نواب ڈاکٹر امبر شہزادہ
| نواب ڈاکٹر امبر شہزادہ | |
| جمݨستھان : | فیصل آباد، پنجاب، پاکستان |
| جمݨ تریخ : | 1960ء~ |
| مرن : | 27 مارچ 2023ء، لہور |
| گُݨ : | پنجابی شاعری |
| لِکھتاں : | جُرموں وَدھ سزاواں |
| سیاسی جماعت : | آپ جناب سرکار پارٹی |
| مادر علمی : | گورنمنٹ کالج لہور |
نواب ڈاکٹر امبر شہزادہ، اک پنجابی شاعر سن۔ اوہناں دی اک ہور شناخت اک منفرد سیاسی انداز سی۔ اوہ آپ جناب سرکار پارٹی دے بانی چیئرمین سن تے اپݨے آپ نوں متبادل وزیراعظم تے نیم کرپٹ قرار دیندے سن۔ اوہناں نے 1988ء توں 2018ء تک تقریبن ہر الیکشن لڑیا لیکن ہر بار الیکشن ہاردے رہے۔ اوہناں نے زیادہ تر قومی اسمبلی دے الیکشن لڑے۔
اوہناں دا اک مخصوص پہناوا تے مخصوص انداز سی۔ اکھاں اُتے کالا چشمہ، سر اُتے لال تُرک ٹوپی تے ہتھ وچ سوٹی ہُندی سی۔ کھوتی ریڑھی اُتے اپݨی الیکشن کمپین چلاؤندے سی۔ اوہناں دے سیاسی اِنتخابی نعرے بہت مضحکہ خیز ہُندے سی۔ اپݨے مُنفرد منشور تے طرز گفتگو نال عوام دی توجہ دا مرکز بݨدے سی، اوہناں دا بنیادی مقصد اپݨے انوکھے انداز وچ سیاسی نظام تے سیاست دیاں خرابیاں دی نشاندہی کرنا سی۔
امبر شہزادہ دا تعلق فیصل آباد توں سی۔ اوہناں دا اصل نام خالد محمود سی۔ ایف ایس سی وچ گھر والے بضد سی کہ اوہ سائنس پڑھن لیکن اوہناں نوں بیالوجی توں اینی نفرت سی کہ اوہناں نے اک پوری نظم اس مضمون دے خلاف لکھ دتی۔ 1987ء وچ ہومیو پیتھک ڈاکٹر بݨ گئے۔ اوہ فیصل آباد توں لہور چلے گئے تے گورنمنٹ کالج لہور وچ ایم اے فلاسفی وچ داخلہ لیا تے 1989 وچ فلسفے وچ ماسٹر کیتا۔
بطور پنجابی شاعر
[سودھو]امبر شہزادہ اک منفرد پنجابی شاعر سی۔ مشاعرےآں تے ادبی محفلاں وچ شرکت کردے رہندے سی۔ اوہناں دی شاعری وچ دا مجموعہ جُرموں ودھ سزاواں 1996ء وچ شائع ہویا۔ اوہناں نے کثیر تعداد وچ پنجابی نظماں تے غزلاں لکھیاں۔
وفات
[سودھو]نواب ڈاکٹر امبر شہزادہ 27 مارچ 2023ء نوں ہارٹ اٹیک دے باعث انتقال کرگئے۔ مرحوم نوں اوہناں دی رہائش گاہ دے کول حبیب پارک ملتان چونگی، لہور دے قبرستان وچ سپُردِ خاک کیتا گیا۔
نمونہ کلام
[سودھو]تیرے اُتے رہ رُہ گئے آں
[سودھو]تیرے اُتے رہ رُہ گئے آں، دُکھاں دے وچ پے پُو گئے آں
جیہڑیاں گلّاں کرنیاں نئیں سی، اوہ وی تینوں کہہ کُہہ گئے آں
تے اپݨے آپ توں وڈے صدمے، جِند اپݨی تے سہہ سُہہ گئے آں
تیریاں یاداں تیرے نخرے، جو کُچھ لبھا لے لُو گئے آں
تیرے عشق دی مستی چ سیگے، پہاڑاں نال وی کھیہ کُھوہ گئے آں
اوہدے پیر نئیں لگدے تھلّے، جیہدے پیریں پے پُو گئے آں
تیرے دل وچ بہندے بہندے، اپݨے جوڑیں بہہ بُوہ گئے آں
عُمراں بَھر دا روݨا دھوݨا، جُھنگے دے وچ لے لُو گئے آں
پتھر حالے موم نئیں ہویا، دیگ وی داتا لاہ لُوہ گئے آں
گھاٹا ای گھاٹا، گھاٹا ای گھاٹا، کیہڑے کَم چ پے پُو گئے آں
تیرے اُتے رہ رُہ گئے آں، دُکّھاں دے وچ پے پُو گئے آں
(نواب ڈاکٹر امبر شہزادہ)
بیالوجی
[سودھو]رات دِنے پئی وَڈھ وَڈھ کھاوے ساڈی جان بیالوجی
ایہنے ساڈی جِند نئیں چھڈݨی سانوں کِتے لکالو جی
ایہدے سپیلنگ یاد نئیں رہندے، ایہدا تصور بُھلدا نئیں
گَھر دے کہندے رٹّا لا کے راتو رات مکالو جی
ڈیفی نیشن آف بیالوجی دے پینڈے مُکدے نئیں
آرٹیکل نیں، دوجے پاسے لا چھڈی یرکالوجی
انّھی مچی ہَر ہَر پاسّے، سارے ایدّاں چاؤہندے نیں
جیہڑی شے نوں ہَتھ پیندا اے کھوہ لئو بئی تے کھالئو جی
کالج والے قاعدے ای وکھرے کِتھے بُھلّی پِھردے او
پیسے دے کے کاکّا بلّی ہُݨے نمبر لوالو جی
بُھکھ دے ہتّھوں تنگ ساں لوکو! فیر وی سَبھ کُچھ دے آیا واں
چھوٹے بھیݨ بھراء پئے آکھݨ بھاء جی! کچھ پکالو جی
تے نِکّی بھیݨ دے اتھرُو پُون٘جھ کے ایہ گَل مون٘ہوں نکل گئی
اپݨے گَھر تے وادّھو پئی اے، چاڑھ لئو اَج بیالوجی
اکّھاں دے وچ ہن٘جُو آگئے نال خیال ایہ آیا
کیہ ہُن٘دا جے تُوں نہ پڑھدا سوہݨیا! اج ایہ بیالوجی
ایس بیالوجی نے ساڈے دل تے چھالے پائے نیں
تاں کیہ ہُندا جے نہ اسیں پڑھدے بیالو شالوجی
کئی مرے، کئیاں مرجاݨا، ایف ایس سی نے مار مکاݨا
پَر میں وڈّا ڈاکٹر بݨݨا، میتھوں اَج ایہ لکھا لو جی
کدی تے تیری یار شہزادے! اُچی پوسٹ ہووے گی
مُچّھاں تے ہَتھ پھیر کے آکّھیں ایہنوں لمبیاں پالو جی
ایہنے ساڈی جِند نئیں چھڈݨی سانوں کِتے لکالو جی
(نواب ڈاکٹر امبر شہزادہ)