دوجی وڈی لڑائی

دوجی جنگ عظیم انسانی تاریخ دی سب توں بڑی لڑائی سی اے دنیا دے کافی علاقیاں چ لڑی گئی تے اے 6 وریاں تک ٹردی رہی۔ اس جنگ وچ سب توں زیادہ انسان مارے گۓ۔ دوجی جنگ عظیم 1 ستمبر 1939 چ شروع ہوئی جدوں جرمنی نے پولینڈ تے حملہ کیتا تے جرمنی دے خلاف کئی دوجے دیساں نے لڑائی دا اعلان کیتا۔ اے دیس براطنوی سلطنت تے کج یورپی دیس سن۔ اس حملے توں پہلاں کئی دوجے دیس پہلاں توں ای لڑ رۓ سی جیناں چ جپان تے چین ہے گے نیں۔ اس جنگ چ کئی دوجے دیس وی کج مسئلیاں دی وجہ توں کد پۓ جیناں چ پرل ہاربر تے جپان دا حملہ، جرمنی دا روس تے حملہ، تے برطانیہ تے ہالیڈ دیاں کلونیاں اتے جپان دا حملہ شامل نیں۔

1945 چ جنگ مک گئی تے اتحادی فوجاں دی جت ہوئی۔ اس لڑائی دی وجہ توں امریکہ تے روس دنیاں دیاں سپر پاوراں بنیاں تے ایناں دے درمیان سرد جنگ شروع ہوگئی تے اوہ 46 سال تک ٹردی رئی۔ اس جنگ نال افریقہ دی کلونیاں آزاد ہوکر دیس بن گیاں تے سجا یورپ یورپ چ شامل ہوگیا۔

وجہ

جرمنی نوں پہلی جنگ عظیم دی ہار بوت پعاری پئی تے اس دی وجہ توں جرمنی نے ورسیلز دے معاہدے اتے دسخط کیتے۔ اس معاہدے ددی وجہ توں جرمنی نوں اپنا 13٪ علاقہ چھڈنا پیا، اودی فوج دی گنتی صرف اک لکھ کردتی گئ۔ اودی بحریہ دی گنتی صرف 15000 بندا کر دتی گئی تے اسلحہ بنن، خریدن تے ویچن تے وی پابندی لا دتی گئی۔ روس دی لوک لڑائی دی وجہ توں اوہ سوویت یونین بن گغی جیدی حکومت تے جوزف سٹالن نے مل مار لیا۔ اٹلی چ موسولینی نے حکومت بنائی تے 1920ویاں چ چین چ کیومنٹانگ پارٹی نے چین نوں جوڑیا تے کج ویلے بعد اوہ کمیونسٹاں نلا لڑ پئی۔ جپان بوت طاقتور ہو گیا تے اودے مطابق ایشیا اتے اودا حق اے تے اس گل تے چلدیاں اونے چین اتے 1931 چ بحانہ بنا کے حملہ کر دتا۔

ہٹلر جینے 1923 چ جرمن حکومت اتے مل مارن دی کوشش کیتی سی 1933 چ جرمن چانسلر بن گیا۔ اونے لوک راج ختم کیتی تے دنیا دے قنون نوں بدلن دی ٹھانی تے فوج کھٹی کرنا شروع کیتی۔ اس گل تے فرانس، برطانیہ تے اٹلی پریشان ہوگۓ۔ فرانس نے اٹلی نال یاری لان واسطے اٹلی نوں ایتھوپیا چ کھلا محول دے دتے۔ 1935 چ جدوں جرمن صوبہ سارلینڈ واپس جرمنی نوں ملیا تے ہٹلر نے ورسیلز دے معاہدے نوں توڑدیاں ہوئیاں کانسکرپشن تے اسلحہ وڈے پیمانے تے کھٹا کرنا شروع کر دتا۔ جرمنی نوں روکن واسطے اٹلی، فرانس تے برطانیہ رل گے تے سوویت یونین نے فرانس نال یاری لان دی کوشش کیتی پر لیگ آف نیشن دی منضوری ناں ہون دی وجہ توں اے یاری پکی نہ ہو سکی۔ جون 1935 چ برطانیہ نے جرمنی نال بحری معاہدہ کیتا اس معاہدے چ اے لکھیا سی کہ جرمن بحریہ برطانوی بحریہ دے 35٪ ہوۓ گی پر اس معاہدے نال جرمنی نوں کوئی فرق نہ پیا۔ امریکہ نے صورتحال ویکھدیاں اگست 1935 چ نیوٹرل ہون دا اعلان کر دتا۔ جرمنی تے اٹلی نے روس دے خلاف سپین دی لوک جنگ دی حمایت کیتی تے اس جنگ نوں نوے ہتھیاراں دے تجربے آستے ورتیا۔

