ہسپانوی شرق الہند

آزاد انسائیکلوپیڈیا، وکیپیڈیا توں
فائل:Spanish Provinces in Pacific.jpg
ہسپانوی شرق الہند دا نقشہ


ہسپانوی شرق الہند دی اصطلاح ایشیاء بحر الکاہل چ سپین دے مقبوضہ علاقےآں لئی ورتی جاندی اے ۔ جہڑے تن صدیاں (1565ء توں 1899ء تک) سپین دے قبضے چ رہے ۔ ہسپانوی شرق الہند چ فلپائن جزیرے ، ماریانا جزیرے ، کیرولین جزیرے شامل سن تے کجھ چر لئی فاموسا(تائیوان) دے کجھ حصے ملائشیا تے مولوکاس دے کجھ حصے وی شامل رہے ۔ 1898ء دی سپینی امریکی جنگ دے بعد بوہتے جزیرے امریکہ دے قبضے چ چلے گئے تے باقی علاقے 1899ء دے جرمن سپینی معاہدے چ جرمنی نوں ویچ دتیآں گئیاں ۔ سپین دا بادشاہ روایتی طور تے خود نوں "شرق تے غرب الہند دا بادشاہ" آکھواندا سی ۔


تریخ[سودھو]

فرڈینینڈ میگیلان 1521ء چ شرق الہند آئیا


کھوج تے قیام (1521ء توں 1643ء)

6 مارچ 1521ء چ پرتگیزی مہم جو فرڈینینڈ میگیلان ماریانا جزيرےآں تے پہنچئیا تے اس طرح سپین دا شرق الہند نال پہلا رابطہ ہوئیا ۔ اسنے گوآم نوں "چوراں دا جزیرہ" دا ناں دتا کیونجے ایتھے اسدا کجھ سامان چوری ہو گئیا سی ۔ میگیلان دے عملے نے اسدے بعد اس جزيرے توں چلے گئے تے 16 مارچ نوں اوہ 150 دے عملے نال فلپائن دے جزيرے ہومونہون تے اپڑئیا ۔ ایتھے اوہ مقامی لوکاں نال ملے تے اپنے اک ملایا بولی دے مترجم ملاکا دے اینریک جہڑا مقامی بولی سمجھ سکدا سی ، دے راہیں اینہاں نال گل بات کیتی ۔ شرق الہند تے امریکہ دے ہسپانوی علاقےآں دے وچکار بحر الکاہل دے راہیں تجارتی فیدے دیکھدے ہوئے ، انٹونیو ڈی مینڈوزا نے سپین دی نویں علاقےآں دی تلاش دی مہم دی حوصلہ افزآئی کیتی ۔ میگوئل لوپاز ڈی لیگازپی تے 1565ء چ فلپائن چ پہلی سپینی بستی دی نیہہ رکھی جہڑا سان میگوئل ناں دا شہر بن گئیا ۔ آندریس ڈی اوڈانیٹا نے فلپائن توں میکسیکو واپس جاندے ہوئے قابل عمل بحری رستہ لبھ لئیا ۔ 1570ء چ مقامی شہر منیلا نوں فتح کر لئیا گئیا تے چھیتی ای اس علاقے نال تجارتی رابطے شروع ہو گئے ۔