ ایہدا اے سی دے وزن نال کوئی تعلق نئیں ۔ ماہرین دے مطابق قدیم دور وچ جد ائیر کنڈیشنر ورگی ٹیکنالوجی دا کوئی تصور نئیں سی تے گھراں نوں ٹھنڈا کرن لئی برف دا استعمال کیتا جاندا سی ۔ دور دراز پہاڑاں توں لیائی جاݨ آلی اس برف نوں گھراں نوں ٹھنڈا کرن لئی استعمال کیتا جاندا سی کیونکہ ایہ برف ٹناں دے حساب نال لیائی جاندی سی ، لہاذا ٹھنڈک دی پیمائش وی ٹناں وچ کیتی جاݨ لَگ گئی ۔ ائیرکنڈیشننگ دے ماہر ایلی سن ڈیلز دے بقول اک ٹن دے ائیرکنڈیشنر توں مراد اک ایہجا ائیر کنڈیشنر اے جیہڑا فی گھینٹھا 12000 برٹش تھرمل یونٹ (BTU) حرارت کمرے چوں کَڈھ سکدا اے ۔ اک بی ٹی یو توں مراد اِنی حرارت اے جیہڑی ماچس دی اک تیلی نوں مکمل طور تے جلائے جاݨ نال حاصل ہو سکدی اے ۔ جے اک ٹن برف ہووے تاں ایہنوں مکمل طور تے پگھلݨ لئی 288،000 بی ٹی یو حرارت دی ضرورت ؤ گی ۔ جے اک ٹن برف نوں 24 گھینٹھے وچ مکمل طور تے پگھلوݨا ہووے تاں ایہنوں 288،000 بی ٹی یو حرارت 24 گھینٹھے دے درمیان فراہم کرنی پیݨی اے ، جیہڑی فی گھینٹھا تقریبن 12 ہزار بی ٹی یو بَݨدی اے ۔ اس حساب نال کہیا جاسکدا اے کہ اک ٹن دا اے سی اک گھینٹھے وچ تقریبن 12 ہزار بی ٹی یو حرارت نوں کمرے چوں کَڈھ سکدا اے یعڻی اِنی حرارت اے جیہڑی 24 گھینٹھے وچ اک ٹن برف نوں پگھلوݨ لئی کافی ہوؤ گی ۔