اکتوبر 1936 چ جرمنی تے اٹلی نے ایکسس طاقتاں دے ناں نال معاہدہ شورع کیتا اک مہینے بعد جپان نے جرمنی نال کمیونسٹاں دے خلاف معاہدہ کیتا جیدے اتے اٹلی نے اگلے ورے دسخط کر دتے۔ 1937 چ کیومنٹانگ پارٹی تے کمیونسٹاں نے جپان نال کھٹیاں لڑن واسطے آپس دی لڑائی بند کر دتی۔

جنگ

1939

اک ستمبر 1939 نوں جرمنی پولینڈ اتے حملہ کر دیندا اے۔ اس دی وجہ توں برطانیہ تے فرانس 3 ستمبر نوں جرمنی دے خلاف جرگ دا اعلان کر دیندے نیں۔ 28 نومبر نوں جرمنی تے روس پولینڈ تے ادا ادا مل مارن تے معاہدہ کردے نی۔ 30 نومبر نوں روس فنلینڈ تے حملہ کردا اے جیدی وجہ توں جرمنی روس دے خلاف جنگ دا اعلان کر دیندا اے۔

1940

9 اپریل 1940 نوں جرمنی ڈینمارک تے مل مار کے ناروے تے حملہ کر دیندا اے۔ 10 مئی نوں جرمنی بیلجیم، نیدرلینڈ تے لکسمبرگ اتے حملہ کردا اے۔ اک دو ہفتیاں چ نیدرلینڈ تے بیلجیم ہار جاندے نیں۔ جرمنی دے ڈینمارک تے ناروے اتے حملے دی وجہ سویڈن توں لویا جیڑا کہ برطانیہ جاریا ہوندا اے اودی روک۔ اس توں بعد جرمنی فرانس اتے حملہ کر کے اودے تے مل مار لیندا اے۔ فرانس اتے مل مارن توں بعد جرمنی برطانیہ اتے حملہ کر دیندا اے پر اے حملہ ناکام ہوندا اے جرمنی برطانیہ اتے مل مارن دی کوشش چھڈ دیندا اے۔ جپان دے چین اتے مل مارن آستے حملے دی وجہ توں امریکہ اودے اتے کئی شیواں دی پبندی لا دیندا اے۔ اٹلی یونان اتے حملہ کردا اے تے کج دناں بعد اوہ مار کھا کے واپس البانیہ ٹر پیندا اے۔

1941

اٹلی دیاں فوجاں افریقہ چ کافی مار کھندیاں نیں تے ہٹلر اٹلی دی مدد واسطے فوج پیجدا اے۔ اسی ویلے چرچل وی یونان اتے زور رکھن واسطے اودی مدد لئی ہور فوج پیج چھڈدا اے۔ لبیا توں اٹلی تے جرمنی دیاں فوجاں رل کے اتحادیاں اتے حملہ کردیاں نے تے اک مہینے چ اتحادی مصر تک پچھے ہو جاندے نیں۔ جرمنی اپریل چ یونان، بلکان تے یوگوسلاویہ اتے حملہ کردا اے۔ اس وجہ توں اتحادی اوتھوں نکل جاندے نیں۔