بیتل

بیتل

بیتل

بیتل بکریاں پنجاب دی اک نسل اے جیہنوں ددھ تے گوشت دی پیداوار لئی ورتیا جاندا اے۔ ایہنوں لہوری بکرا وی کہیا جاندا اے۔ ایہ وڈے جسم دے سائز آݪا چنگا ددھ دیݨ آݪا جانور سمجھیا جاندا اے۔ کَن چپٹے لمبے گھماؤ تے جھکے ہوئے نیں۔ ایہناں دی کھل ایہناں دے وڈے سائز دی وجہ توں اعلا کوالٹی دی سمجھی جاندی اے، جیہناں توں کپڑے، جُتیاں تے دستانے بݨاؤݨ لئی باریک چمڑے ورگے velour، سابر تے chamois دی پیداوار ہُندی اے۔ بیتل بکرے پورے برصغیر وچ مقامی بکریاں دی بہتری لئی وڈے پیمانے تے استعمال ہُندے رہے نیں۔ ایہناں بکریاں نوں اسٹال فیڈنگ لئی وی پاݪیا جاندا اے، اس لئی ایہناں نوں فارمنگ لئی ترجیح دتی جاندی اے۔

آبائی علاقہ

بیتل بکریاں بنیادی طور تے پنجاب وچ ضلع ٹوبھا ٹیک سنگھ، ضلع ساہیوال، ضلع جھنگ، ضلع اوکاڑا، ضلع قصور، ضلع لہور،ضلع گجرات، ضلع جہلم، ضلع سرگودھا تے ضلع فیصل آباد وچ پائیاں جاندیاں نیں۔

خواص

ایہناں بکریاں دا رنگ سنہری، بھورا، کاݪا، چتکبرا، کاݪا دھبے دار، سر وڈا، نک چوڑا، کَن لمبے چوڑے لٹکے ہوئے ہُندے نیں۔ نر وچ سِنگ لمبے تے پیچدار، مادہ وچ چوڑے ہُندے نیں۔ ایہناں دیاں لتاں لمبیاں تے پونچھ چھوٹی ہُندی اے۔ ایہناں دے تھݨ لمبے ہُندے نیں۔ تقریبن 25 فیصد بکریاں اک وقت وچ دو تن بچے دیندیاں نیں۔

بیتل دیاں ذیلی قِسماں

• ناگری بیتل
• گجراتی بیتل
• مکھی چینی بیتل
• چینی بیتل
• ساہیوال بیتل
• فیصل آبادی بیتل
• رحیم یار خاں بیتل
• نقرئی بیتل