ورنہر فان براؤن

آزاد انسائیکلوپیڈیا، وکیپیڈیا توں

ورنہر فان براؤن (23 مارچ 1912 - 16 جون 1977) اک جرمن تے بعد چ امریکی انجنیئر تے سپیس آرکیٹیکٹ سی تے اودھا سب توں وڈا کم خلائی منصوبہ بندی سی۔ اونیں امریکہ تے جرمنی چ راکٹ سینس دی ترقی چ سب توں گہرا کم کیتا۔ اونہوں راکٹاں دا پیو وی آخیا جاندا اے۔ اوہ جرمن نازی پارٹی تے ایس ایس دا ممبر وی سی۔

20 توں 40 وریاں دی عمر چ اوہ نازی راکٹ ڈیزائن دا سردار سی تے دوجی وڈی جنگ چ وی 2 راکٹ اونیں ہی ڈیزائن کیتے۔ جنگ مکن دے بعد اونوں تے اودھی راکٹ ٹیم دے کج ممبراں نوں امریکہ لکا کے لے گیا۔ اونیں پہلاں امریکی فوج لئی درمیانی دوری تے مار کرن آلے میزائل بناۓ جس توں بعد اوہ ناسا دا حصہ بن گیا۔ اوتھے اوںوں مارشل سپیس فلائٹ سنٹر دی کمان دے دتی گئی جتھے اونیں سیچرن 5 راکٹ دے ڈیزائن دا کم لیا۔ اس راکٹ تے امریکی آسٹروناٹ چن تے پہنچ گۓ۔ اونوں 1975 چ نیشنل میڈل آف سینس دا انعام دتا گیا۔

پہلا جیون[سودھو]

ورنہر فان براؤن ورسٹز، پولینڈ چ 23 مارچ 1912 نوں جمیا۔ اس ویلے اوہ تھاں جرمن سلطرنت دے پرشیا صوبے وچ آندی سی۔ ورنہر فان براؤن نوں نکی عمر چ ای سپیس چ دلچسپی ہوگئی سی۔ اونیں پیانو تے چیلو وی وجانا سکھیا۔ اونون راکٹاں دا تے خلائی سفر دا شوق پیا تہ اونیں ریاضی تے فزکس پڑھن لئی ٹیکنیکل یونیورسٹی آف برلن چ داخلہ لے لیا۔ اوتھوں اونیں راکٹاں وارے سکھ کہ ایہ گل سمج لئی کہ اوس ویلے دی ٹیکنالوجی نال خلا چ نئیں جایا جا سکدا۔ اس لئی زیادہ سکھن لئی اوہ ای ٹی ایچ زیورخ ٹر گیا۔

راکٹ سائنس[سودھو]

جدوں نازی پارٹی 1933 نوں حکومت چ آئی، راکٹ سائنس دیسی ایجنڈے چ آگئی۔ ورنہر فان براؤن نوں راکٹاں دے ریسرچ کرن لئی گرانٹ مل گیا۔ اونیں ڈاکٹریٹ دی رسرچ دا جیڑا کم کیتا اودھا بیشتر حصہ فوج نے عوام توں لکا لیا تے تھوڑا جیا جان دتا جیدے تہ اونون 1934 چ پی ایچ ڈی دی ڈگری لب گئی۔ 1934 چ ای اودی ٹیم نیں 2 راکٹاں دے تجربے کیتے جیڑے 2۔2 تے 3۔5 کلومیٹر اچے گۓ۔

اس ویلے جرمنی امریکی فزکس گرو رابرٹ گوڈارڈ دی رسرچ چ بوت دلچسپی لے ریا سی۔ رابرٹ گوڈارڈ نیں پہلا پانی سار بالن آلا رکٹ بنایا سی تہ اونیں ای اک توں بوتیاں سٹیجاں آلے رکٹاں دا خیال دتا سی۔ دوجی وڈی جنگ ٹرن توں پہلاں پہلاں جرمن سائنس گرو رابرٹ گوڈارڈ توں اکثر تکنیکی شیواں پچھدے ریندے سن۔ ورنہر فان برائن نیں سائنس جورنلاں چوں رابرٹ گوڈارڈ دے راکٹاں دا ڈیزائن ویکھ کہ اپنے 'Aggregat' راکٹ ٹبر بنایا۔ اس ٹبر دا ای اک راکٹ اے-4 نوں وی-2 دا ناں دتا گیا۔