فلپائن عقاب

فلپائن عقاب
دیس :	جنور
برادری :	کورڈیٹ
ٹولی :	پنچھی
ٹبر:	الاں
سائینسی ناں:	Pithecophaga jefferyi
فلپائن عقاب دی پھرن تھاں نیلے رنگ وچ

فلپائن عقاب الاں ٹبر دا اک وڈا شکاری پنچھی اے جیڑا فلپائن دے جنگلاں وچ وسدا اے۔ ایدے پر بھورے تے چٹے رنگ دے ہوندے نیں، لمائی 2.82 فٹ توں 3.35 فٹ تے وزن 4.7 توں 8 کلوگرام تک ہوندا اے۔ ایہ جگ دے سب توں وڈے عقاباں چوں اک گنیا جاندا اے۔ فلپائن عقاب دی بوت کٹ گنتی اے تے ایدے وچ بوت جان ہوندی اے۔ ایہ فلپائن دا قومی پنچھی وی اے۔ اینوں جنگلاں دی کٹائی نال بوت خطرہ اے۔ ایدا بچاؤ کرن دیاں بوت کوششاں کیتیاں جاریاں نیں۔

وکھالا

فلپائن عقاب دی توئن دے پچھلے پاسے لمے بھورے پر ہوندے نیں۔ ایدا منہ کالا جیا ہوندا اے جیدے پاسے چٹے تے بھورے پر ہوندے نیں۔ ایدی کمر گوڈے بھورے رنگ دی ہوندی اے جدونکہ ایدا ٹڈ تے تھلے دے پر چٹے ہوندے نیں۔ ایدیاں لتاں پیلے رنگ دیاں ہوندیاں نیں جیناں تہ وڈے طاقتور کالے پنچے ہوندے نيں۔ ایدی چنچ نیلے-سرمئی رنگ دی وڈی ہوندی اے۔ فلپائن عقاب دیاں اکھاں نیلیاں ہوندیاں نیں۔

فلپائن عقاب دی لمائی 3 فٹ 1 انچ توں 3 فٹ 5 انچ تک ہوندی اے۔ نر عقاب مادہ توں 10٪ وڈا ہوندا اے۔ اینا دا وزن 4.7 کلوگرام توں 8 کلوگرام تک ہوندا اے۔ ایناں دے پراں دی لمائی 6 فٹ توں 7 فٹ 3 انچ تک ہوندے نیں۔

فلپائن عقاب لمیاں چیخاں ماردے نیں تے اوناں دے چوزے کھانا منگن لئی نکیاں چیخاں ماردیں نیں۔

پسار

فلپائن عقاب جگ چ صرف فلپائن چ ہوندا اے تے اینوں فلپائن دے چار وڈے جزیرے: لوزون، سامار، لیٹے تے منڈاناؤ وچ ویکھیا جاسکدا اے۔ منڈاناؤ وچ سب توں بوتے عقاب پاۓ جاندے نیں۔ باقی جزيریاں اتے کٹ کٹ ای نیں۔

اے ہلکے پھلکے پعاڑی جنگلاں وچ پایا جاندا اے۔ ایہ ہن فلپائن دے صرف 9،220 مربع کلومیٹر دے جنگلاں وچ وسدا اے۔ فلپائن عقاباں دا اک جوڑا دوجے جوڑے توں کم از کم 13 کلومیٹر دور گھونسلہ بناندا اے۔ ایہ بوت تیز اڈن آلا پنچھی اے۔ ایناں دا جیون 30 توں 60 وریاں تک ہوندا اے۔

کھان پین

فلپائن عقاب پنچھیاں توں لے کہ نکے میملاں نوں مار کھاندا اے۔ ایہ اپنے پسار دا چوٹی دا شکاری اے۔ ایناں دے گھونسلے توں نکی چمگادڑ توں لے کہ فلپائن ہرن دا ڈھانچہ لبیا جا چکیا اے۔ ایہ نکے سور تے کتے وی شکار کردے نيں۔ اے جنگل وچ رکھ توں رکھ اڈدے نیں تہ شکار لبدے نيں۔

نسل ودھائی

دوجے عقاباں آر فلپائن عقاباں دا جوڑا سارے جیون کھٹیاں وسدا اے۔ اگر اک مرجاۓ تہ دوجا اک اور سنگی لبدا اے۔ اوہ جولائی وچ انڈے دیندے نیں تے انڈے اتے 58 توں 68 دیہاڑے بیندے نیں۔ انڈے اتے نر تے ماردہ دونوں بیندے نیں۔ دوویں ماپے چوزے نوں کھواندے نيں۔ چوزا 4 تے 5 معینے دی عمر وچ اڈنا سکھدا اے۔ ماپے 20 معینیاں تک چوزے دا خیال رکھدے نیں۔ چوزا 10 معینے دی عمر بعد ای شکار کردا اے۔

بچاؤ

2010 وچ اینوں بچان دی بوت زیادہ کوشش ٹوری گئی، اس ویلے فلپائن وچ 150-200 عقاب سن تے 2015 وچ 600 ہو گۓ نیں۔ ایناں لئی سب توں وڈا خطرہ جنگلاں دی کٹائی اے۔ اس لئی جنگلاں نوں وی بچایا جاریا اے۔