گندھک دا تیزاب
![](http://upload.wikimedia.org/wikipedia/commons/thumb/8/8b/Sulfuric-acid-2D-dimensions.svg/200px-Sulfuric-acid-2D-dimensions.svg.png)
گندھک دا تیزاب اک طاقتور تیزاب اے جیدا فارمولا H2SO4 اے۔ اے جینا مرضی گاڑھا ہوۓ اے پانی چ حل ہو جاندا اے۔ گندھک دا تیزاب بوت شیواں بنان چ ورتیا جاندا اے تے کیمیائی انڈسٹری دی اک وڈی پیداوار اے۔ 2001 چ ایدی پیداوار 165 ملین ٹن سی جیدی قیمت 8 بلین امریکی ڈالر اے۔ اینوں گڑیاں دیاں بیٹریاں، معدنیات کڈن، کھاد بنان چ، تیل صاف کرن چ، گندا پانی صاف کر چ تے کیمیائی شیواں بنان چ ورتیا جاندا اے۔
ورتن
[سودھو]گندھک دا تیزاب بوت خاص کیمیائی کمپاؤنڈ اے۔ کسے دیس چ گندھک دے تیزاب دی پیداوار ایدی انڈسٹریل طاقت دا نشان ہوندا اے۔ جگ چ گندھک دے تیزاب دا سب توں وڈا ورتن فوسفورک تیزاب دی پیداوار اے۔ تقریبا 60٪ گندھک دا تیزاب اس کم واسطے ورتیا جاندا اے۔ فوسفورک تیزاب توں کھاداں تے ڈٹرجنٹ بناۓ جاندے نیں۔
گندھک دا تیزاب بوت وڈے پیمانے تے لوۓ تے سٹیل بنان آلی انڈسٹریاں چ زنگ اتران چ ورتیا جاندا اے۔ اے کم جیناں پلانٹاں چ ہوندا اے اوہ اس کم چ سلفر دیاں آکسائیڈاں بناندے نیں جیناں نوں دوبارہ گندھک دا تیزاب بنان چ ورتیا جاندا اے۔
امونیم سلفیٹ اک ضروری نائیٹروجن دی کھاد اے۔ اینوں لوۓ تے سٹیل نوں صاف کرن آلے پلانٹاں چ خراب کوئلے توں گرمی لے کے فالتو گندھک دے تیزاب نال ریایکٹ کرا کے امونیم سلفیٹ دے کرسٹل بناۓ جاندے نیں جینوں کھاد دے طور تے ویچیا جاندا اے۔
ایدے توں الومنیم سلفیٹ بنایا جاندا اے جینوں کاغذ چھاپن چ تے زخماں دی مرہم کرن چ ورتیا جاندا اے۔ اینوں کاغذ نوں سخت کرن چ وی ورتیا جاندا اے۔ الومنیم الفیٹ نوں الومنیم ہائیڈوکسائڈ بنان چ ورتیا جاندا اے جیدے توں پانی صاف کیتا جاندا اے تے پانی دا ذائقہ وی چنگا کرن چ ورتیا جاندا اے۔
اینوں کیمیائی انڈسٹری چ کئی دوجے کماں واسطے وی ورتیا جاندا اے۔ اینوں نائلون بنان چ ورتیا جاندا اے۔ اے ہائیڈروکلورک تیزاب بنان چ ورتیا جاندا اے۔ گندھک دا تیزاب تیل صاف کرن چ تے اے آئسواوکٹین بنان چ کیٹالسٹ دے طور تے ورتیا جاندا اے۔ آئسواوکٹین پٹرول دے اوکٹین نمبر ودا دیندا اے۔ اینوں تے آئیوڈین نوں آکسیجن تے ہائیڈروجن بنان چ ورتیا جاندا اے۔
گندھک دا تیزاب پانی سکان چ ورتیا جاندا اے۔