دوجی بین الاقوامی پنجابی کانفرنس

لہور، پنجاب، پاکستان وچ بروز پیر، 18 نومبر، 2024ء نوں دُوجی دوجی بین الاقوامی پنجابی کانفرنس دا آغاز ہویا، جس وچ دُنیا بَھر دے 100 توں ودھ بین الاقوامی نمائندیاں دی میزبانی کیتی گئی۔

کانفرنس وچ مُختلف شعبیاں دیاں 100 پنجابی شخصیتاں نے خطاب کیتا، جیہناں وچ پاکستان، امریکا، کینیڈا، مشرقی پنجاب، برطانیا، آسٹریلیا، نیوزی لینڈ، یو اے ای دے ودوان، سیاستدان، اداکار، گلوکار، شاعر، تے سماجی کارکن شامل ہوئے۔ کانفرنس دے ایجنڈے وچ سنینی شرما دا ناں وی شامل سی، جیہڑی سریندر کور دی پوتری تے ڈولی گلیریا دی دھی اے۔ سنینی نوں اپنی ماں تے دادی دے نال عالمی سطح تے " ماون تے دھیا رل بیاتھیا نی مائے" گاؤن دے کئی موقعے ملے تے اوہناں نے اپنے آپ نُوں پنجابی گائیکی دی اک خاص صنف دی روایت نوں محفوظ رکھݨ لئی وقف کر دتا اے جیہڑی بِلاشُبہ کور سِسٹرز نے 80 سال توں ودھ عرصے پہلے متعارف کروائی سی۔

پنجابی انسٹی ٹیوٹ آف لینگوئج آرٹ اینڈ کلچر (پلاک) ولوں پنجابی پرچار تے پنجابی لہر دے تعاون نال منعقد کیتی گئی دوجی بین الاقوامی پنجابی کانفرنس اے، جیہڑی پلاک، لاہور وچ منعقد ہوئی۔

تن دناں دے ایس پروگرام وچ امریکا، کینیڈا، برطانیا تے مشرقی پنجاب سمیت دنیا بھر دے پنجابی دانشوراں، ودواناں، تے ثقافتی شخصیتاں دی اک وڈی تعداد اکٹھی ہوئی۔

کانفرنس وچ پنجابی ادب، تاریخ، تے سیاست نال وابستہ مکھ مسئلیاں دا احاطہ کیتا گیا، تے پینل بحث، ریسرچ پریزنٹیشناں، کتاباں دی پرکھ، ڈراما پرفارمنس، مشاعرہ، تے سنگیت دا سلسلہ پیش کیتا گیا۔

افتتاحی دن معروف ادیب مستنصر حسین تارڑ نے کلیدی خطاب کیتا۔ کلیدی گل بات وچ پنجابیاں دی قومی تے سیاسی شعور شامل سی، جس وچ قابل ذکر شخصیات جداں سہیل وڑائچ، فرخ سہیل گوئندی، نین سکھ، تے شک بوہرا شامل سن۔

دوجا پینل پنجابی تے نویں ٹیکنالوجی دے پرچار اُتے مرکُوز سی، جیہدا پربندھ مدثر اقبال نے کیتا، جس وچ فلم، سیاست، تے ادب دیاں پرمکھ شخصیتاں دے یوگدان شامل سن۔ مزاحیہ اداکار سلیم البیلا تے گوگا پسروری نے حاضرین نوں تفریح فراہم کیتی۔

ماں بولی دی تعلیم تیجے پینل دا موضوع سی جس وچ جسونت ظفر، جمیل پال، سکھی بٹ تے پروین ملک ورگی شخصیات شامل سن۔ چوتھی گل بات وچ پنجابی بہادری نوں کھوجیا گیا، جس وچ نسیم کوثر ماڈریٹر سی تے ڈاکٹر شبنم اسحاق، گرچرن کور، شمسہ حسین، تے روبینہ جمیل پینلسٹ سن۔

ایس کانفرنس وچ خالد حسین، زبیر احمد، ساہج پریت مانگٹ، خالد فرید ڈھلوال دے نال نال پنجابی ادب دے لوکاں نال جُڑت تے پینل مباحثے دے نال نال پرمیش سنگھ دے ناں نال اک ڈراما وی پیش کیتا گیا۔ اس توں علاوہ، تقریب دے دوران پنجابی شارٹ فِلماں، رِیلاں، تے لِکھن دے مقابلیاں دے نتیجے دا اعلان کیتا گیا۔

ڈرامے تے گائیکی دی پرفارمنس

1947ء دی ونڈ دے فسادات اُتے مبنی ڈرامے دی اک خوبصورت پریزنٹیشن پلاک وچ ناظرین دے سامݨے پیش کیتی گئی۔ حاضرین ولّوں اداکاراں نوں خوب داد دِتی گئی۔

پنجابی ادب دی نامور ہستی، اجوکے پنجابی شاعری وچ یوگداناں لئی جاݨے جاندے اشوک پورا نے سرحد پار دے پنجابیاں نوں اک کرن والی اپݨی شاعری پیش کیتی۔

