زار روس
زار روس ، روسی سلطنت دے بادشاہ دا لقب سی ۔ روسی بولی چ زار نوں " سار "لکھئیا تے پڑھئیا جاندا اے تے اس دا مطلب مطلق العنان شہنشاہ دا لئیا جاندا اے ، مثال دے طور تے پرانے روس چ استمبول یاں قسطنطینہ نوں سار گراد یعنی شہنشاہ دا شہر وی آکھئیا جاندا سی کیونجے پرانے روس چ قسطنطنیہ دی حثیت جداں مسلماناں چ خلیفہ تے بغداد دی سی ایداں ای سی اس دی وچہ ایہہ سی کہ جدون 9ویں صدی دے آخر چ روسیاں نے آرتھوڈوکس عیسائیت قبول کیتی ، اوس ویلے دریائے وولگا دے علاقےآں چ قائم خانان بلگاریہ ( خانیٹ آف بلگاریہ) دا مسلمان وفد اسلام دا پیغام لے کے ، روم دا وفد کیتھولک گرجے دا پیغام لے کے تے قسطنطنیہ دا وفد آرتھوڈوکس گرجے دا پیغام لے کے گئیا سی پر کیویائی روس دے حکمران نے آرتھوڈوکس عیسائیت اپنان دا فیصلہ کیتا ، اس دیاں کئی سیاسی تے معاشی وجہاں وی سن ، اوس ویلے توں ای قسطنطنیہ تے بازنطینی سلطنت روسیاں دی عقیدت تے احترام دا مرکز بن گئی تے روسیاں دیاں ہمدردیاں ہمیشہ اس دے نال رہئیاں ۔ روسی آرتھوڈوکس گرجے دے ارکان اج وی استمبول لئی "سارگراد" دا لفظ ورتدے نین ۔ زار (روسی چ سار) لاطینی بادشاہاں دے لقب سیزر دی ای ا ک شکل اے ۔ روس چ ایہہ لقب سب توں پہلے پیٹر اعظم نے اختیار کیتا ۔ اس دی مونث زارینہ (روسی چ سارینہ) اے ۔ روسی سلطنت دا آخری زار نکولس II سی ۔ قیصر تے خسرو وی اس دے مختلف بولیاں چ تلفظ نیں ۔