باسفورس پل

آزاد انسائیکلوپیڈیا، وکیپیڈیا توں
باسفورس پل

باسفورس پل استمبول ترکی چ باسفورس تے بنیا اک پل اے ، ایہہ شہر دے یورپی پاسے اورتاکوئے تے ایشیائی علاقے بیلربے نوں ملاندا اے تے باسفورس تے قائم ہون والا پہلا پل اے ۔ ایہہ پل 1510 میٹر لمبا اے جدوں کہ اسدی چوڑائی 39 میٹر اے ۔ اسدے دوناں برجاں دے وشکار 1074 میٹر پینڈا اے تے سڑک دی سطح توں اچائی 105 میٹر اے ۔ ایہہ سمندر توں 64 میٹر اچّا اے ۔ ایہہ 1973ء چ بنن دے مگروں دنیا دا چوتھا سب توں وڈا معلق پل بن گئیا تاہم امریکہ دے باہر ایہہ دنیا دا سب توں وڈا پل اے ۔

تریخ[سودھو]

فائل:Bosphorus Bridge Istanbul Night.jpg
باسفورس پل

باسفورس تے پل دے بنان دا فیصلہ پہلی وار 1957ء چ عدنان میندریس دے دور حکومت چ کیتا گئیا ۔ اس دے نقشے لئی برطانیہ دے ادارے فری مین فاکس اینڈ پارٹنرز نال معاہدے تے دستخط ہوئے ۔ پل دا نقشہ معروف برطانوی ماہر تعمیرات سر گلبرٹ رابرٹس نے تیار کیتا ۔ تعمیر دا آغاز فروری 1970ء چ ہوئیا ، جس چ اس ویلے دے صدر جودت سونے تے وزیراعظم سلیمان ڈیمرل نے شرکت کیتی ۔ تعمیراتی کم ترک ادارے " انکا انسات و صناعی " نے انجام دتا ۔ اس کم چ برطانیہ تے جرمنی دے 2 ادارے وی شامل سن ۔ منصوبے تے 135 انجینیئراں تے 400 دوجے لوکاں نے کم کیتا ۔ پل دی تعمیر جمہوریہ ترکی دی 50ویں سالگرہ دے اک دن بعد 30 اکتوبر 1973ء نوں مکمل ہوئی ۔ اسدا افتتح صدر فہری کوروترک تے وزیر اعظم نعیم تولو نے کیتا ۔ باسفورس پل دی تعمیر تے 20 کروڑ امریکی ڈالر دی لاگت آئی ۔

آواجائی[سودھو]

ہر روز تقریبا 1 لکھ 80 ہزار گڈیاں اس پل توں لنگھدیاں نیں ۔ 29 دسمبر 1997ء نوں اس پل توں اک ارب ویں گڈی لنگھی ۔ اس پل نوں استعمال کرن لئی محصول دینا پیندا اے تے اس کم لئی پل دے ایشیاء دے بنھے ٹول پلازہ واقع اے ۔ محصول صرف یورپ توں ایشیاء دے پاسے آن لئی دینا پیندا اے جدوں ایشیا توں یورپ ول جان دا کوئی محصول نئیں ۔

دوجے استعمال[سودھو]

فائل:Bosphorus Bridge night skyline panorama.jpg
باسفورس پل تے استمبول دا چاملیجا پہاڑی توں منظر

بین البراعظمی استمبول یوریشیا میراتھن چ حصہ لین آلے کھیڈاری وی اس پل دے راہیں آبنائے باسفورس پار کردے نیں ۔ ایہہ دوڑ ہر سال اکتوبر چ ہندی اے ۔ جس دا آغاز استمبول دے ایشیائی حصے توں ہندا اے تے اس دا احتتام استمبول دے یورپی حصے چ ہندا اے ۔ ، اس دوران پل نوں گڈیاں لئی بند کردتا جاندا اے ۔ اس دے علاوہ پل توں چھال مار کے خودکشی کرنے دا رجحان وی موجود اے تے 2001ء چ باسفورس تے واقع پلاں توں چصلاں مار کے 146 لوکاں نے خودکشی دی کوشش کیتی ، جنہاں چوں 24 لوک اپنی جان توں گئے ۔ 2002ء چ 190 بندیاں نے خودکشی دیاں کوششاں کیتیاں تے 30 جنے ہلاک ہوئے ۔

دلچسپ معلومات[سودھو]

فائل:Bosphorus Bridge 01 Motorway.jpg
باسفورس پل ایشیاء تے یورپ وچکار رابطہ
فائل:Bosphorus Bridge and the Moon.jph
باسفورس پل تے چند

مئی 15، 2005ء چ معروف امریکی ٹینس کھیڈاری وینس ولیمز نے باسفورس پل تے مقامی کھیڈاری نال نمائشی مقابلہ کھڈیا جہڑا تریخ دا پہلا مقابلاہ سی جہڑا 2 براعظماں تے منعقد ہوئیا ۔

جولائی 17 ، 2005ء چ معروف برطانوی فارمولا ون ڈرائیور ڈیوڈ کولٹ ہارڈ نے اپنی تیز رفتار کار اس پل تے دوڑائی تے لوکاں توں داد لئی تے اپنی کار دولما باغچہ محل دے اک باغیچے چ کھڑی کیتی ۔