غار حرا

آزاد انسائیکلوپیڈیا، وکیپیڈیا توں

غار حرا مکہ دے کول پہاڑ 'جبل نور' چ واقع اک غار اے۔ ایتھے پہلی وحی نازل ہوئی سی۔ ایہ غار پہاڑ دی چوٹی دے اُتے نئیں۔ ایہدے تک پہنچن لئی 60 ، 70 میٹر تھلے لہندے پاسے جاݨا پیندا اے۔ نشیب چ اتر کے رستا فیر اچائی ول جاندا اے جِتھے غار حرا واقع اے۔ غار پہاڑ دے اندر نئیں بلکہ ایہدی بکھی چ خیمے دی شکل چ تے ذرا باہر نوں اے۔ تقریبن ادھے میٹر موٹے تے پوݨے 2 میٹر چوڑے تے 3 ، 4 میٹر لمبے چٹانی تختے پہاڑ دے نال ایس طرحاں ٹِکے ہوئے نیں کہ متساوی الساقین تکون ورگے مونھ آلی غار بن گئی اے۔ جیہدا ہر ضلع ڈھائی میٹر لمبا تے قاعدہ تقریبن 1 میٹر اے۔ غار دی لمبائی سوا 2 میٹر اے تے ایہدی اچائی اگے نوں ہولی ہولی گَھٹدی جاندی اے۔ غار دا رخ ایہجیا اے کہ سارے دن چ سورج اندر نئیں جھاک سکدا۔ نبی کریم صلی اللہ علیہ و آلہ وسلم جد 40 سال دے ہوئے تاں کُچھ دِناں دی خوراک نال لے کے جبل نور تے آوندے تے ایس غار چ غور و فکر تے اللہ دی پوجا کر دے سن۔ ایتھے ای اک دِن جبرائیل علیہ السلام آئے تے نبی صلی اللہ علیہ و آلہ وسلم تے سبھ توں پہلی وحی نازل کیتی جیہدے ذریعے اللہ تعالا نے آپ نوں نبی آخر الزماں مبعوث کیتا۔

ہور دیکھو[سودھو]