گوٹا کناری

گوٹا یا گوٹا کناری یا گوٹا پٹی کشیدہ کاری دی اک قِسم اے جیہدا آغاز راجستھان توں ہوئیا۔ ایہدے وچ ٹانکیاں دی تکنیک دا استعمال ہُندا اے۔ سنہری رِبن دے چھوٹے چھوٹے ٹُکڑیاں نوں تاݨے باݨے اُپر لایا جاندا اے تاکہ کنارے تھلے بنھے جاݨ تے وسیع نمونیاں نوں بݨایا جاسکے۔ جنوبی ایشیائی ویاہواں آݪے تے رسمی لباس وچ گوٹا کشیدا کاری بڑے پیمانے اُتے استعمال ہُندی اے۔

جائزہ

گھاگرے وچ گوٹا پٹی

گوٹا سنہری یا چاندی دا رِبن تے فیتا ہُندا اے۔ مختلف چوڑائی دے مختلف دوسرے رنگاں دے ربن جو ساٹن یا جڑواں بݨے ہوئے ہُندے نیں، اوہناں نوں وی گوٹا کہیا جاندا اے۔ ایہ کناری دے کم دے ناݪ استعمال ہُندا اے۔ گوٹے دے کم واݪے کپڑے خاص مواقع یا مذہبی مواقع لئی ورتے جاندے نیں۔ سونے یا چاندی دی گوٹا پٹی یا مختلف چوڑائیاں تے مختلف رنگاں دے گوٹا ربناں نوں ساٹن یا جڑواں بݨے ہوئے سامان دی مدد ناݪ تیار کیتا جاندا اے۔ ایہدے وچ بݨے ہوئے سونے دے کپڑیاں نوں جورجیٹ یا باندھینی ورگے کپڑے اُتے رکھݨا شامل اے تاکہ مختلف سطح دی ساخت تشکیل دِتی جاسکے۔

دراصل اصلی سونے تے چاندی دیاں دھاتاں کڑھائی لئی استعمال ہُندیاں سی، لیکن آخر کار اوہناں دی جگہ چاندی دے ناݪ تانبے دے پرت دے استعمال نے لے لئی سی کیونکہ اوہنوں بݨاؤݨ دا حقیقی طریقا بہت مہنگا سی۔ اَج کَل ہور وی زیادہ سستے دستیاب نیں۔ تانبے دی جگہ پولیسٹر فلم نے لے لئی اے جو ضرورت دے مطابق پرت چڑھا کے دھاتی صورت دِتی جاندی اے۔ ایہ پلاسٹک گوٹے دے نام ناݪ جاݨیا جاندا اے تے انتہائی پائیدار اے کیونکہ ایہدے وچ نمی دے خلاف ودھیا مزاحمت ہُندی اے تے دھات اُتے مبنی گوٹے دے برعکس داغدار نئیں ہُندا۔

ایہ عمل لمبا تے وقت طلب اے۔ پہلا کَم کپڑے اُتے ڈیزائن بݨاؤݨا ہُندا اے۔ ایہ تاݨے باݨے اُتے اوہدے ڈیزائن دے ناݪ ٹریسنگ پیپر رکھ کے تے اوہدے اُتے چاک پاؤڈر دا پیسٹ پھیلاؤندے ہوئے کیتا جاندا اے۔ ڈیزائن دے مطابق گوٹا کَٹ کے مُختلف شکلاں وچ جوڑ دِتا جاندا اے۔ اس توں بعد ایہنوں تاݨے باݨے اُتے ہیمنگ یا بیک ٹانکے لاؤندے ہوئے چسپاں کر دِتا جاندا اے۔

پرکشش نمونے اس خِطے لئی مخصوص نیں تے ہَر شکل دا اپݨا الَگ نام اے۔ نقش عام طور تے فِطرت دے مطابق ہُندے نیں تے ایہدے وچ پُھل ، پتے تے پرندے یا جانور جِداں مور ، طوطے تے ہاتھی شامل ہُندے نیں۔

گوٹا اک بھرپور تے بھاری بھر کم خوبصورتی بݨاؤندا اے لیکن پہنݨ لئی ہلکا ہُندا اے۔

راجستھان وچ گوٹے دے کَم آݪے لباس زیادہ تر شادی ویاہاں یا تقریبات اُتے پائے جاندے نیں۔ گوٹا کشیدا کاری دا کَم عام طور تے دوپٹیاں، پگڑی دے کناریاں تے گھاگریاں اُتے کیتا جاندا اے۔

باہرلے جوڑ

• "یہ گوٹے دار لہنگا" ، بالی ووڈ دا مشہور گاݨا اے جو گوٹے دے کَم دا حوالا دیندا اے۔
• گوٹا پٹی ڈیزائن وچ تازا ترین رجحانات دیاں مثالاں