کانفرنس وچ مشہور پنجابی ٹِک ٹاکر تے کانٹینٹ کریئیٹر موجود سن۔

سپیکر پنجاب اسمبلی دی رلت

پنجاب اسمبلی دے سپیکر ملک محمد احمد نے پنجابی انسٹی ٹیوٹ آف لینگوئج آرٹ، اینڈ کلچر (پلاک) وچ منعقد ہوݨ والی دوجی بین الاقوامی پنجابی کانفرنس وچ مہمان دے طور اُتے رلت کیتی۔

ایس موقعے اُتے اوہناں نے پنجابی زبان نوں ثقافتی ورثے تے سیاݨپ دا خزانہ قرار دیندے ہوئے کہیا کہ ایہ دنیا بھر وچ محبت، ایکتا، ہم آہنگی دی علامت اے۔ ملک محمد احمد نے اپنے خطاب وچ ایس گل تے زور دتا کہ پنجاب اسمبلی دے مِمبراں نوں پنجابی وچ گل کرن دا حق دیݨا اک تاریخی کارنامہ اے۔ اوہناں نے نوجوان پیڑھی نوں اوہناں دی لسانی تے ثقافتی جڑھاں نال جوڑن دی اہمیت نوں اجاگر کردے ہوئے ایس گَل تے زور دِتا کہ تعلیمی اداریاں وچ پنجابی زبان نوں فروغ دیݨا ویلے دی لوڑ اے۔

اوہناں نے کہیا کہ پنجابی ادب، وارث شاہ دی شاعری تے پنجابی رہتل عالمی سطح اُتے اک نویکلی پہچاݨ رکھدی اے۔

سپیکر نے دہرایا کہ پنجاب اسمبلی زبان تے رہتل نوں پرچارن لئی ہر مُمکن اپرالے کردی رہے گی، جد کہ پنجابی زبان نوں قانونی درجہ دیݨ دیاں کوششاں وی جاری نیں۔ چڑھدے پنجاب تے کینیڈا توں آئے پروہݨیاں دی موجودگی دا حوالہ دیندے ہوئے ملک احمد نے ایہنوں پنجاب لئی اعزاز قرار دِتا تے شُکریہ ادا کیتا۔ اوہناں نے گَل بات ختم کردے ہوئے کہیا کہ پنجابی زبان تے رہتل دی خوشبو ایس دھرتی وچ ہمیشہ رچی رہوے گی۔

کانفرنس دا اِنعقاد

لاہور وچ تن دنن بین الاقوامی پنجابی کانفرنس جاری رہی۔

کانفرنس دی کاروائی وچ وکھ کھ حصے شامل سن، جیہناں وچ مباحثہ، پنجابی زبان بارے کھوج، لوک ناچ، گیت، تے ناٹک پردرشن شامل سن۔

بدھوار نوں پہلے دن 'پنجابی پرچار' دے احمد رضا نے اپنی افتتاحی تقریر کیتی، جد کہ ڈائریکٹر جنرل پنجاب انسٹی ٹیوٹ آف لینگوئج آرٹ اینڈ کلچر بینش فاطمہ ساہی تے امریکا توں آئے اشوک بھورا نے پروہݨیاں دا سواگت کیتا۔ مشہُور ادیب مستنصر حسین تارڑ نے سامعین نال کلیدی خطاب کیتا۔

بحث دے حصے وچ، پینلسٹاں مشتاق صوفی، نین سکھ تے ظہیر وٹو نے "پنجاب: متضاد بیانات" دے موضُوع اُتے بحث کیتی۔ لہندے پنجاب دے پنجابی پروفیسراں، ڈاکٹر نبیلہ رحمان، عباد نبیل شاد، تے کرامت مغل نے "عصری پنجابی ادب وچ جدید پہلو" اُتے تبادلہ خیال کیتا، جد کہ ڈاکٹر گرپریت سنگھ (امریکا)، سکھی باتھ (کینیڈا)، امرجیت سنگھ (برطانیا)، تے احمد رضا نے “پنجابی زبان دی حیثیت” اُتے روشنی پائی۔

رخشندہ نوید، فروا شفقت، تے ڈاکٹر شفق نے "پنجابی عورتاں: سرکشی تے مزاحمت دی روایت" اُتے اپنے تجزیے پیش کیتے، جد کہ مسعود خالد، ڈاکٹر صغرا صدف، تے کلیان سنگھ نے "بابا فرید، گرو نانک تے بلھے شاہ دا فلسفہ" اُتے تبادلہ خیال کیتا۔

ایس توں علاوہ کانفرنس دے پہلے دن “وارث شاہ دا سماج: ہیر تے بھجّ کے ویاہ” تے پنجابی سنسکرت سانجھ” سرلیکھ ہیٹھ دو کھوج پرچے پیش کیتے گئے۔ پنجابی لوک ناچ جویں کہ بھنگڑا، گِدّھا، جُھمر تے دھمال وغیرہ اس سماگم دے خاص نشان سن۔ پنجابی وچّ لوک سنگیت اتے گیتاں نے سروتیاں نوں موہ لیا۔

ایہ کانفرنس 'پنجابی پرچار' تے پنجابی انسٹیٹیوٹ آف لینگوئج آرٹ اینڈ کلچر دے زیر اہتمام مُنعقد کیتی گئی۔ پنجابی زبان دے لکھاری تے سوجھوان ایس کانفرنس وچ پاکستان، مشرقی پنجاب، امریکا، کینیڈا، تے برطانیا سمیت دُنیا بَھر توں شامل ہوئے۔

حوالے