میلو ویادو

میلو ویادو دکھنی فرانس چ دریائے ٹارن دی وادی تے قائم اک وڈا پل اے ۔ انگریز ماہر تعمیرات نارمن فاسٹر تے پلاں دے فرانسیسی انجینیئر مائیکل ورلو گیوکس دا ڈیزائن کیتا ایہہ گڈیاں لئی بنائیا گئیا دنیا دا سب توں اچّا پل اے ۔ جس دے اک تھم دی اچائی 343 میٹر اے جہڑی پیرس دے مشہور آئیفل ٹاور توں وی ودھ اے ۔ ویادو پیرس توں بیزیرس جان آلے رستے اے 75 تے اے 71 دا حصہ اے ۔ اس دا افتتاح 14 دسمبر 2004ء چ فرانس دے صدر ژاک شیراک نے کیتا تے دو دن مگروں اسنوں گڈیاں لئی کھول دتا گئیا ۔اس پل دی اساری دا آغاز 16 اکتوبر 2001ءنوں ہوئیا سی ۔

میلو ویادو پل تے سجے پاسے میلو شہر

پل دی تعمیر توں پہلے سڑک تھلے وادی چ میلو شہر چ اتردی سی تے جولائی تے اگست دی چھٹیاں دے دناں چ ٹریفک دے شدید مسئلے بن جاندے سن ۔ اس لئی اک ایہوجہے پل دی لوڑ محسوس ہوئی جہڑا ٹریفک نوں اس وادی نوں پار کرن چ مد د دیوے اینج اس پل دی اساری دا فیصلہ ہوئیا ۔

میلو ویادو پل 7 کنکریٹ دے تھماں دے سہارے قائم اے جس تے 36 ہزار ٹن وزنی تے 2460 میٹر لمبی سڑک بنی ہوئی اے جہڑی 32 میٹر چوڑی تے 2اعشاریہ4 میٹر ڈوہنگی اے۔