مظفرگڑھ برساتی نہراں

ایہناں نہراں وچ انڈس دریا دے کھبے پاسے تے چناب دریا دے سجے پاسے توں نکلدیاں نہراں شامل نیں ۔ ایہ اس کھیتر دے مقامی سرداراں نے بݨائیاں تے مہاراجا رنجیت سنگھ دے گورنر ساون ملّ نے ایہناں وچ سدھار لیاندا ۔ پنجاب اُتے برطانوی مل مگروں ڈپٹی کمشنر دے ماتحت رہیاں تے 1880 وچ پنجاب دے نہری محکمے نوں مُنتقل کر دتیاں گئیاں ۔ ایہناں نہراں دے ناں موہن واہ، ریات واہ، راجو، خدا داد، جاکری، تھل، کالو، سن داد، راج، ریہڑو، عظیم واہ، کچپک، سید واہ، رکھ، مراد واہ، لنڈا، خیرپور، نبی پور، سلطان پور، خانواہ وغیرہ نیں۔ وڈیاں نہراں تے ڈسٹریبیوٹریاں دی لمبائی 1138 میل اے تے ایہناں دا ڈسچارج 2570 کیوسکس اے۔

چناب دریا دے سجے کنڈھے توں نکلدیاں نہراں کھنڈرکبر واہ، کرم کینال، ملتان تے شجاع آباد دے ساہمنے گنوش، ولیواہ، ٹالی، حاجی، نور، سلر، علی تے کھلیئی نیں، ایہناں دی لمبائی 232 میل تے ڈسچارج 740 کیوسکس اے ۔ ایہ ساریاں نہراں 1205 مربع میل رقبے نوں سیراب کردیاں سن، جیہناں وچ 547 مربع میل سال بھر چلݨ والیاں نہراں نیں ۔ اس سیرابی علاقے نوں سیلاباں دیاں تباہ کاریاں توں بچاؤݨ لئی انڈس دریا نال 119 میل تے چناب دریا نال 40 میل لمبا بَنھ لایا گیا ۔ 04-1903 وچ ایہناں توں 6 لکھ روپیا مالیا آیا ۔ ایہناں نہراں نوں بعد وچ تونسا بیراج توں نِکلݨ آلی مظفرگڑھ نہر تے تریموں بیراج توں نِکلݨ آلی رنگ پور نہر دے رقبے وچ شامل کر لیا گیا ۔